Erzdar: "Zorawanliq yoligha mejburlandim, lékin mangmidim"

Muxbirimiz shöhret hoshur
2015-02-10
Élxet
Pikir
Share
Print
Erzdar ömer rozi dadisi bilen. (Waqti we orni éniq emes)
Erzdar ömer rozi dadisi bilen. (Waqti we orni éniq emes)
RFA/Shöhret Hoshur

Yopurgha bay'awatliq erzdar ömer rozi, özining 3 yildin buyan da'iriler teripidin zorawanliq yoligha wasitilik halda mejburlan'ghanliqini, lékin u yolgha mangmighanliqini ilgiri sürdi. Uning qarishiche, u béyjingdiki mezgilide da'iriler uning öyige bésip kirip késelchan dadisigha til salghan we dadisining qan bésimi örlep ölüshige seweb bolghan. Yene uning bayan qilishiche, u yurtidiki mezgilde yézining bir saqchi xadimi uni tigh kötürüp saqchixanigha kélishke we saqchixanining derwazisini chéqishqa dewet qilghan we shundila uning erzining toluq we téz hel bolidighanliqini ésigha salghan. U özige mesxire teleppuzida déyilgen yuqiriqi söz we dadisining ziyankeshlikke uchrishini, özini chongraq bir ish chiqirishqa qutritish dep qaraydighanliqini bildürdi. Ömer rozining qarishiche, töwendiki da'iriler mesilini chongaytip uni qanuniy jehettin téz we keskin bir terep qilishqa urun'ghan.

Erzdar ömer rozi aldinqi yili béyjingdiki mezgilide, yerlik da'iriler uni dawadin waz kechtürüsh üchün uning késelchan dadisigha bésim ishletken. Ejeblinerliki, uning dadisining kompartiye ezaliq salahiyiti, uninggha imtiyaz ata qilghan emes, eksiche uning gunahkarliq derijisining éshishigha seweb bolghan.

Dewager ömer rozi tartiwélin'ghan salahiyet kinishkisini qayturuwélish üchün, saqchixanigha barghinida, kütülmigen bir jawabqa érishken, nöwetchi xadim, uninggha salahiyet kinishkisini bérelmeydighanliqini éytish bilen birlikte, eger tigh kötürüp kélip, saqchixana derwazisini chaqsa, hemme ishning tengla hel bolidighanliqini éytqan.

Yéqinqi yillardin béri, xitay terep Uyghur élida ulghiyiwatqan milliy qarshiliq heriketlirini zorawanliq we térrorluq herikiti dep eyiblimekte, emma musteqil közetküchiler zorawanliq yolining Uyghurlarning özliri talliwalghan emes, belki mejburlan'ghan yol ikenlikini tekitlimekte. Yeni közetküchilerning qarishiche, xitayning siyasitidiki adaletsizlik we yerlik emeldarlarning bu siyasetlerni ijra qilish dawamidiki zorawanliqliri, Uyghur milliy qarshiliq heriketlerning zorluq sheklide dawam qilishigha türtke bolghan. Yopurgha bay'awatliq erzdar ömer rozining yuqiriqi kechmishi, közetküchilerning mezkur pikrining asassiz emeslikini ispatlimaqta.

Toluq bet