Uyghur wekilliri "Türk medeniyet merkizi" de Uyghurlar heqqide doklat berdi

Ixtiyariy muxbirimiz ekrem
2016-01-27
Élxet
Pikir
Share
Print
"Türk medeniyet merkizi" diki Uyghurlar toghriliq doklat bérish pa'aliyitidin körünüsh. 2016-Yili 24-yanwar, myunxén.
"Türk medeniyet merkizi" diki Uyghurlar toghriliq doklat bérish pa'aliyitidin körünüsh. 2016-Yili 24-yanwar, myunxén.
RFA/Ekrem

Yéqinqi yillardin buyan yawropadiki türk jama'itining Uyghurlar mesilisige bolghan qiziqishi hem hésdashliqi küchiyip barmaqta.

24-Yanwar küni d u q diniy ishlar komitéti mudiri turghunjan alawudunhajim bashliq Uyghur wekilliri gérmaniyening myunxén shehiridiki "Türk medeniyet merkizi" de teklipke bina'en Uyghurlar toghriliq doklat bergen. Pa'aliyet 4 sa'et dawamlashqan bolup, köp sandiki türk jama'iti bu qétimqi doklatni qiziqish bilen anglighan.

Turghunjan alawudunhajimning bergen melumatigha asaslan'ghanda, "Türk medeniyet merkizi" xizmet binasida uyushturulghan mezkur pa'aliyet Uyghur polusida ghizalinish bilen bashlan'ghan. Myunxén sheher merkizidiki "Teklimakan Uyghur réstorani" ning Uyghur ashpizi xemit ependi türk teshkilati jama'itining iltimasigha bina'en ulargha aldi bilen Uyghurche polu étip bergen. Ta'am lezzitidin huzurlan'ghan türk jama'iti köp minnetdar bolghan we Uyghur ta'am medeniyitige yuqiri baha bergen.

Turghunjanhajimning éytishiche, "Türk medeniyet merkizi" ning bundaq bir pa'aliyetni teshkillishidiki meqsiti, Uyghurlar mesilisini téximu ichkirilep chüshinish we Uyghurlargha bolghan qollashlirini kücheytish üchün iken. U bu heqte ziyaritimizni qobul qilghanda, aldi bilen bu qétimqi pa'aliyetning asasiy mezmuni we jeryani toghriliq uchur bérip ötti. Turghunjanhajim yene özining Uyghur weziyiti heqqide bergen doklati üstide toxtaldi.

Bu qétimqi pa'aliyetke yene myunxén shehiride yashaydighan Uyghur ziyaliysi hilalidin ependimu qatnashqan. U bu qétimqi Uyghurlar toghrisida doklat bérish pa'aliyitining türk jama'itide yaxshi tesir peyda qilghanliqini tekitlidi. Turghunjanhajim sözide, bu qétimqi doklat bérish pa'aliyiti xatimiside türk jama'itining Uyghurlar we ulargha qandaq yardem béreleydighanliqi heqqide so'allar sorighanliqini we tégishlik jawablar bergenlikini eskertti.

Toluq bet