“Islam hemkarliq teshkilati” xadimi istanbuldiki Uyghur jem'iyitide boldi

Ixtiyariy muxbirimiz arslan
2015-12-08
Share
ibrahim-altan-uyghur-mesilisi-305.jpg Islam hemkarliq teshkilati insanperwerlik pa'aliyetler bölümining türkiye wekili doktor ibrahim altan sherqiy türkistan ma'arip we hemkarliq jem'iyitining re'isi hidayetullah oghuzxan qatarliq jem'iyet rehberliri bilen söhbette. 2015-Yili 5-dékabir, istanbul.
RFA/Arslan

5-Dékabir shenbe küni “Islam hemkarliq teshkilati” insanperwerlik pa'aliyetler bölümining türkiye wekili doktor ibrahim altan “Sherqiy türkistan ma'arip we hemkarliq jem'iyiti” ni ziyaret qildi. Doktor ibrahim altanni “Sherqiy türkistan ma'arip we hemkarliq jem'iyiti” re'isi hidayetullah oghuzxan qatarliq jem'iyet rehberliri qizghin kütüwaldi.

Ziyaret waqti aldin pilanlan'ghan bolup, ziyarette ikki terep Uyghurlar toghrisida söhbet élip bardi. Hidayetullah oghuzxan aldi bilen Uyghurlarning hazirqi ehwali toghrisida doklat berdi we Uyghurlargha alaqidar hel qilishqa tégishlik bir qisim mesililer toghrisida telep we teklip sundi. Ikki terep Uyghur mesilisini chet'ellerde küntertipke keltürüsh üchün némiler qilish kérekliki toghrisida pikir almashturdi.

Biz bu heqte téximu köp melumatqa ige bolush üchün, hidayetullah oghuzxan bilen söhbet élip barduq.

Hidayetullah oghuzxanning bildürüshiche, doktor ibrahim altan “Islam hemkarliq teshkilati” insanperwerlik bölümining türkiyediki resmiy wekili bolup, bu kishi dunyadiki az sanliq musulmanlar toghrisida mezkur teshkilat üchün tetqiqat we doklat hazirlap teqdim qilidiken.

Ibrahim altan eslide ilgiri türkiyediki déngiz feneri jem'iyitining bash katipi bolup xizmet qilghan hemde Uyghurlargha yéqindin köngül bölüp kéliwatqan bir tetqiqatchi iken. Islam dunyasidiki eng chong xelq'araliq teshkilatlarning biri dep qarilidighan “Islam hemkarliq teshkilati” 1963-yili qurulghan xelq'araliq teshkilat bolup, hazirghiche bu teshkilatqa eza döletlerning sani 57 ge yetken.

Bu teshkilat 2009‏-yili “5‏-Iyul ürümchi qirghinchiliqi” yüz bergende teshkilatqa eza döletlerni jiddiy toplap yighin achqan we xitay bilen bu heqte uchriship söhbet élip barghan. Netijide bu teshkilat ürümchige bir hey'et ewetip weqe heqqide tekshürüsh élip barghan idi.

Bu heqtiki söhbitimizning tepsilatini yuqiridiki awazliq ulinishtin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet