Peyziwat térimda qérindishigha pul yollashmu "Jinayet", tebligh anglighan 200 nechche kishi qamaqta

Muxbirimiz shöhret hoshur
2017-05-11
Élxet
Pikir
Share
Print
Xitay qoralliq saqchiliri jüme namizidin burun meschit etrapini charlawatqan körünüsh. 2009-Yili 10-iyul, ürümchi.
Xitay qoralliq saqchiliri jüme namizidin burun meschit etrapini charlawatqan körünüsh. 2009-Yili 10-iyul, ürümchi.
AFP

Yéqinda radiyomizgha kelgen birqanche inkasta, Uyghur rayonida dawam qiliwatqan üch xil küchlerge qarshi herikette, chet'eldiki dost yaki qérindashlirigha pul yollashningmu jinayi pakit dep qariliwatqanliqi tilgha élindi.

Muxbirimiz bu yip uchigha asasen, peyziwatning térim yézisigha qarita téléfon ziyariti élip bardi. Ziyarette, térimdiki 33 yashliq bir ayalning chet'elge chiqip ketken bir inisigha, inisi ürümchidiki waqtida 10 ming som pul sélip bergenliki üchün nöwette térim saqchixanisida qamaqta ikenliki ashkarilandi. Mezkur saqchixana xadimi nöwette térim yézisida 200 nechche kishining tebligh anglighanliqi üchünla bu yil kirgendin buyan qamaqta ikenlikini delillidi.

Yéqindin buyan, chet'elde oquwatqan bezi oqughuchilar, Uyghur rayonida dawam qiliwatqan üch xil küchlerge qarshi turush, chet'elde oquwatqanlarni qayturup ekélish qatarliq siyasiy heriketler seweblik özlirining wetendiki a'ile-tawabi'ati bilen ijtima'iy alaqisi üzülüsh bilen birlikte, iqtisadiy alaqisiningmu üzülgenlikini melum qildi. Yene bir anglighuchimiz Uyghur rayonida yéqindin buyan échilghan bezi sotlarda chet'eldiki qérindashlirigha pul yollashningmu, jinayi pakit dep qariliwatqanliqini melum qildi. Biz bu uchurni delillesh üchün peyziwatning térim yézisigha téléfon qilduq.

Peyziwatqa qaratqan téléfon ziyaretlirimiz dawamida, chet'eldiki qérindishigha pul salghan birining jazalan'ghanliqi delillen'gen bolsimu, emma nahiye boyiche qanchilik kishining mushu xil seweb bilen qamalghan yaki késilgenliki aydinglashmidi. Emma birqanche ayning aldida, atushtin igiligen uchurlirimizda 25 yashliq tijaretchi rishat hajining türkiyediki akisi abduweli hajigha 3 yilning aldida soda üchün 10 ming dollar yollighanliqi seweblik dadisi we hedisi bilen birlikte tutqun qilin'ghanliqi delillen'gen idi.

Yuqiridiki awaz ulinishi arqiliq, Uyghur rayonida nöwette chet'eldiki qérindishigha pul yollashningmu jinayet dep qariliwatqanliqi heqqide uchurlarning tepsilatini anglighaysiler.

Toluq bet