Wakaletsiz milletler teshkilati myunxéndiki bawariye parlaméntida muhakime yighini ötküzdi

Wakaletsiz milletler teshkilatining yighinida wakaletsiz milletler teshkilatining qurghuchisi we sabiq re'isi erkin aliptékin ependi söz qildi. 2014-Yili 27-iyun, myunxén.

Wakaletsiz milletler teshkilatining 27-iyun küni bawariye parlaméntida ötküzülgen “Milliy, diniy we til jehettiki azsanliqlar dunya siyasiy jughrapiye shahmat taxtisidiki pichkimu?” namliq yighini d u q, bawariye yéshillar partiyisi, tibet herikiti teshkilati qatarliq teshkilatlarning sahibxaniliqida ötküzüldi. Yighin'gha qatnashqan mutexessisler Uyghurlar we tibetlikler mesilisi üstide muhakimiler élip bérish bilen birge yene, qirim tatarlirigha oxshash nopusi intayin az bolghan bezi milletlerning kelgüsi üstidimu toxtilip ötüshti.

Yighin muqeddimiside, yéshillar partiyisining bawariye parlaméntidiki wekili margarita xanim, wakaletsiz milletler teshkilatining re'isi mari'o basduxén ependi we d u q ijra'iye komitéti re'isi dolqun eysa ependiler söz élip, xitayni mewjut siyasetliri tüpeyli qattiq eyiblidi.

Yighinda wakaletsiz milletler teshkilatining re'isi mari'o ependi dunya siyasiyonliri we hoquqdarlirining Uyghurlar kebi ajiz milletler mesilisige sel qarighanliqi tüpeyli xitay zulumining barghanséri heddidin éshiwatqanliqini otturigha qoyghan bolsa, bashqa mutexessisler kishilik hoquqning milliy menpe'etler aldida qurban qiliniwatqanliqini tilgha éliship, hakimiyet béshidikilerni agahlandurushti. Yene bezi mutexessisler bolsa, Uyghur, tibet qatarliq milletler mesilisining siyasiy jughrapiyilik arqa körünüshi hemde ularning yetmekchi bolghan meqsiti we bu meqsetni dunyagha zaman kötüridighan til bilen chüshendürüsh qatarliq mesililerni otturigha qoyushti.

Wakaletsiz milletler teshkilatining qurghuchisi we sabiq re'isi erkin aliptékin ependi yighinda Uyghurlarning kechmishi, hazirqi weziyiti we xitay siyasiti heqqide toxtilip ötti. U bu qétimqi yighin munasiwiti bilen ziyaritimizni qobul qilghanda, yighinning netijilik ötüwatqanliqini tilgha aldi. Yighin'gha ishtirak qilghan rahile xanim bu yighindin köp bilimlerge érishkenlikini eskertti. Yighin qatnashquchisi abduweli ependi bolsa, dunya siyasetchiliridin Uyghurlarning kütidighan tileklirini tekitlidi. D u q yawropa parlaméntidiki wekili, yawropa sherqiy türkistan birliki teshkilati re'isi enwerjan ependimu bu qétimqi muhakime yighinigha yuqiri baha berdi.

Wakaletsiz milletler teshkilatining 27-iyun küni bawariye parlaméntida ötküzülgen “Milliy, diniy we til jehettiki azsanliqlar dunya siyasiy jughrapiye shahmat taxtisidiki pichkimu?” namliq yighinidin kéyin, özlirining ichki yighinliri d u q xizmet binasida bashlandi.