Jang wéygo: béyjingning Uyghur siyasiti tuyuq yolgha kirip qaldi

Muxbirimiz erkin
2014-06-07
Élxet
Pikir
Share
Print
Xelq baghchisi yénidiki awat bazarda bomba bilen hujum qilish weqesi yüz bergen. 2014-Yili 22-may, ürümchi.
Xelq baghchisi yénidiki awat bazarda bomba bilen hujum qilish weqesi yüz bergen. 2014-Yili 22-may, ürümchi.
weibo

3-Iyun, Uyghur aptonom rayonluq partkom sékrétari jang chünshyen "Shinjang xizmet yighini" ning qararlirini "Muhim tarixiy ehmiyetke ige" dep körsitip, uning Uyghur iligha zor we chongqur tesir körsitidighanliqini tekitligen bolsimu, bezi xitay analizchilirining qarishiche, mezkur yighinning qararlirida héchqandaq yéngiliq yoq, béyjingning Uyghur siyasiti tuyuq yolgha kirip qalghan.

28-May chaqirilghan 2-qétimliq "Shinjang xizmet yighini" da "Qosh tilliq" ma'aripni kücheytish, qarshiliq heriketlirini, musteqilliq pikri we musteqil diniy qarashlarni qattiq basturush, torni qattiq kontrol qilish qatarliqlar tekitlinip, heqsiz toluq orta ma'aripini yolgha qoyush, Uyghurlarni ichkiri ölkilerde ishqa orunlashturush qatarliq talash-tartishtiki qararlarni chiqarghan idi.

Jang wéygo ependi, Uyghur weziyitini yéqindin közitip kéliwatqan xitay weziyet analizchilirining biri. Uning körsitishiche, Uyghur ilining hazirqi weziyiti xitay kompartiyesining ötken qétimliq "Shinjang xizmet yighini" da chiqarghan qararlirining xata ikenlikini ispatlap bergen. U, xitay kompartiyesi bu qétimqi yighinda özining "Shinjang siyasiti" ni toghra, dep mu'eyyenleshtürgen bolsimu, biraq uning Uyghurlar heqqide xata qarar chiqiripla qalmay, Uyghur weziyetni xata mölcherligenlikini bildürdi.

Jang wéygo: junggo kompartiyesi shinjang we shinjangni öz ichige alghan az sanliq milletler mesiliside xalta kochigha kirip qaldi. Siz siyasiy byuroning ötken qétimliq shinjang xizmet yighini bilen bu qétimliq yighinining ariliqi nahayiti yéqin ikenlikini körüwalalaysiz. Emeliyet ularning ötken qétimliq yighinining qararliri we perezlirining intayin xata ikenliki ispatlandi. Ular ötken qétimliq yighinda hazirqidek weziyetke duch kélidighanliqini oylimighan. Bu qétimqi yighindin sel burun, shi jinping siyasiy byuroning bir qanche ezasi we da'imiy ezalirini egeshtürüp, shinjangda tekshürüsh élip barghan. Oxshashla u, shinjangda otturigha chiqqan hazirqi weziyet we ziddiyetni oylimidi we hel qilmidi. Halbuki, biz körüwatqan ré'alliq shu, junggo kompartiyesi özining qararlirini toghra we mutleq, dep qarawatqan bu ehwalda, shinjangning emili weziyiti barghanséri ötkürleshti, barghanséri murekkepleshti we qiyinlashti.

Riyasetchi: xitay kompartiyesining qollan'ghan "Térrorluqqa" qarshi turush tedbirliri kontrolluqni yoqitip qoydimu-qandaq?

Jang wéygo: bu kontrolluqni yuqup qoyushla mesilisi emes. Uningda eng eqelliy tepekkur, höküm qilish iqtidari kem. Uning özi, herikiti, siyasiti, bu éghir aqiwetni keltürüp chiqarghan bolsimu, biraq u bu xataliqni tüzitishke, yéngi we heqiqiy hel qilish charisi tüzüp chiqishqa amalsiz. Peqet u dawamliq özining burunqi yolida méngip, mangghanséri toghra yoldin yiraqlashti, yiraqlashqanséri xataliq zoraydi. Netijide, ziddiyet téximu ötkürliship ketti. Mana bu hazirqi ehwal.

Toluq bet