Adana shehiri taylandiki “Türk” musapirlargha quchaq achidighanliqini jakarlidi

Ixtiyariy muxbirimiz arslan
2014.12.03
Share on WhatsApp
Share on WhatsApp
Adana-300-Uyghur-mehmet-eli-arslan.jpg Adana sheherlik hökümet yashlar we tenterbiye idarisining bashliqi mehmet éli arslan ependi Uyghurlar toghrisida sözde. 2014-Yili 2-dékabir, türkiye.
RFA/Arslan

Türkiyening adana shehiri taylandta tutulup qalghan 300 neper Uyghurni adana shehirige qobul qilidighanliqini bildürdi. Bu bir türküm kishiler bu yil marttin bashlap taylandiki musapirla lagérlirida turuwatqan bolup, ular ta hazighiche özlirini “Türk” dep atap kelmekte.

2014 - Yili 12 - ayning 2 - küni adana sheherlik hökümet teripidin mejlis yighin zalida mexsus Uyghurlar toghrisida axbarat élan qilish yighini ötküzüldi.

Bu axbarat élan qilish yighinida söz qilghan adana yashlar we tenterbiye idarisining bashliqi mehmet éli arslan ependi taylandtiki Uyghurlar toghrisida toxtilip mundaq dédi: hemmimizge melum bolghandek, 300 neper sherqiy türkistanliq irqdashimiz, xitayning bésim we zulumigha chidiyalmay bir yil ilgiri öy - makan we yurtlirini tashlap türkiyege qarap yolgha chiqishqa mejbur bolghan idi. Bu musheqqetlik seper hem türk millitining her bir ezasi üchün qayghuluq bir hékaye hem irqdashlirimiz üchün japa - musheqqetlik we azab - oqubetlik bir seper boldi. Bu musheqqetlik seperde irqdashlirimiz taylandqiche yétip kélelidi we taylandta tutulup qaldi.

Mehmet éli arslan ependi sözide yene 1945 ‏- yili türkiyidin panahliq telep qilip qéchip kelgen 150 neper ezerbeyjanliqni ruslargha qayturup bergende ruslar ularni chégra siziqidila étip tashlighan we“ Boraltan paji'esi” dep tarixqa yézilghan bu paji'ege oxshash weqening taylandtiki Uyghurlarning béshigha kélip qalmasliqi üchün kéreklik qedem bésish kéreklikini tekitlidi.

U mundaq dédi: tashqi ishlar ministirliqi bu mesilige yéqindin köngül bölüwatqanliqini ipadiligen bolsimu, hazirghiche éniq bir ilgirilesh bolmidi. Bu yerdin munasiwetlik rehberlerge xitab qilimiz, yüz minglighan süriyelik we iraqliq köchmenlerge quchaq achqan türkiye jumhuriyiti döliti Uyghur qérindashlirimizghimu quchaqlirini keng échishi kérek. Türkiye jumhuriyiti Uyghur türklirini ümidsizlendürmesliki kérek. 300 Neper Uyghur qérindishimiz bizdin yardem qolimizni uzitishimizni we peqet türk millitining chongqur qelbide panahlinishni kütüwatidu.

Mehmet éli arslan ependi sözining dawamida, adana sheher bashliqining yolyoruqi bilen adana shehirining Uyghurlargha quchaq échishqa teyyar ikenlikini bildürüp mundaq dédi: adana sheher bashliqi hörmetlik hüseyin sözlüning yolyoruqi bilen adanaliqlar namida, adana shehiri bolush süpitimiz bilen bu qérindashlirimizgha pütünley keng quchaq échishqa, öyimizni we yurtimizni ular bilen ortaqlishishqa biz teyyar, dédi.

Arslan ependi yene adana sheherlik hökümet namidin yuqiri organlargha bu Uyghur türkliri türkiyege élip kélinish bilen derhal adanagha qobul qilidighanliqini we ulargha menggülük quchaq achidighanliqi heqqide doklat sun'ghanliqini, shuning üchün türkiye hökümitining bu qérindashlarni tizdin türkiyege élip kélishi kéreklikini, nawada kéchikip qélinsa bu qérindashlarning wabali türkiye üchün bir ahanet tamghisi bolup tarixqa yézilidighanliqinimu qoshup qoydi.

Mehmet éli arslan ependi sözining axirida mundaq dédi: shunisi éniq bilinishi kérekki, türkiye Uyghur türklirining öz wetinidur. Uyghur türklirini türkiyege yötkesh ishliri emeliyleshmigen teqdirde bu qérindashlirimizning béshigha kélidighan her qandaq paji'ege mes'ul kishiler jawabkar bolidu we bu weziyet tariximizgha boraltan paji'esige oxshash qara dagh bolup yézilidu. Buninggha seweb bolghan kishiler, hökümet bashliqliri, türk milliti hem insaniyetning wijdanida eng éghir shekilde jazalinidu.

Adana shehiri türkiyening muxalipetchi partiyeliridin milletchi heriket partiyisi teripidin bashqurulidighan sheher bolup, milletchi heriket partiyisining tashqi siyasiti türk birliki qurushni teshebbus qilidu. Shunga bu partiye türkiye sirtidiki türklerning mesilirige alahide ehmiyet béridighan partiyilerdin biridur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.