Qeyseride "Sherqiy türkistanni qollash" namida keng kölemlik namayish ötküzüldi

Ixtiyariy muxbirimiz erkin tarim
2015-02-04
Élxet
Pikir
Share
Print

2-Ayning 1-küni türkiyening ichki anatoliye rayonigha jaylashqan qeyseri shehiride "Sherqiy türkistanni qollash" mawzuluq namayish élip bérildi. Bu pa'aliyetni ülkü ojaqliri ma'arip we kültür fondi uyushturghan bolup, pa'aliyetke qayseride pa'aliyet élip bériwatqan sherqiy türkistan kültür we hemkarliq jem'iyiti bilen "Musteqil sherqiy türkistanliqlar" jem'iyiti ezalirimu ishtirak qilghan. Namayishqa köp sanda kishi qatnashqan bolup, muxbirimiz neq meydandin uchur igilidi.

Neq meydandin kelgen uchurlardin melum bolushiche, qeyseri ülkü ojaqliri ma'arip we kültür fondi binasining aldigha yighilghan texminen 3000 etrapida namayishchi qolida türkiye bayriqi, sherqiy türkistanning ay yultuzluq kök bayriqi we her xil lozunkilarni kötürgen halda qeyseri jumhuriyet meydanigha qarap mangghan. Namayishchilar jumhuriyet meydanigha yétip barghanda yoldiki we meydandiki xelq ammisining qoshulushi bilen namayishchilarning sani 5 minggha yetken. Namayishqa milletchi heriket partiyesi qeyseri shöbisining mes'uli mete éke ependi, qeyseri shehiri sari'oghlan rayonluq hökümetning bashliqi, osman yildiz ependi we ülkü ojaqliri teshkilatining re'isi sélim gümüsh ependiler qatnashqan.

Biz neq meydan'gha téléfon qilip pa'aliyet toghrisida melumat igiliduq. Bu pa'aliyetni uyushturghan ülkü ojaqliri teshkilati qeyseri shöbe re'isi müjdat shahin ependi bu namayishni uyushturushtiki meqsiti heqqide toxtilip mundaq dédi: "Sizgimu melum 60 yildin béri kommunist xitay Uyghur türklirige qarita assimilyatsiye siyasiti yürgüzüp kelmekte. Biz buni dunya jama'etchilikige türkiye jama'etchilikige anglitish üchün bu namayishni uyushturduq. Namayishimizgha 5000 etrapida kishi qatnashti. Biz namayishta Uyghur türklirige qarita bésim siyasiti yürgüzüwatqan xitayni eyiblimigen türkiye hökümitini we zalim xitay bilen hemkarlishiwatqan döletlerni Uyghurlargha yardem qilishqa chaqirduq. 5 Ming etrapida kishi qatnashti köp sanda muxbir pa'aliyitimiz heqqide xewer ishlidi, bu bizni qattiq söyündürdi. Biz kütken meqsitimizge yettuq."

Müjdat shahin ependi teshkilatining bundin kéyinmu sherqiy türkistanliqlarni qollap pa'aliyet ötküzüshke dawam qilidighanliqini bayan qilip mundaq dédi: "Bu xil pa'aliyetlirimiz bundin kéyinmu dawamlishidu. Biz Uyghur türklirining awazi bolimiz. Biz Uyghurlar tartiwatqan derd -elemni yaxshi bilimiz, Uyghur qérindashlirimiz hazir qéyin künlerni béshidin ötküzüwatidu. Uyghurlar xitayning éghir zulumigha chidiyalmay chet'elge qéchishqa mejbur bolmaqta. Sherqiy jenubiy asiya arqiliq shehirimizge kelgen Uyghurlarni körüp ularning weziyitige bekmu échinduq. Bularni körüp turup ulargha hésdashliq qilmighan kishilerni adem dégili bolmaydu. Biz ülkü ojaqliri teshkilati bolush süpitimiz bilen shehirimizge kelgen musapir Uyghurlargha i'ane toplash dolquni qozghap, yighqan yardem buyumlirini apirip berduq. Biz sherqiy türkistan erkinlikke érishkiche ulargha qolimizdin kelgen yardemni qilimiz".

Biz bu namayishqa qatnashqan Uyghurlar bilenmu téléfon ziyariti élip barduq. Qeyseridiki Uyghur pa'aliyetchiliridin biri abduqadir tümtürk ependi qeyseride tunji qétim bundaq köp kishining qatnishishi bilen namayish ötküzülgenlikini, namayish jeryanida, namayishchilarning "Sherqiy türkistan qan yéshi töküwatidu xewerdarmusen?", "Sherqiy türkistan'gha azadliq, hökümet uxlima qérindishinggha ige chiq" dégen'ge oxshash türlük sho'arlarni towlap xitayning dölet bayriqini köydürgenlikini bildürdi. Melum bolushiche, namayishchilar axirida metbu'at bayanatini oqup bolup tarqilip ketken.

Toluq bet