Türkiyening üch shehiride arqa-arqidin Uyghur mesilisi anglitildi

Ixtiyariy muxbirimiz erkin tarim
2015-12-01
Share
seyit-tumturk-mektep-doklat.jpg D u q mu'awin re'isi séyit tümtürk qeyseri shehiridiki qeyseri toluq ottura mektipide oqutquchi we oqughuchilargha Uyghurlargha doklat bermekte. 2015-Yili 26-noyabir, türkiye.
RFA/Erkin Tarim

Uyghur mesilisi arqa-arqidin 3 sheherde doklat bérish yighinida anglitildi. 11-Ayning 26-küni türkiyening qeyseri shehiridiki qeyseri toluq ottura mektipide oqutquchi we oqughuchilargha Uyghurlar anglitildi. “Sherqiy türkistanning ötmüshi we bügüni” mawzuluq yighinda dunya Uyghur qurultiyi mu'awin re'isi séyit tümtürk doklat berdi, Uyghurlarning qisqiche tarixi anglitilghandin kéyin, nuqtiliq halda bügünki weziyiti, xitay hökümitining bésim siyasiti, Uyghurlar duchar boluwatqan insaniy heq we hoquq depsendichilikliri anglitilghan bu yighin'gha oqutquchi, oqughuchilardin bolup 500 etrapida kishi qatnashqan. Bu toluq ottura mektep osmanli impériyesi mezgilide qurulghan qedimiy tarixqa ige mektep bolup, türkiyening sabiq dölet re'isliridin turghut özal, abdulla gülge oxshash meshhur zatlar bu mektepni püttürgen.

28-Noyabir küni séyit tümtürk ependi türkiyening qoja'eli wilayitide “Islam we sherqiy türkistan” témisida doklat berdi. Qoja'eli ilim, kültür we sen'et uyushmisi teripidin uyushturulghan doklat bérish yighini aliy ependi yighin zalida axsham sa'et yettidin on'ghiche dawamlashti. Bu doklat bérish yighinigha qoja'eli shehirining bashliqi ibrahim qara'osmanoghlimu qatnashqan.

Etisi küni yeni 29-noyabir küni séyit tümtürk ependi istanbulda chaqirilghan 1-nöwetlik qarapapaq türkliri qurultiyigha qatnashti. Köp sanda siyasetchi, sabiq medeniyet ministiri yalchin topchu, parlamént ezaliri we türkiy milletliri wekilliri qatnashqan qurultayda d u q mu'awin re'isi séyit tümtürk ependige türk dunyasi xizmet mukapati bérilgen.

Qarapapaqlar giruziyede yashaydighan oghuzlardin bolup, türkiyedimu köp sanda qarapapaq bar iken. Bu qurultayda tonulghan téléwiziye programchisi seypullah türksoy ependi qurultayning re'islikige saylan'ghan.

Biz bu pa'aliyetler toghrisida tepsiliy melumat igilesh üchün bu pa'aliyetlerge qatnashqan séyit tümtürk ependi bilen téléfon söhbiti élip barduq.

U, ötken yil 7-aydin kéyin türkiyediki weziyetning jiddiylishishige egiship Uyghur mesilisining türkiye jama'etchilikining küntertipidin chüshüp qalghanliqini, hazir asta-asta Uyghur mesilisining qaytidin türkiyening küntertipige kélishke bashlighanliqini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet