Шаһитлар: һазир атушта 300 миң сом пули барларниң һәммиси тутуп кетилди
2017.10.16
Бу йил киргәндин буян хитай даирилириниң уйғур елида йүргүзүватқан юқири бесимлиқ сиясәтлири вә чекидин ашқан тәқиблири сәвәблик бир қисим уйғур зиялийлири, тиҗарәтчиләр вә адәттики пуқралар чәтәлләргә чиқип кетишкә мәҗбур болған.
Йеқинда миң бир мушәққәтләр билән хитайдин айрилип, голландийәгә йетип кәлгән җүрәт әнә шуларниң бири. У йеқинда радийомиз зияритини қобул қилип, нөвәттә уйғур дияридики вәзийәтниң тәсәввур қилғусиз дәриҗигә йәткәнликини билдүрди.
Униң билдүрүшичә, юрти атушта нөвәттә 300 миң сомдин артуқ пули бар байларниң һәммиси дегүдәк түрмигә, йиғивелиш лагериға яки тәрбийәләш мәркәзлиригә соливелинған икән.
У йәнә атушта 47 милйон сом пули бар болған бир байниң йеқинда банкиға берип 3 милйон сом нәқ пул алмақчи болғанда банкидикиләрниң рәт қилишиға учриғанлиқи, арилиқта икки тәрәп арисида җедәл чиқип, сақчиларниң бу байни тутуп кәткәнлики, аридин бирқанчә күн өтмәйла униң “маңа пул әмәс, бәлки тиниқ лазим” дәп, тутуп туруш орнидин йерим җан қайтип чиққанлиқини һекайә қилди.
Йеқинда америкиға келип йәрләшкән арман әпәндиму зияритимизни қобул қилип, нөвәттә уйғур дияриниң “үсти очуқ түрмә” гә айланғанлиқини, өйдин кочиға чиқип йәнә қайтип киргүчә аз дегәндә нәччә орунда тәкшүрүш вә соал-сораққа дуч келидиғанлиқини билдүрди.
Тәпсилатини аваз улиништин аңлиғайсиз.