Aratürk nahiyeside dem élishqa chiqqan Uyghur sehiye xadimlirining qanuniy hoquqi depsende qilin'ghan

Radi'oyimizning igilishiche, aratürk nahiyelik doxturxanidin késellik sewebi bilen dem élishqa chiqqan Uyghur sehiye xadimlirining ma'ashi birqanche yillardin buyan tutup qélinip, ularning qanuniy hoquq-menpe'iti dexli-teruzgha uchrighanliqi melum.

Mezkur doxturxanidin birqanche yillar ilgiri dem élishqa chiqqan bir Uyghur doxtur bu naheqchilikke chidimay özi duch kelgen ehwallarni yéqinda torda élan qilip, jama'etchiliktin medet sorighan. Biz bu ehwalning rastliqini delillesh üchün mezkur yazmini élan qilghan Uyghur doxturgha téléfon qilduq.

U téléfonimizni qobul qilip, özining we aratürk nahiyelik doxturxanidin késellik sewebi bilen dem élishqa chiqqan bashqa birqanche Uyghur sehiye xadimining duch kelgen naheqsizlikliri heqqide toxtaldi:
“Men buningdin birqanche yillar ilgiri késellik sewebidin dem élishqa chiqqan idim. Qolumda qumul wilayetlik doxturxanining xizmet qilish iqtidarini yoqatqan dégen ispati bolghachqa, teshkilmu méning muddettin burun dem élishqa chiqishimgha qoshulghan idi. Halbuki, dem élish resmiyetlirimni béjirip 3 aydin kéyin ma'ashim kartamgha kirmidi. Néme bolghanliqini sürüshtürsem, nahiyelik doxturxanining bashliqi xwang yiden buyruq chüshürüp ma'ash resmiyetlirimni dem élishqa chiqqan kadirlar ornidin yötkep kétiptu. Men aratürk nahiyesige qaytip bérip ehwalni sürüshtürsem, xwang yiden men bilmeymen dep turuwaldi. Shundin bashlap nahiye bilen wilayet ariliqida talay qétimlar qatrap, bu ishni hel qilishqa tirishtim, lékin 5 yildin buyan bu ish hel bolmidi. Bu jeryanda doxturxana bashliqi teripidin qanunsiz halda tutup qélin'ghan ma'ashlirimning héchqaysisi toluqlap bérilmidi. Nahiye sékrétardin tartip taki wilayetlik intizam tekshürüsh komitétigha qeder erz qilip bardim. Héchbir orun erzimge perwa qilmidi. Axiri bolmighanda bu ehwalni torda élan qildim.”

U yene munularni bildürdi:
“Kéyin bilsem, bu qismetke yoluqqan kishi menla emes ikenmen. Nahiyelik doxturxanining bashliqi xwang yiden mendin bashqa yene késellik sewebidin dem élishqa chiqqan bashqa birqanche Uyghur kespiy xadimlarning ma'ashinimu öz aldigha tutup ularni iqtisadiy jehettin qiynap kelgen iken. Halbuki, hazirgha qeder ularning bu naheqchilikni hel qilghan yaki qilalmighanliqini bilmeymen. Uning qanunni buzup doxturxanidiki milliy xadimlarning ma'ashini öz aldigha tutup qalidighan bundaq hoquqining nedin bérilgenlikini we pénsiye ma'ashimizni tutup qélishining sewebini hazirghiche bilmidim. Men bir yalghuz ana, ikki balam uniwérsitétta oquydu. Ular méning yalghuz ma'ashimgha qarashliq, men qandaq qilimen? besh yildin buyan bu naheqchilik hel bolmay kelmekte...”

Tepsilatini awaz ulinishtin anglighaysiz.