Америка дөләт мәҗлисиниң бинаси алдида уйғур яшлириниң намайиши башланди

Мухбиримиз ирадә
2018-06-04
Share
washington-namayish-rebiye-xanim-soz.jpg Америка дөләт мәҗлисиниң бинаси алдида өткүзүлгән уйғур яшлириниң узун муддәтлик намайишида д у қ алий рәһбири рабийә қадир ханим сөз қилмақта. 2018-Йили 4-июн.
Photo: RFA

Бүгүн америка пайтәхти вашингтон вә әтрапидики районларда яшайдиған уйғур җамаити америка дөләт мәҗлиси алдида узун муддәт давамлаштурушни пиланлиған намайишини башлиди. Намайиш 4-июл дүшәнбә әтигән саәт 10 да башлиған болуп, намайишқа дуня уйғур қурултийиниң алий рәһбири рабийә қадир ханим иштирак қилди. У радийомиз зияритини қобул қилип, бу намайишни вирҗинийә штатидики уйғур яшлириниң өзлүкидин тәшкиллигәнликини, шуңа өзиниң уларниң бу һәрикитини қоллаш вә уларға мәдәт бериш үчүн кәлгәнликини билдүрди.

Намайишни қоллап-қуввәтлигән орунлар ичидә америка том ләнтус кишилик һоқуқ фондиму бар болуп, том ләнтос фондиниң рәиси катрина ләнтос ханим намайишчилар арисидин орун алди. Катрина ханим радийомизға қилған сөзидә уйғур елида 800 миңдин 1 милйонға йеқин гунаһсиз, тинчлиқпәрвәр кишиләр лагерда йетиватқан бир шараитта өзлириниң америка дөләт мәҗлиси вә һөкүмитини бу мәсилигә алаһидә диққәт қилишқа чақирип бу йәргә чиққанлиқини билдүрди. Катрина ханим сөзидә йәнә америка дөләт ишлири министирлиқи вә шундақла америка дөләт мәҗлиси кеңәш палата әзаси марко рубийолар қилған чақириқларни қарши елиш биргә, уни йетәрлик дәп қаримайдиғанлиқини әскәртти.

Катрина ханм мундақ деди: “әлвәттә дөләт мәҗлисиниң бәзи әзалири бу мәсилигә ипадисини билдүрүватиду. Әмма бу йетәрлик әмәс, йәниму көп кишиләр бу мәсилигә көңүл бөлүши керәк. Мәнчә, америка һөкүмитиниң кишилик һоқуқни дәпсәндә қилғучи һакимийәтләрни, әмәлдарларни җазалайдиған, уларға чәклимә қоюп, банкидики мал-мүлүклирини тоңлиталайдиған бир яхши қорали бар, у болсиму “хәлқара магнетиски қануни”. Шуңа биз америка һөкүмитиниң уйғур мәсилисигә наһайити көп диққәттә болушини арзу қиливатимиз. Биз бу арқилиқ дөләт мәҗлисини уйғурларға қарита бундақ залимларчә сиясәт йүргүзүватқан хитай әмәлдарлириға қарши чоқум бир тәдбир алғузидиған бесим шәкилләндүрүшимиз керәк.”

Бүгүнки намайишқа йәнә хәлқарада кишилик һоқуқни вә дини әркинликни тәшәббус қилидиған бир қисим америкилиқ яш кишилик һоқуқ паалийәтчилириму қатнашқан болуп, улар радийомизға қилған сөзидә өзлириниң уйғур мәсилисини қоллайдиғанлиқини, бу йәргә шәрқий түркистан хәлқи үчүн дини әркинлик тәләп қилиш вә уни қоллайдиғанлиқини намаян қилиш үчүн кәлгәнликини ейтти.

Ахирида намайишқа қатнашқан уйғур яшлардин бири зияритимизни қобул қилип, бу намайишни асасән яшларниң уйғур дияридики қериндашлириға бир аваз болуш, уларниң дәрдини аңлитиш үчүн уюштурғанлиқини вә бундақ паалийәтләрни давамлаштуридиғанлиқини билдүрди.

Бүгүнки намайиш көплигән уйғурларниң қатнишиши билән наһайити қизғин кәйпият ичидә давам қилди. Намайишчи яшлар америка дөләт мәҗлиси алдидики намайишини йәнә үзүлдүрмәй давамлаштуридиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт