Xitay da'iriliri mehelle komitét xadimlirighimu qoral seplep bermekchi

23 - April sériqbuya weqeside, a'ililerge kirip tekshürüsh élip bériwatqan 15 neper mehelle kadirliri we charlash xadimlirining atalmish térrorchilar teripidin öltürülgenliki bayan qilindi. Buning bilen mehelle ahaliler komitétining a'ililerge qaratqan charlash tekshürüsh herikiti we mehelle kadirliri diqqetni tartti.

Sérqbuyadiki weqedin kéyin Uyghur élide omumyüzlük bixeterlik, muqimliq xizmitini kücheytish buyruqi bilen emgekchiler bayrimigha qarimay nöwette asasi qatlamdiki mehelle kadirlirining bu xil tekshürüsh charlash xizmiti yenimu jiddiy haletke ötken. Da'iriler, gumanliq xeterlik dep qarighan jaylardiki mehelle kadirlirigha qoral seplep bérishni békitken. Da'irilerning alahide bixeterlik tedbirliri, may bayrimida jiddiy weziyet shekillendürgen bolup amma buni“5 - Iyuldin kéyinki yene bir qétimliq jiddi halet” dep teriplidi. Bu heqte muxbirimiz gülchéhrening Uyghur diyaridin igiligen melumatliri diqqitinglarda bolsun.

Uyghur élining tinchliq torida bérilgen xewerlerge qarighanda, 23 - april sériqbuya weqesidin kéyin pütün Uyghur éli miqyasida asasiy qatlamlardiki mehelle ish bashqurush we ahaliler xizmet ponkitlirida birdek muqimliqni qoghdash, bixeterlikni kücheytish tedbirliri jiddiy yolgha qoyulghan. 1 - May xelq'ara emgekchiler bayrimi munasiwiti bilen bu heptidin bashlap mektep we memuriy orunlar, zawut karxanilar birdek bir heptilik dem élishqa qoyup bérilgen bolsimu, barliq idare - organlarda 24 sa'etlik bixeterlik muqimliqni qoghdash, posta turush orunlashturulghan. Sheher nahiye bazarlarda saqchilar qerellik charlashni yolgha qoyghandin bashqa her qaysi mehelle ish bashqarmiliridiki hökümet xadimliri memurilar nöwetchilikke orunlashturulghan.

“Tinchliq” tordiki buninggha da'ir xewerlerde, may bayram munasiwiti bilen ürümchide her qaysi mehelle ahaliler komitétlirigha, saqchi, xelq eskiri, hökümet xizmetchi xadimliri bolup 10 ming neper xadim muqimliq xizmiti üchün heriketlendürülgen. Ürümchi yuqiri pen téxnikiliq tereqqiyat rayonidiki 8 mehelle komitétliri jiddiy heriketlinish gurupplirini qurup, amma bilen weqe körülse yaki gumanliq kishiler bayqalsa derhal da'irilerni xewerlendüridighan uchur alaqe torini qurup, bashqurush we közitishni kücheytken. Mehelliler boyiche jiddiy weqelerge qarshi manéwirlarni élip barghan.

Ürümchi 35 ahale kochisi ish bashqurush punkitida jiddiy yighin échilip, may bayrimidiki bixeterlik muqimliqni qoghdashqa her bir a'ilining bir birige mes'ul bolishi, her on a'ilige bir a'ilining mes'ul bolush tüzümlirini ornatqan.

Ürümchi sheherlik hökümet may bayramning aldida her qaysi mehelle komitétlirining tekshürüsh charlash xizmitini qulaylashturush üchün mexsus 121 aptomobil seplep bergen bolup buning 60i Uyghurlar zich olturaqlashqan tengritagh rayonigha, qalghanliri asasliqi murekkep dep qaralghan mehellilerge seplep bérilgen. Pütün ürümchi shehride 570 mehelle amanliq ishxanisi bolup, da'iriler bir mehellide bir amanliq saqchisi bolush, murekkep mehellilerde ikki we uningdin köp bolush prinsipi boyiche mehelle ish bashqarmilirigha saqchi xadimlarni sepligen.

26 - April ürümchide charlash xizmiti jiddiy yighini chaqirilip may bayrimidiki dem élish mezgilide dawamliq adem toplishidighan jaylar, kochilar, ammiwi sorunlargha qarita charlash qétim sanini kücheytish, kündilik qerellik charlashtin bashqa waqitlarda jiddiy weqelerge qarshi tedbir élish meshqi qilish orunlashturulghan.

26 - April ürümchi xongda mehelle komitéti yighin chaqirip, 50 tin artuq kadir we hökümet xadimlirigha mehellidiki köchme nopuslargha bolghan nazaretni kücheytish, sirttin kélip öy ijare éliwatqanlarning arxiplirini qaytidin retlep, a'ililerge kirip tekshürüsh élip bérip her bir a'ilidiki her bir ademning ehwalini toluq we éniqlash wezipisi bergen.

Ürümchi tengritagh rayonidiki Uyghurlar zich olturaqlashqan melum mehelle komitétigha téléfon qilduq, gerche bu waqit ürümchide 1 - may bayrimi yérim kéche waqti bolsimu kéchilik nöwetchilikte turiwatqan bir ayal xadim, mehelle xadimlirining bayramliq dem élishqa qoyup bérilmigenlikini a'ililerge kirip tekshürüsh charlashni dawlamlashturiwatqanliqini éytti we bayramda xadimlarning burunqidinmu köpeytilgenlikini bildürdi :

Yekende bir Uyghur ziyaritimizni qobul qilip, charlash kücheytilgenlikini mehelle xadimlirining a'ililerge kirip tekshürüp turuwatqanliqini bildürdi:

Xotende bir xitay köchmen sériqbuya weqesini anglimighanliqini,bu jaygha köchüp kelgendin kéyin saqchilarning da'im charlap yürüshlirige könüp qalghan bolsimu lékin yéqinqi künlerde weziyetning ilgirikidinmu jiddiyliship qalghanliqini bildürdi:

Qeshqer sheher maralbéshi yéngibazar mehelle bashqarmisining partiye yachéyka sékritari, hökümetning yéngi uqturushi boyiche bundin kéyin mehelle xadimliri a'ililerni tekshürüsh xizmitide alahide éhtiyatchan bolidighanliqini, mehellilerde,adettiki a'ililerge hökümet xadimi, mehelle on bashidin bashqa xelq eskiri kirip tekshürse, alahide nuqtiliq a'ililerge bir neper saqchi shundaqla qorallinip tekshürüsh élip baridighanliqini ashkarilidi:

Xitay hökümiti 5 - iyul weqesidin kéyin mehelle bashqarmilirini tesis qilip, her bir a'ilining ehwalini igilesh, köchmenlerni bashqurush, her on a'ilige bir on béshi teyinlep, qatmu qat mes'uliyet tüzümi bilen bashqurushni yolgha qoyghan, buning bilen a'ililerge mehelle hökümet xadimidin bashqa, kocha ish bashqarma xadimi, charlighuchi, xelq eskiridin terkip tapqan bir guruppa tekshürüsh etritini qerellik ewetip qerellik tekshürüp charlap turush tüzümini ornatqan idi. April sériqbuyida weqe yüz bergendin kéyinla, Uyghur aptonom rayoni partkomining sékritari jang chünshen jiddiy halda kadirlar yighini chaqirip, Uyghur aptonom rayoni boyiche muqimliq xizmiti orunlashturghan idi, u bir tereptin bixeterlik muqimliqni qoghdashta singip kirishining aldini élishni kücheytse yene bir tereptin asasiy qatlam apparatlirini mukemmelleshtürüsh bolupmu mehelle komitét xadimlirining xizmet aktipliqi we xizmet unumini kücheytishni alahide tekitligen idi.