Ilham toxti: “Uyghurbiz” tori pida'iylirining tutqun qilinishi shinjangning buyruqi bilen bolghan

Muxbirimiz méhriban
2013.10.17
mutellip-imin-uyghurbiz-bashqurghuchi.jpg Uyghurbiz torining béyjing ayrodromida ghayib bolghan tor bashqurghuchisi mutellip imin. (Yéqinqi süriti)
www.uighurbiz.net

Merkizi milletler uniwérsitéti dotsénti ilham toxti “Uyghurbiz” tori pida'iylirining tutqun qilinishi heqqide toxtilip, buning nöwette xitayda dawamlishiwatqan intérnét erkinlikige zerbe bérish herikiti bilen munasiwetlik bolghandin bashqa, “Uyghurbiz” torida élan qilin'ghan maqale-eserlerdin rahetsiz boluwatqan Uyghur aptonom rayonidiki bir qisim kishilerning buyruqi bilen élip bérilghanliqini bildürdi.

Yéqinqi birnechche aydin buyan, Uyghur éli da'iriliri merkizi milletler uniwérsitétida oquwatqan yaki ilgiri bu mektepte oqughan oqughuchilardin shöhret tursun, mutellip imin, perhat xalmurat qatarliq oqughuchilarni her xil bahanilerde tutqun qilghan idi.

“Uyghurbiz” toridiki xewerlerdin melum bolushiche, da'iriler tutqun qilin'ghan yaki “Chay ichish” namida soraq qilin'ghan bu oqughuchilardin ularning merkizi milletler uniwérsitétning dotsénti ilham toxti ependi we uning sahibliqidiki “Uyghurbiz” tori bilen bolghan munasiwitini sürüshtürgen.

Qurban héyt mezgilide radi'omiz ziyaritini qobul qilghan ilham toxti ependi “Uyghurbiz” tori qurulghandin buyan élan qilin'ghan maqale-eserlerning her sahe-kishilirining Uyghurlarning ehwalini chüshüshüshi, Uyghurlarning kishilik hoquq mesilisi qatarliqlarni dunyagha tonutushta aktip rol oynighanliqini, emma tor bétide élan qilin'ghan xewerler Uyghur rayonidiki yene bir qisim kishilerni rahetsiz qiliwatqanliqi üchün, ularning Uyghurbiz tori we bu torning sahibi bolghan özi üstidin atalmish “Jinayi pakit toplash” qa urunuwatqanliqini ilgiri sürdi.

“Firansiye dunya géziti” ning muxbiri soféy 15-öktebir küni ilham toxti ependining yéqinqi ehwali heqqide “Béyjing Uyghur ziyaliysini qattiq teqib astigha aldi” serlewhilik xewer élan qilghan.

Xewerde, xitay da'iriliri teripidin teqib astigha élin'ghan ilham toxti ependi we uning a'ilisidikilerning nazaret astida turuwatqan ehwali birqeder tepsiliy bayan qilin'ghan.

Xewerde bayan qilinishiche, yéqindin buyan da'iriler ilham toxtini nazaret qilishqa ajratqan saqchilarni 8 neperge köpeytken bolup, ular 24 sa'et nöwetliship ilham toxtining barliq pa'aliyetlirini nazaret qilidiken.

Radi'omiz ziyaritini qobul qilghan ilham toxti ependi bolsa özining bu yilliq qurban héytqa atalghan qurbanliq qoyni saqchilarning nazariti astida soyup kelgenlikini bildürgen idi.

Yéqindin buyan “Uyghurbiz” torida élan qilin'ghan xewerler we radi'omiz igiligen uchurlarda da'irilerning 2013-yili kirgendin buyan ilham toxtigha qaratqan teqib qilish we nazaretni yenimu kücheytkendin bashqa, ilham toxti igidarchiliqidiki “Uyghurbiz” tori üchün pida'iy bolup ishligen atikem rozi qatarliq bir qisim kishilerni tutqun qilish, yaki “Chay ichish” namida soraq qilish arqiliq ularning a'ilisidikilerge bésim ishletkenliki ashkarilan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.