Rabiye qadir xanim : Uyghur ayalliri öz hoquqi üchün küresh qiliwatqan dunya ayalliri bilen birlishishi kérek

Muxbirimiz irade
2013-03-08
Share
Rabiye-xanim-3-NED-ayallar-kursida-305 Süret, 7 ‏- küni kanadaning toronto shehiride échilishqa bashlighan dunya uyghur qurultiyi bilen amérika démokratiyini ilgiri sürüsh fondi jemiyiti birlikte oyushturghan 3 ‏- qétimliq uyghur ayallirini kishilik hoquq we dimukratiye bilimliri bilen terbiyilesh kursidin bir körünüsh.
RFA Photo / Gulshen Abduqadir

8 - Mart xanim qizlar bayrimi dunyaning her qaysi jaylirida türlük yosunda tebrikliniwatidu, bügünki künde oxshimighan dölet we rayonlarda yashawatqan ayallar uchrawatqan oxshimaydighan mesililer hel qilinishni, insaniyet alimining diqqet étibarigha érishishni kütüp turmaqta.

Ayallargha qaritilghan zulumni ayaqlashturush keng teshebbus qiliniwatqan mushu minutlarda, Uyghur milliy herikiti rehbiri rabiye qadir xanim Uyghur ayallirining mesililiri üstide toxtaldi. U Uyghur ayallirini dunya ayalliri bilen zich birliship, öz heq - hoquqliri üchün küresh qilishqa chaqirdi.

Hörmetlik radi'o anglighuchilar, bügün 8 - mart xelq'ara xanim - qizlar bayrimi. Men erkin asiya radi'osi Uyghurche anglitish bölümidiki barliq xizmetdashlirimgha wakaliten radi'o dolqunliri arqiliq awazimiz yétip bériwatqan barliq jaylardiki xanim - qizlirimizning bayrimini chin dilimdin mubarekleymen.

Shundaq, bügün xanim - qizlarning bayrimi, ularning heq - hoquqliri üchün ornidin des turghan küni. 1910 - Yili 8 - mart küni tunji qétim xelq'ara ayallar küni qilip békitilgendin béri bir esirdin artuq waqit ötti. Ötken bu waqit jeryanida ayallarning heq - hoquqlirini qoghdash, ularni zulumdin, barawersizliktin, tehdittin, namratliqtin we türlük bésimlardin qutuldurush üchün birleshken döletler teshkilati, kishilik hoquq organliri, herqaysi ellerdiki ammiwi teshkilatlar we shexislerning tirishchanliqi, ishligen xizmetliri netijiside nurghun ilgirileshler barliqqa keldi. Emma kishilik hoquq organliri dunyada yene qilishqa tégishlik nurghun xizmetlerning barliqini, dunyaning oxshimighan jaylirida, oxshimighan mesililer bilen boghushuwatqan, zulumgha uchrawatqan xanim - qizlarning hélihem yardem kütüwatqanliqini bildürmekte.

Xelq'araliq kishilik hoquq organliri 2013 - yilliq xanim - qizlar künining bash témisini "Ayallargha qaritilghan zorawanliqni toxtitish" dep belgilidi. Ayallarning mesililirini kün tertipke élip kélidighan mushundaq bir künde Uyghur ayallirining weziyiti üstide toxtilishqa toghra kélidu, elwette. Biz bügün bu munasiwet bilen Uyghur milliy herikitining rehbiri, Uyghurlarning meniwi anisi rabiye qadir xanimni ziyaret qilduq. Biz rabiye qadir xanimgha téléfon qilghinimizda u dunya Uyghur qurultiyi we bashqa kishilik hoquq organlirining ortaq hemkarlishishi astida jenwede échilish aldida turghan yighin'gha qatnishish we yétekchilik qilish üchün téxi emdila jenwege yétip kelgen iken. U mushundaq bir uzun seperdin kéyinmu bizning ziyaritimizni qobul qilip, Uyghur ayallirining xanim - qizlar künini tebriklidi we Uyghur ayallirining mesililiri üstide toxtaldi. U Uyghur ayallirini dunya ayalliri bilen zich birliship, öz heq - hoquqliri üchün küresh qilishqa chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet