82 яшлиқ уйғур бовай өзиниң шәхсий қору-җайидин қандақ айрилип қалди?

Мухбиримиз қутлан
2014-01-20
Share
mejburiy-cheqiliwatqan-Uyghur-qoro-jay-oy.JPG Сақчиларни ишқа селип мәҗбурий чеқиливатқан булақбеши кочисидики уйғурларниң қору-җайлири. 2012-Йил, үрүмчи.
RFA/Qutlan

Тоққуз йилдин буян атуш шәһәр ичидики шәхсий қору-җайи вә бағваранлиқ һойлисидин мәҗбурий айрилған абдуреһим қари акиниң бүгүнки қийин әһвали вә һәққанийәт йолидики тиз пүкмәс роһи җамаәтчилик арисида ғулғула қозғимақта.

Бу йил 82 яшқа киргән абдуреһим қари ака 1970-йилларниң ахири ғулҗидин өз юрти атушқа қайтип шәһәр ичидин 3 мо 4 пуң йәр сетивалиду. У өзиниң җапалиқ әмгики вә қан-тәригә тайинип қанунлуқ сетивалған йеригә азадә қору-җайларни вә бүк-барақсан мевилик бағларни бина қилиду. Аридин 20 нәччә йил өтүп атуш шәһириниң кеңийиши билән униң қору-җайи шәһәр мәркизидики әң қайнақ җайлардин бири болуп қалиду.

2000-Йиллардин кейин қәшқәр вә атуш әтрапида йәр игиләп өй-мүлүк тиҗарити арқилиқ зор пайда елишни көзлигән хитайниң җуңкун ширкити 2004-йили абдуреһим қари акиниң қору-җайиға хирис қилиду. Абдуреһим қари ака җуңкун ширкитиниң тәлипини рәт қилғанда атуш шәһәрлик йәр башқуруш идариси, сүнтағ йезилиқ һөкүмәт вә шоруқ кәнт аһалиләр комитети ариға чүшүп униңға бесим ишлитиду. Җуңкун ширкити билән атуштики һәр дәриҗилик мунасивәтлик орунларниң қуруқ вәдә бериши билән ахири абдуреһим қари ака йерини өтүнүп бериш қәғизигә мәҗбурий қол қоюшқа мәҗбур болиду. Вәһаләнки, улар яшинип қалған бу бовайға түрлүк бесимлар билән қол қойдурувелипла илгирики вәдилиридин йенивалиду.

Тохтамдики абдуреһим қари акиниң бир балисини муқим штат билән хизмәткә орунлаштуруш вә бинадин икки йүрүш өй бериш қатарлиқ вәдиләрниң һечқайсиси әмәлийләшмәйду. Пәқәтла 120 миң сом төләм пули билән униң қору-җайини тартивалиду. Бу наһәқчиликкә чидимиған абдуреһим қари ака атуш шәһәрлик, қизилсу областлиқ һәмдә аптоном районлуқ һәр дәриҗилик сотларға әрз суниду. Сот униң әрзини қобул қилип, җуңкун ширкитиниң қилмишини қанунсизлиқ дәп елан қилиду. Абдуреһим ака 2006-йили дәрһал қору-җайини қайтидин қолиға елип йәнә бирқанчә йүрүш өй вә кочиға қаритип икки еғиз дукан салиду. Вәһаләнки, атушниң йәрлик һөкүмәт даирилири хитайниң өй-мүлүк ширкәтлири билән бирлишип униң қору-җайини еливелиш үчүн униңға давамлиқ бесим ишлитиду.

2013-Йилиға кәлгәндә атуш шәһәрлик йәрлик даириләр нәччә йүзлигән сақчиларни ишқа селип абдуреһим қари ака вә униң қошнилиридин бирқанчә уйғур аилисиниң қору-җайлирини машина билән түртүп түзливетиду. Қаршилиқ қилғанларни тутуп қамап қойиду. яшинип қалған абдуреһим қари акини уруп-думбалап һалидин йәткүзүветиду…

Ундақта, абдуреһим қари акиниң һазирқи әһвали зади қандақ? у қандақ яшаватиду? бу һәқтә униң қизи билән өткүзгән сөһбитимизни аңлаңлар, кейинки программилиримизда бу һәқтә йәнә давамлиқ аңлитиш беримиз.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт