Qeyseridiki höriyet meydanida “Sherqiy türkistan'gha erkinlik” mawzuluq körgezme échildi

Türkiyening eng chong ammiwi teshkilatliridin biri bolghan ülkü ojaqliri teshkilati arginjiq shöbisining uyushturushi bilen qeyserining eng chong merkezliridin biri bolghan höriyet meydanida “Heq, hoquq we adalet, sherqiy türkistan'gha erkinlik” mawzuluq resim körgezmisi échildi.

Körgezmige xitayning Uyghur diyarida yürgüzüwatqan bésim siyasiti, bolupmu diniy bésim siyasiti eks ettürülgen resimlerning sirtida, Uyghurlar toghrisida türkiyediki gézitlerde élan qilin'ghan xewer we maqaliler köpeytip qoyulghan. Körgezmining échilish murasimida söz qilghan ülkü ojaqliri teshkilati re'isi éli ipek bu körgezmini échishtiki meqsiti heqqide toxtilip mundaq dédi:
‏-Bügün dunyaning nurghun jaylirida qan aqmaqta. Qoshna dölet süriyede bowaqlar, bigunah ayallar öltürülmekte. Bular türk metbu'atlirida dawamliq halda orun almaqta. Epsuski, bizdin bekla uzaqta bolghan sherqiy türkistanda boluwatqan qirghinchiliq türk axbarat wasitiliride yéterlik shekilde orun almaywatidu. Téxi ikki-üch kün burunla qaghiliqning yilqichiqi yézisida 28 etrapida Uyghur öltürüldi. Biz bularni türk jama'etchilikige chüshendürüsh üchün bu körgezmini échip olturuptimiz.

U, köp sanda muxbirmu qatnashqan bu körgezmining yekshenbe künigiche ochuq bolidighanliqini bildürüp, pütün wetendashlarni ékskursiye qilishqa chaqirdi.

Biz körgezme toghrisida téximu köp melumat igilesh üchün “Sherqiy türkistan'gha erkinlik” mawzuluq körgezmining échilish murasimigha dunya Uyghur qurultiyi mu'awin re'isi séyit tümtürk ependi bilen birlikte qatnashqan abdulqadir tümtürk ependige mikrofonimizni uzattuq.

Abduqadir ependi sözide nöwette türkiyede Uyghurlarni we Uyghurlar uchrawatqan zulumlarni tonutush pa'aliyetlirining barghanche köpiyip, bu xil weziyetning türk xelqi arisida türkiye hökümitini Uyghurlar mesilisige köngül bölüshke ündeydighan weziyet shekillendürüp,türk hökümitige bésim élip kéliwatqanliqini ilgiri sürdi.

Abduqadir ependi yene, türk hökümitining Uyghur mesilisige qaratqan siyasitide saqliniwatqan mesililer heqqidimu toxtilip, hökümet emeldarlirining Uyghurlarni qollashta aktip pozitsiye bildürmigenlikini tenqidlidi.

Yuqiridiki awaz arqiliq, erkin tarimning abduqadir tümtürük ependi bilen élip barghan söhbitining tepsilatini anglighaysiler.