Amérika türk teshkilatlar birliki nyu-yorkta Uyghurlarni qollap namayish élip bardi

Muxbirimiz gülchéhre
2018-07-09
Élxet
Pikir
Share
Print
Amérikidiki türk teshkilatlar birliki "5-Iyul ürümchi weqesi" ning 9 yilliq xatirisi munasiwiti bilen xitaygha qarshi qilghan namayishida kötürgen lozunkisi. 2018-Yili 7-iyul, nyu-york.
Amérikidiki türk teshkilatlar birliki "5-Iyul ürümchi weqesi" ning 9 yilliq xatirisi munasiwiti bilen xitaygha qarshi qilghan namayishida kötürgen lozunkisi. 2018-Yili 7-iyul, nyu-york.
Social Media

Amérikida pa'aliyet élip bériwatqan "Türk teshkilatlar birliki" ge eza, "Yash türkler", "Ay yultuz", "Amérika türkistan jem'iyiti" qatarliq jem'iyetlerning orunlashturushi bilen 7-iyul shenbe küni, xitayning birleshken döletler teshkilatidiki wekili turushluq bina aldida, "5-Iyul ürümchi qirghinchiliqini xatirilesh" namida mexsus namayish élip bérildi. Bu namayishqa nyu-york shtati we uning etrapida yashaydighan türkler, Uyghurlar, qazaqlar, qirghizlar we türkmenlerdin 30din artuq kishi qanashti.

Ay yultuzluq qizil we kök bayraqlarni kötürgen namayishchilaning Uyghurlarni qollap ötküzgen bu namayishi "Fashist xitay sherqiy türkstandin chiqip ketsun", "Uyghurlargha erkinlik", "Xitay lagérlarni taqisun", "Uyghurlargha qaritilghan qirghinchiliq qilishni toxtatsun" dégendek sho'arlar bilen, nyu-york waqti sa'et 4 tin 5 kéche bir sa'et dawam qildi. Ular axirida xitaygha bolghan naraziliq mektupini xitayning birleshken döletler teshkilatida turushluq wekillik ornigha tapshurdi.

Namayish teshkilligüchisi, türk teshkilatlar birlikining re'isi tulga tékman ependi namayish meydanida bayanat bérip, "Xitayning toqquz yil awwal 5-iyul ürümchide élip barghan qirghinchiliqi, 1949-yili xitay kommunist hökümiti sherqiy türkistanni bésiwalghandin kéyinki Uyghurlargha élip barghan bir qétimliq zor qirghinchiliq hésablinidighanliqi" ni, türk qérindashlar bu meydan'gha yighilip xitay hakimiyitini küchlük eyibleydighanliqini bildürdi.

Namayishni uyushturushta hemkarlashqan ay yultuz teshkilatining re'isi bu'ent ependi namayish meydanida "Türkiye döliti xitayning Uyghurlargha élip bériwatqan zulumigha sükütte turmaqta, hetta xitay bilen hemkarliq ornatmaqta, öz millitini satqan türk hökümitini eyibleymiz" dep bayanat berdi.

Namayishqa qazaqistan bayriqini kötürüp ishtirak qilghan bir qazaq yigiti, xitay hakimiyitining Uyghur, qazaq qatarliq türkiy tilliq milletlerge élip bériwatqan zulum siyasetlirini toxtitish üchün, barliq türkiy milletlerni, musulmanlarni birlikte xitaygha naraziliq bildürüshke chaqiridighanliqini éytti.
Mezkur namayishqa ishtirak qilghan Uyghurlardin doktor memtimin ependi, namayishtin kéyin téléfon ziyaritimizni qobul qilip, Uyghurlardinmu namayishqa 10 kishining qatnashqanliqi we türk qérindashlarning öz ara bir birini qollishini muhim dep qaraydighanliqini bildürdi.

Namayish teshkilligüchisi, türk teshkilatlar birlikining re'isi tulga tékman ependi ziyaritimizni qobul qilip, özining dunya Uyghur qurultiyi we amérika Uyghur birleshmisi uyushturghan namayish we bashqa pa'aliyetlirige izchil qatniship, Uyghurlarni qollap kéliwatqanliqini bildürdi we teshkilat qurulghan 26 yildin buyan türk jem'iyetliri bilen hemkarliq ornitip öz-ara qollap kéliwatqanliqini bayan qildi. U yene öz teshkilatining "Uyghurlardek yardemsiz qalghan qérindashlirigha ige chiqish we ularni qoghdashni shereplik burchimiz we mes'uliyitimiz" dep bilidighanliqini tekitlidi.

Tulga ependining chüshendürüshiche, amérikidiki türk teshkilatlar birliki 9 yildin buyan 5-iyul weqesini xatirilep kelmekte iken shundaqla, ular yéqindin buyan dunya Uyghur qurultiyi we amérika Uyghur birleshmisi bilen hemkarliship, her qaysi dölet elchixanilirigha xitayning Uyghurlarni lagérlargha qamishigha bolghan eyiblesh xetlirini yollighan.

Tulga ependi bu qétimliq namayishni uyushturushtiki meqsitini bildürüp: "Biz bu namayishimiz arqiliq xitayni eyiblesh bilen birge Uyghurlargha ularning yalghuz emeslikini bildürmekchi shundaqla biz awazimiz arqiliq amérikini, birleshken döletler teshkilatini, türkiyeni hetta pütün türk dunyasini, musulman dunyasini éziliwatqan Uyghur xelqining razigha qulaq sélishqa, xitayning Uyghur türklirige élip bériwatqan qirghinchiliq we assimilyatsiye, medeniyet qirghinchiliqini toxtitishqa heriket qilishqa chaqirimiz. Chünki, xitayning Uyghurlardek türk medeniyitining asasini yaratquchi bu milletke élip bériliwatqan bu yoqitish herikitini pütün türkiy xelqlerge, pütün insaniyet medeniyitige élip bériliwatqan qirghinchiliq dep chüshinish kérek" dédi.

Toluq bet