Xotendiki saqchixanilar: "Taylandtin qayturup kélin'gen Uyghurlar délosi dölet mexpiyetliki hésablinidu"

Muxbirimiz qutlan
2016-01-13
Share
tayland-uyghur-musapir.jpg Taylandiki Uyghur musapirlar turuwatqan lagérdin körünüsh. 2014-Yili iyun.
gokbayrak.com

Ötken yili 7 - ayda xitay hökümiti taylandtin 109 neper Uyghurni mejburiy halda qayturup ketkendin kéyin hazirgha qeder ularning teqdiri heqqide héchqandaq uchur bermidi.

Radiyomiz ulardin ikki nepirining aqsuning awat nahiyesige élip kélinip téléwiziyede "Töwe" qildurulghanliqi heqqide uchur igiligen bolsimu, lékin qalghan yüz nechche Uyghur tutqunning hazirqi ehwali axbaratlardin yenila qarangghu turmaqta.

Ehwaldin xewerdar "Muqimliq" kadirlirining bildürüshiche, taylandtin tutup kélin'gen Uyghurlar aldi bilen ürümchige élip kélin'gen. Andin herqaysi nahiyelik saqchi idariliri ürümchidiki Uyghur aptonom rayonluq j x nazaritige mexsus saqchi ewetip özige tewe tutqunlarni yurtigha yalap élip kelgen iken.

Türk xewer agéntliqi aldinqi ayda xewer bérip, xitay hökümiti taylandtin mejburiy qayturup ketken 109 Uyghurning 45 nepirige sot échilip jaza höküm qilin'ghanliqini, ularning köp qismining aqsu, xoten we qeshqer wilayetliridin ikenlikini ilgiri sürgen idi.

Biz bügün xoten wilayitidiki birqanchilighan saqchixanilargha téléfon qilip, ularning bashqurush tewelikide taylandtin qayturup kélin'gen Uyghur tutqunlarning bar - yoqluqini sürüshtürduq.

Lop nahiyesining sanpula yéziliq saqchixanisi ziyaritimizni qobul qilghan bolsimu, lékin so'allirimizgha jawab bérishni ret qildi hemde "Bu ishtin xewirimiz yoq" dep turuwaldi.

Biz arqidin kériye nahiyesining kökyar yéziliq saqchixanisigha téléfon qilduq. Saqchixana xadimi bir qisim so'allirimizgha jawab bergen bolsimu, lékin taylandtin qayturulghan Uyghurlarning mesilisi bir mexpiyetlik ikenlikini, bu heqte saqchixana bashliqining ruxsitisiz özining héchnéme déyelmeydighanliqini bildürdi.

Biz yene guma nahiyesining piyalma yéziliq saqchixanisigha téléfon qilduq. Ziyaritimizni qobul qilghan saqchi xadimi taylandtin tutup kélin'gen Uyghurlar heqqide téléfon liniyesi arqiliq melumat bérelmeydighanliqini, bu heqte saqchixana bashliqliridin sorishimiz kéreklikini bildürdi.

Axirida biz guma nahiyesining mokoyla yéziliq saqchixanisigha téléfon qilduq. Saqchixana xadimi mokoyla teweside taylandtin qayturup kélin'gen Uyghurlarning yoqluqini, emma xitay ölkiliridin qayturup kélin'gen Uyghurlarning barliqini testiqlidi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet