Ispaniyede ilham toxti we Uyghurlar weziyiti heqqide anglitish pa'aliyiti ötküzülgen

Ixtiyariy muxbirimiz erkin tarim
2017-10-26
Élxet
Pikir
Share
Print
Mayorka shehirining bashliqi(soldin birinchi) yighin mezgilide "Ilham toxti guruppisi" bilen "Xelq'ara kechürüm teshkilati" ning shöbe mes'ullirini qobul qilghan. 2017-Yili 25-öktebir, ispaniye.
Mayorka shehirining bashliqi(soldin birinchi) yighin mezgilide "Ilham toxti guruppisi" bilen "Xelq'ara kechürüm teshkilati" ning shöbe mes'ullirini qobul qilghan. 2017-Yili 25-öktebir, ispaniye.
RFA/Erkin Tarim

25-Öktebir küni ispaniyening mayorka shehiride ilham toxti toghrisida yighin chaqirilghan. Yighinda türmidiki Uyghur ziyaliysi ilham toxti we Uyghurlarning nöwettiki weziyiti heqqide tonushturush élip bérilghan.

Yighin'gha uniwérsitétning oqutquchi we oqughuchiliri, kishilik hoquq pa'aliyetchiliri we jama'et erbabliridin bolup yüzdin artuq kishi ishtirak qilghan. Bu yighinda Uyghurlar témisida bir qanche kitabi neshr qilin'ghan gérmaniyelik yazghuchi inigrid xanim, "Ilham toxti guruppisi" ning re'isi enwerjan ependi we mu'awin re'isi mariye holzman xanim qatarliqlar Uyghurlar we ilham toxti toghrisida mexsus doklat bergen.

Enwer jan ependi ziyaritimizni qobul qilip, mezkur yighinda in'grid xanimning Uyghurlarning tarixi we siyasiy mesililiri shundaqla hazirqi ehwali toghrisida, mariye holzman xanimning bolsa shi jinping dewride Uyghurlarning kishilik hoquqining künsayin nacharlishiwatqanliqi toghrisida doklat bergenlikini bildürdi.

Enwerjan ependi özi bilen yene bir diplomatning Uyghurlarning hazirqi weziyiti we xitayning "Bir belwagh, bir yol" qurulushi toghrisida doklat bergenlikini bayan qildi.

Mayorka ispaniyening aral shehiri bolup, mayorka shehirining bashliqi yighin mezgilide "Ilham toxti guruppisi" bilen "Xelq'ara kechürüm teshkilati" ning shöbe mes'ullirini qobul qilghan, ilham toxti we Uyghurlarning hazirqi weziyiti toghrisida melumat igiligen. Uchrishishta "Ilham toxti guruppisi" ning mes'ulliri mayorka shehirining bashliqigha bezi teleplerni otturigha qoyghan. Enwer jan ependi bu heqte melumat berdi.

"Ilham toxti guruppisi" ning mu'awin re'isi mariye holzman xanim bu qétimqi pa'aliyette özini eng köp tesirlendürgen hadisining mayorka shehirining ilham toxtigha qiziqishi, mayorka shehirini dunya kishilik hoquq kürishining merkizi qilip qurup chiqishqa tirishiwatqanliqi ikenlikini tilgha aldi. U mundaq dédi: "Bu pa'aliyitimizning eng muweppeqiyetlik teripi bügün etigen mayorka shehirining bashliqi bilen körüshkinimiz boldi. Bek yaxshi adem iken. U bizning ilham toxti heqqide bergen melumatlirimizni qiziqip anglidi. U, mayorka shehirini dunya kishilik hoquq kürishining merkizi qilip qurup chiqishqa tirishiwétiptu. U, yéqinda mayorka shehirining merkizige kishilik hoquq xatire téshi tikleydiken. Bu peqetla ilham toxti üchün emes, pütün dunyadiki kishilik hoquq depsendichilikining ziyankeshlikige uchrighanlarni xatirilesh üchün salidiken."

Ilham toxti toghrisidiki yighinni uyushturghan "Xelq'ara kechürüm teshkilati" mayorka shöbisining mes'uli antoni'o karlos ependi ziyaritimizni qobul qilip, ilham toxti mesilisini mayorka xelqige tonutush üchün bu yighinni achqanliqini hemde bu meqsetke yetkenlikini bayan qildi.

Ilham toxti guruppisi 2016-yili 4-ayda dunya Uyghur qurultiyining bérlinda chaqirilghan resmiy yighinida qurulghan bolup, hazirghiche yawropa parlaméntida ikki qétim, bawariye parlaméntida bir qétim xelq'araliq mexsus yighin ötküzgen. Ular yéqinda ilham toxtini nobél tinchliq mukapatigha namzat körsitish pa'aliyiti bashlighan iken.

Toluq bet