Batur: "Xitay saqchiliri yurtumgha qaytip siyasiy öginishke qatnishishimni telep qildi"

Ixtiyariy muxbirimiz haji qutluq qadiri
2017-05-08
Share
terror-qarshi-uch-xil-oginish-pash-qilish.jpg Uyghur élining melum rayonidiki öginishke yighiwélin'ghan Uyghurlar.
ts.cn

Ötken qétim bizning ziyaritimizni qobul qilip, özining xitaygha tijaretke barghanda xitay jasusluq organliri teripidin Uyghurlar heqqide uchur bérishke qistalghan, ereb birleshme xelipilikide tijaret bilen shughulliniwatqan, hazir yaponiyede sayahette boluwatqan chet'el puqraliqidiki Uyghur tijaretchi batur bügün yene ziyaritimizni qobul qilip, özining xitay saqchiliri teripidin Uyghur éligha qaytip bérip, siyasiy öginishke qatnishishqa mejburlan'ghanliqini bayan qildi.

Batur sözide, xitay da'iriliri eger, chet'ellerde xizmet qiliwatqan Uyghurlarni we chet'ellerde oquwatqan Uyghur oqughuchilarni Uyghur éligha qayturup kélish üchün élip bériwatqan türlük qanunsiz heriketlirini toxtatmaydighan bolsa, buning aqibitining tolimu yaxshi bolmaydighanliqini ilgiri sürdi.

Batur ziyaritimiz jeryanida, xitay da'irilirining ürümchidiki uruq-tughqanlirigha türlük bésimlarni qilip, uning ürümchige tézrek qaytip kélip munasiwetlik orunlargha tizimgha aldurushi kéreklikini éytqanliqini bildürdi.

Igilishimizche, yéqindin buyan xitay da'iriliri yaponiyede oquwatqan qeshqer, xotendin kelgen Uyghur oqughuchilarning a'ilisige ularning tézrek yurtlirigha qaytip da'irilerge tizimgha aldurushi kérekliki toghrisida bésim qilghan. Buning bilen, tokyodiki Uyghur oqughuchilardin üch nepiri we shundaqla shirkette xizmet qiliwatqanlardin biri wetinige qaytqan bolup, ziyaritimizni qobul qilghan, hazir tokyoda yashawatqan yaponiye puqraliqidiki Uyghurlardin elqut bu heqte toxtaldi.

Biz elqutning uchurigha asasen, yaponiyedin Uyghur éligha bérip siyasiy öginishke qatniship kelgen we hazir tokyodiki melum bir shirkettin ayrilish resmiyiti ötep weten'ge qaytish aldida turghan, nam ‏- sheripini ashkarilashni xalimighan Uyghur qizigha téléfon qilip, bu heqte uchur igilimekchi bolghan bolsaqmu, biraq u qiz, bu heqte uchur bérishni ret qildi.

Melum bolushiche, yéqindin buyan misirda oquwatqan bir qisim Uyghur oqughuchilarmu mejburiy halda Uyghur éligha qaytqan idi.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.