Xotende ündidar, kyu - kyu qatarliq 17 xil ijtima'iy uchur wastiliri taqiwétilgen

Muxbirimiz qutlan
2014.06.20
Share on WhatsApp
Share on WhatsApp
undidar-qq-qamal-wechat.jpg Xoten wilayiti chiqarghan intérnét we ammiwi alaqe wasitiliridin QQ, ündidar qatarliqlardiki uchurlarni qamal qilish toghrisidiki uqturushi. 2014-Yili may.
Oqurmen teminligen


Igilishimizche, Uyghur élining xoten wilayitide ündidar, kyu - kyu qatarliq 17 xil ijtima'iy uchur we alaqe wastilirining taqiwétilgenliki melum.

Bügün xoten tewesidin ziyaritimizni qobul qilghan, emma kimlikini ashkarilashni xalimaydighan bireylenning bildürüshiche, yerlik da'iriler ötken ayning 27 - künidin étibaren bu buyruqni ijra qilishqa bashlighan.

Melumki, ündidar qatarliq ijtima'iy uchur we alaqe wastiliri aldinqi yillarda Uyghur ahaliliri arisida keng da'iride ishlitilip kélin'gen. Wahalenki, bu yil 5 - ayda ürümchide yüz bergen ikki qétimliq qanliq weqedin kéyin xitay da'iriliri Uyghur élida intérnét we ijtima'iy uchur wastilirige bolghan cheklimini hessilep kücheytishke bashlighan.

Neq meydan téléfon ziyaritidin melum bolushiche, 27 - may kechqurun xoten wilayiti tewesidiki barliq téléfon abontlirigha junggo köchme téléfon we birleshme téléfon bash apparatidin birdek uchur kelgen. Uchurda “Xoten wilayitining muqimliqigha kapaletlik qilish” üchün ündidar qatarliq 17 xil ijtima'iy uchur we alaqe wastilirining mulazimitini waqtinche toxtatqanliqi uqturulghan. Dégendek shu küni kéche sa'et 12 din bashlap xoten wilayiti teweside ündidar we bashqa ammiwiy uchur wastiliri birdek toxtitilghan.

Xewer tépishimizche, bir aydin buyan yerlik da'iriler xotenning jay - jaylirida tekshürüsh nuqtiliri tesis qilip, puqralarning, bolupmu Uyghur yashlirining téléfonidiki shexsiy uchurlirini tekshürmektiken. Tekshürüsh nuqtilirida saqchilar aldi bilen herqandaq yoluchining téléfonini élip tekshürgen. Bezi gumanliq dep qaralghan kishilerning téléfonini élip qélip, téléfonda alliqachan öchüriwétilgen ilgiriki uchurlarnimu mexsus ishlen'gen yumshaq détallarning yardimi bilen eslige keltürüp tekshürüwatqanliqi melum.

Bir qisim anglarmenlerning uchurigha qarighanda, xoten xelqi da'irilerning bésimi we awarichiliqidin ensirep, ayfon, sumsung galaksiy qatarliq torgha ulinidighan yoqiri iqtidarliq téléfonlardin waz kéchishke mejbur bolghan. Nöwette xelq torgha ulanmaydighan ilgiriki kunupkiliq nomur taxtisi bar addiy téléfonlarni ishlitishke bashlighan. Buninggha egiship xoten bazirida yoqiri iqtidarliq, torgha ulighili bolidighan we ékran arqiliq meshghulat qilidighan téléfonlarning bahasi biraqla chüshüp ketken. Adettiki kunupkiliq nomur taxtisi bar téléfonlar qayta bazarni igileshke bashlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.