Rabiyxan musa anining oghli qurbanjan arif: rabiye qadir xanimgha hemkarlashqinim rast, buning apam bilen alaqisi yoq

Muxbirimiz shöhret hoshur
2016-09-27
Élxet
Pikir
Share
Print
5 Yildin béri didarini körmigen kenji oghli qurbanjanni körüshke teshna bolghan rabiyxan ana.
5 Yildin béri didarini körmigen kenji oghli qurbanjanni körüshke teshna bolghan rabiyxan ana.
RFA/Shohret Hoshur

Bortalaliq 82 yashliq rabiyxan ana norwégiyediki oghli qurbanjan arifning Uyghur milliy herikiti rehbiri rabiye qadir xanim bilen hemkarlashqanliqi üchün pasportining saqchilar teripidin tartiwélin'ghanliqini ashkarilighan. Bortaladiki xitay saqchilirimu bu ré'alliqini inkar qilmighan idi. Bügün muxbirimiz qurbanjan arif bilen söhbet élip bardi. U rabiye qadir xanim bilen hemkarlashqining normal insaniy we milliy burchini ada qilish ikenlikini bayan qilish bilen bille, anisi rabiyxan anining bu ishtin xewersizlikini eskertip, xitay saqchilirining bu ishqa anisini chétiwélishini "Qanunsizliq we banditliq" dep eyiblidi.

1. Essalamu'eleykum qurbanjan, biz apingiz rabiyxan musa xanimning pasport mesilisi heqqide birqanche programma ishliduq, bu jeryanda bortala saqchiliri deslepte apingizning ehwalidin xewersizlikini éytqan,axirida, pasportining tartiwélin'ghanliqining rastliqini étirap qildi we qolimizda, yéterlik seweb bar dédi, ular dewatqan seweb néme bolushi mumkin?
Jawab: xitayda qanun dégen nersining yoqluqini, saqchilarning kimni jazalighusi kelse, shuninggha bir toqunaqni artip tutup-solaydighanliqini, uning uruq-tughqanlirinimu qoshup jazalaydighanliqini bir Uyghur bolush süpitim bilen yaxshi bilimen, shunga saqchilarning qolimizda pakit bar dégini pütünley yalghan we bahane.

2. Apingizning gépidin qarighanda, saqchilar apingizgha sizni rabiye qadirning ornigha chiqmaqchi we chiqiptu dégendek geplerni qiptu we mushu seweb bilen apingizning pasportini tartiwaptu, siz bu geplerge qandaq qaraysiz?
Jawab: apam yashinip qalghan bolghini üchün gepni xata anglap qalghan yaki xata xatirilep qalghan bolushimu mumkin, eger bundaq bolsa, bu gepler shu saqchilarning neqeder sawatsiz, weziyettin ne qeder xewersizlikining bir ipadisi. Pütün dunyagha melum, rabiye qadir xanim men izini basalaydighan, men ornigha chiqalaydighan bir xanim emes. Mushuning özimu saqchilarning adem jazalash üchün éghizgha kelgenni jöylüshtin yanmaydighanliqining yene bir ispati.

3. Belkim bu yerde sizni rabiye qadir xanimgha hemkarlashqan, rabiye qadir xanimning sépide yer alghan dégen yaki shundaq démekchi bolghan bolushi mumkin, sizning rabiye qadir xanim bilen rast bir hemkarliqingiz boldimu?
Jawab: bir Uyghur, bir sherqi türkistanliq bolush süpitim bilen elwette boldi. Erkin dunyada yashap turup qadir xanimdek heqni sözlewatqan, mezlum xelqimizning derdini dunyagha anglitiwatqan shexs bilen hemkarlashmasliq elwette shexsiyetchilik we wijdansizliq we imansizliq bolidu, shunga rabiye xanim bilen normal bir Uyghur süpitide alaqilashqanliqim, zörür tépilghanda hemkarlashqanliqim toghra, emma bu ishimdin apam xewersiz, apamgha bu ishlarni déyishimmu orunsiz, shunga xitayning méning qilmishim seweblik apamgha qiliwatqan zorawanliqi, özining bandit-qaraqchi dölet ikenlikini ashkarilashtin bashqa nerse emes.

4. Rabiye qadir xanim bilen alaqingiz we hemkarliqingizni konkrétraq éytishni xalamsiz?
Jawab: yaq, (buningdin hajiti yoq dep qaraymen) yaki: chet'eldiki özining milliy, diniy we insaniy burchini untumighan Uyghurlar qatarida, menmu elwette bir kishilik hemkarlashtim, mesilen rabiye xanim chaqiriq qilghan barliq namayishlargha, yighinlargha qétildim, iqtisadiy yardem toplighanda chamimning yétishiche bir kishilik hesse qattim, buningdin kéyin yene herqandaq chaqiriqi bolsa dawamliq türde qétilimen.

5. Apingiz bilen körüshüp turuwatamsiz?
Jawab: elwette körüshüp turuwatimen, bolupmu bu xewerler chiqqandin kéyin téximu shundaq, biz a'ilide besh bala, bashqa qérindashlirimmu her küni hal ehwalini sorap turuwatidu. Apam özimu janliq tétik we heqqaniyetchi ayal, apamni bügünki bu qiyinchiliqlargha berdashliq béreleydu, dep qaraymen we allahtin xatirjemlik we salametlik tileymen.

Toluq bet