Xotendiki bir qisim kishilerning gumida yüz bergen bomba partlash weqesi heqqidiki inkasliri

Ixtiyariy muxbirimiz haji qutluq qadiri
2016-09-23
Élxet
Pikir
Share
Print
Xeritide gumining orni körsitilgen. 2011-Yili 29-dékabir.
Xeritide gumining orni körsitilgen. 2011-Yili 29-dékabir.
maps.google.com

19 - Séntebir radi'oyimizning muxbiri xoten wilayitining guma nahiyisi köktérek yézisi 23 - kentide 10 - séntebir saqchilar bir gumandarning hoylisidiki gemini tekshürüwatqan chéghida bomba partlash yüz bérip, nahiyilik saqchi idarisining mu'awin bashliqi we undin bashqa bir qanche saqchining ölgenlikini ashkarilighan idi.

Biz bu munasiwet bilen bügün xoten shehiridiki bir qanche méhmanxanigha téléfon qilip mezkur weqe heqqide bir qisim inkaslargha ige bolduq.

Aldi bilen téléfon ziyaritimizni qobul qilghan xoten wilayetlik gherbiy yurt méhmanxanisining mes'uli bizning xotenning yéqindin buyanqi ehwali, bolupmu guma nahiyiside bomba partlighandin kéyinki weziyet heqqidiki so'allirimizgha jawab bérip:"Xotenning hazirqi weziyiti we bixeterlik yaxshi.Guma nahiyiside partlighan bomba weqesi u bir kichik weqe, tesiri anche chong emes.Lékin, hazir xotende bixeterlik xizmetliri nahayiti qattiq élip bériliwatidu"dédi.

Méhmanxana mes'uli bizning: - "Sizning bixeterlik xizmiti nahayiti qattiq élip bériliwatidu? - déginingiz némini chüshendüridu?" - dégen so'alimizgha jawab bérip:"Kimlik tekshürüsh,tizimlash,axturush dégendin ibaret"dédi.

U,bizning xoten'ge barghan kishiler bashqa nahiyilerge, mesilen؛ guma nahiyisigimu ziyaretke barsa bolamdu?dégen so'alimiz heqqide toxtilip:"Men buni bilmeymen"dédi.

Biz,uningdin:"- Gumida bomba partlighanliqi toghrisida gézitlerdin birer xewer kördingizmu?"déginimizde,u:"Gézitlerde bu heqte xewer bermidighu deymen.Men gézit we bashqa matériyallarda bu heqte héchqandaq xewer körmidim.Biraq,bashqilardin bomba partlighanliqini anglidim"dédi.

Méhmanxana mes'ulidin "Biz: - sizler bomba partlighanliqi heqqide méhmanxana xizmetchilirige yighin achmidinglarmu?" - dep sorighinimizda,u:"Biz bu toghrisida yighin achmiduq. Biraq,saqchi idarisi,qanun komitéti bizge yighin échip bizning méhmanxana bixeterlik xizmitini kücheytishimiz kéreklikini éytti.Biraq,bu heqte söz qilmidi"dédi.

U,ziyaritimiz jeryanida yene:"Men méhmanxana mes'uli shunga qanun orunlirining sözini anglishim kérek. Siz shuni bilishingiz kérekki weqe sadir bolghan yerning elwette, bixterliki kücheytilidu"dédi.

Biz shuning bilen yene xoten shehiridiki wénju méhmanxanisigha téléfon qilip:"Gumida bomba partlighandin kéyin xotenning weziyitini anche yaxshi emes dep angliduq.Shundaqmu?"dep sorighinimizda,téléfonimizni qobul qilghan kütküchi xitay qiz pes awazda:"Shundaq"dep jawab berdi.

Biz uningdin yene :"Guma weqesi bésiqturulup boldimu?weqede qanche adem ölüptu?"dep sorighinimizda u, qiz:"Weqe bésiqturulup boldi.Kechürisiz men weqede qanche adem ölgenlikini bilmeydikenmen.Biz bu heqte uchur tapshurup almiduq"dédi.

Ziyaritimizni qobul qilghan xoten pédagogika institutining yénidiki béyjing shilu méhmanxanisining kütküchisi xotenning yéqindin buyanqi weziyiti we gumida yüz bergen weqe heqqidiki so'allirimizgha jawab bérip:"Men gumida bomba partlighanliqini bashqilardin anglidim.Biz hazir normal xizmet qiliwatimiz.Weqening bizge tesiri zor bolmidi.Biraq,xotende hazir bixeterlik tekshürüsh xizmetliri qattiq élip bériliwatidu. Ammiwi sorunlargha barsingiz kimlikingizni körüsh bilen birge somka we bedenliringizni tekshüridu.Gumidiki weqedin kéyin shundaqla ürümchide échiliwatqan asiya - yawropa körgezme yighinigha merkezdin re'isler kelgenliki üchün hazir bixeterlikni we tekshürüshni da'iriler kücheytiwetti"dédi.

Biz axirida gumida yüz bergen bomba partlash weqesi toghrisida xoten pédagogika institutigha téléfon qilip, bu heqte Uyghurlardin uchur igilimekchi bolghan bolsaqmu biraq,téléfonimiz jawab qaldi.

Yuqiriqi awaz ulinishidin tepsilatini anglang.

Pikirler (0)
Share
Toluq bet