Қәһриманмараш хәлқи уйғур қериндашлирини унтумиди

Ихтиярий мухбиримиз әркин тарим
2015-03-02
Share
qehrimanmarash-shehri-yighin.jpg Қәһриманмараш шәһиридә ечилған “унтулмиған вәтән шәрқий түркистан” темисидики доклат бериш йиғинидин көрүнүш. 2015-Йили 27-феврал, түркийә.
RFA/Erkin Tarim

27-Феврал күни түркийәниң шәрқий җәнубий райониға җайлашқан қәһриманмараш вилайитиниң мәркизи қәһриманмараш шәһиридә “унтулмиған вәтән шәрқий түркистан” темисида доклат бериш йиғини чақирилди.

Қәһриманмараштики әң чоң вә әң актип аммиви тәшкилатлардин бири болған мәрдан әхлақ күлтүр вә муһит җәмийити тәрипидин уюштурулған йиғинда д уқ муавин рәиси, түркийәниң қәйсәри шәһиридә паалийәт елип бериватқан шәрқий түркистан мәдәнийәт вә һәмкарлиқ тәшкилатиниң рәиси сейит түмтүрк әпәнди доклат бәрди.

Доклат бериш йиғинида мәрдан әхлақ күлтүр вә муһит җәмийитиниң рәиси адвокат тимур борахан әпәнди ечилиш нутқи сөзлиди. У, нутқида дуняниң йөнилишини парлақ бир келәчәккә бураш үчүн бир йүрүш паалийәтләрни елип бериватқанлиқини, бу арқилиқ дунядики мәсилиләргә қарита тоғра тәһлил елип берип тоғра чүшинип бу мәсилиләргә болған сәзгүрлүкни күчәйтишкә тиришиватқанлиқини, қәһриманмараш хәлқигә шәрқий түркистан трагедийәсини аңлитиш үчүн бу йиғинни чақирғанлиқини баян қилип өтти.

Арқидин дуня уйғур қурултийи муавин башлиқи сейит түмтүрк әпәнди доклат бәрди. У, бир йерим саәт давамлашқан доклатида, өз тәқдиригә ташливетилгән шәрқий түркистанниң йеқиндин бери түркийәниң күнтәртипигә келишкә башлиғанлиқини, түрк хәлқиниң уйғур қериндашлириға техиму көп игә чиқиши керәкликини баян қилип өтти. У, доклатида уйғурларниң тарихи, тили, әдәбияти, иқтисадий вә сиясий вәзийити тоғрисида мәлумат бәргәндин кейин, нуқтилиқ һалда кейинки айларда хитайниң уйғурларға елип бериватқан әқилгә сиғмайдиған динни чәкләш сиясити тоғрисида мәлумат бәрди.

Сейит түмтүрк әпәнди уйғурларниң түркийәдин күткән 8 маддилиқ тәлипи барлиқини оттуриға қоюп, бу тәләпләрни мундақ ихчамлиди.

  1. Түркийә җумһурийити түрк иш бирлики вә тәрәққият идариси шәрқий түркистанда иш беҗириш орни ачсун.
  2. Түркийә хитайниң диний чәклимилирини әмәлдин қалдуруш үчүн бесим ишләтсун.
  3. Түркийә билән болған тиҗарәт мунасивәт күчәйтилсун.
  4. Түркийәгә келидиған уйғурлардин виза тәләп қилинмисун.
  5. Шәрқий түркистан билән түркийәдики университетлар оттурисида иш бирлики мунасивити орнитилсун.
  6. Түрк һава йоллири ширкәтлири үрүмчи вә қәшқәргә айропилан қатнашни йолға қойсун.
  7. Түркийә дөлити түркийәдә паалийәт елип бериватқан шәрқий түркистан аммиви тәшкилатлириға ярдәм бәрсун.
  8. Түрк хәвәр агентлиқлири үрүмчидә ишхана ачсун.

27-Феврал күни түркийәниң шәрқий җәнубиға җайлашқан қәһриманмараш шәһиридә өткүзүлгән “унтулмиған вәтән шәрқий түркистан” темисидики доклат бериш йиғиниға қәһриманмараш вилайитидики аммиви тәшкилат мәсуллири вә әзалири, һәрқайси сиясий партийәләрниң мәзкур вилайәттики шөбилириниң мәсуллири, парламент әза намзатлири, сүтчи имам университетиниң оқутқучи-оқуғучилиридин болуп 300 әтрапида киши қатнашти. Доклат бериш йиғини, сүтчи имам университети мудири профессор дурмуш дәвәҗи әпәндиниң сейит түмтүрк әпәндигә соғат буюмлири тәқдим қилиши билән ахирлашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт