Sabiq sot xadimi gülnar abletning qéyin-qistaqta ölgenliki ashkarilanmaqta

Üch kündin buyan ündidar we féysbok qatarliq ijtima'iy taratqularda, bir Uyghur qizining képenlen'gen körünüshi we uning xitay türmiside qéyin-qistaqta ölgenliki gheyriy resmiy uchur bolup tarqalmaqta.

Uchurda ölgüchining aqsu awattin ikenliki we 8 ayning aldida “Chet'el bilen qanunsiz alaqileshti” dégen guman bilen tutqun qilin'ghanliqi ilgiri sürülgen. Radi'omizda buningdin del 8 ay ilgiri awat nahiyilik sot mehkisining bir ayal xadimining dölet mexpiyetlikini ashkarilash gumani bilen xizmettin toxtitilghanliqi heqqide bir qisqa xewer bérilgen idi. Muxbirimizning burun bu heqte igiligen uchurlirini qaytidin tekshürüshi we qaytidin éniqlash élip bérishi dawamida, ikki xewerde déyilgen kishining bir shexs ikenliki yeni awat nahiyilik sot mehkimisining xizmetchisi gülnar ablet ikenliki ashkarilanmaqta.

Mushu ayning 10-küni aqsuning awat nahiyisidiki xitay saqchiliri bir siyasiy mehbusni éghir aghriq halitide a'ilisige tapshurup bergen. Ular mehbusni a'ilisige tapshurghanda uning késel ikenlikige a'it ispatname yazduruwalghan. A'ile mehbusni awat nahiyilik doxturxanigha aparghinida doxturlar uni dawalap saqaytishqa közi yetmigen we késelni ürümchige yollighan. Ürümchi 2-doxturxanigha apirilghan bimar qutquzush ünüm bermey jan üzgen. Charisiz a'ile bu heqte héchkimge héchnéme déyelmigen؛ ölgüchining dostliri jesetni resimge élip ündidar qatarliq taratqularda tarqatqan. Resimlerde jesetning yüz we put barmaqliridiki zéde izliri körülmekte we xewerde ölgüchining qéyin-qistaqtin ölgenlik éhtimalliqi eskertilgen. Yene xewerde bayan qilinishiche, ölgüchi buningdin 8 ay burun chet'el bilen qanunsiz alaqilishish gumani bilen tutqun qilin'ghanliqi bayan qilin'ghan. Xewerde ölgüchining aqsu awattin ikenliki bayan qilin'ghan bolsimu, emma kespi heqqide melumat bérilmigen. Bu uchurdiki ölgüchining jinsi we yurti radi'omizda buningdin burun xewiri bérilgen bir tutqunning kimlikini eske salmaqta؛ yene bu ikki xewerdiki mehbusning tutulghan waqti we tutulush sewebimu oxshiship ketmekte. Eyni chaghdiki éniqlashlirimiz dawamida tutqunning awat nahiyilik sot mehkimisining katipi ikenliki we ismining bolsa gülnar ablet ikenliki éniqlan'ghan idi.

Eyni chaghda awattiki alaqidar xadimlar awat nahiyilik sotta gülnar ablet isimlik bir xadimning xizmettin toxtitilghanliqini yoshurmighan bolsimu, uning néme üchün jazalan'ghanliqi heqqide tepsiliy melumat bermigen. Biz bügün awat nahiyilik sot mehkimisige köp qétimlap téléfon qilghan bolsaqmu, téléfonni qobul qilghuchilar chiqmidi. Biz axiri, nöwette chet'elde yashawatqan, awat nahiyiside kengri alaqe tori bolghan bir Uyghur muhajirdin, gülnar abletning hayat yaki emesliki heqqide melumat soriduq. Muhajir xanim aqsudiki munasiwetlik kishilerdin sürüshte qilish arqiliq, gülnar abletning 10-mart küni wapat bolghanliqi heqqide uchur yetküzdi.

So'al: zumret xanim, gülnar abletning hayat yaki emesliki heqqide uchur alalidingizmu?
Jawab: aldim. Awattiki bir sabiq xizmetdishimning déyishiche, gülnar ablet tügep ketkendin kéyin, gülnar abletning a'ilisi nazaret astida iken, shunga méning tonushlirim ölüm petisige bérishqa pétinalmaptu.

So'al: sizge bu uchurni bergen kishiler, gülnar abletning hayat yaki emeslikini bilish imkanigha ige kishilermu? yeni mushu xewer ishenchlikmidu sizche?
Jawab: awattek bir nahiye üchün, bu nahayiti chong bir ish, buni jem'iyetke ariliship yürgen hemme kishi bileleydu. Men gülnar abletning ehwalini sorishimgha bir dostum “Senmu bu gepni sorighininggha qarighanda otni paxtining ichide saqlighini bolmaydiken-de?” dédi, mushuning özimu gölnar abletning béshigha bir ish kelgenlikining belgisi, men 4 kishidin sorudum, hemmisila, gülnar abletke bolghan hésdashliqini ipadilidi.

So'al: sizmu wetende xizmet munasiwiti bilen qanun sahesidikiler bilen yéqin munasiwette bolup baqqan biri bolush süpitingiz bilen, gülnar abletning tutulush we jan üzüsh sewebini qandaq texmin qilisiz?
Jawab: texmin emes, ehwalning éniq jeryanini uqtum. Gülnar ablet shinjang uniwérsitétining qanun fakultétini püttürgen iken, nahiyilik sotta xatiriligüchi (pütükchi) iken. Bultur 6-ayda bir sot échiliptu؛ sot ölüm jazasi bérilgen bir siyasiy mehbus üstidin iken. Sot jeryanida mehbusqa gep qilish pursiti bermigendin bashqa heddidin ziyade qattiq-qopal mu'amile qiptu؛ bu jeryanni qol téléfonigha chüshürüwalghan gülnar ablet sottiki bu körünüshni q q toridiki dostlar chembirikige yollap “Buninggha siler qandaq qaraysiler?” dep soraptu. Yeni siyasiy meqsetlik qilghanmu ish emes, peqet közi körgen heqsizlikke qarshi dostliri bilen pikirliship baqmaqchi. Bu körünüsh derhal tordin öchürülüptu we u tutqun qiliniptu؛ aridin 8 ay ötkende öre turghuchiliqi yoq halette a'ilisige qayturuluptu.

Gülnar abletning qolgha élinish we öltürülüsh jeryani heqqide resmiy da'iriler teripidin éniq melumatqa érishelmigen bolsaqmu, Uyghur rayonining omumi weziyiti we weqe heqqide tarqalghan gheyriy resmiy uchurlar, uning atalmish dölet mexpiyetlikini ashkarilash jinayiti bilen eyiblen'genliki we qamaqxanining nachar shara'iti we qéyin qistaqlar sewebidin jan üzgenliki éhtimalgha yéqin körülmekte.