82 Yashliq Uyghur boway özining shexsiy qoru-jayidin qandaq ayrilip qaldi?

Muxbirimiz qutlan
2014-01-20
Share
mejburiy-cheqiliwatqan-Uyghur-qoro-jay-oy.JPG Saqchilarni ishqa sélip mejburiy chéqiliwatqan bulaqbéshi kochisidiki Uyghurlarning qoru-jayliri. 2012-Yil, ürümchi.
RFA/Qutlan

Toqquz yildin buyan atush sheher ichidiki shexsiy qoru-jayi we baghwaranliq hoylisidin mejburiy ayrilghan abduréhim qari akining bügünki qiyin ehwali we heqqaniyet yolidiki tiz pükmes rohi jama'etchilik arisida ghulghula qozghimaqta.

Bu yil 82 yashqa kirgen abduréhim qari aka 1970-yillarning axiri ghuljidin öz yurti atushqa qaytip sheher ichidin 3 mo 4 pung yer sétiwalidu. U özining japaliq emgiki we qan-terige tayinip qanunluq sétiwalghan yérige azade qoru-jaylarni we bük-baraqsan méwilik baghlarni bina qilidu. Aridin 20 nechche yil ötüp atush shehirining kéngiyishi bilen uning qoru-jayi sheher merkizidiki eng qaynaq jaylardin biri bolup qalidu.

2000-Yillardin kéyin qeshqer we atush etrapida yer igilep öy-mülük tijariti arqiliq zor payda élishni közligen xitayning jungkun shirkiti 2004-yili abduréhim qari akining qoru-jayigha xiris qilidu. Abduréhim qari aka jungkun shirkitining telipini ret qilghanda atush sheherlik yer bashqurush idarisi, süntagh yéziliq hökümet we shoruq kent ahaliler komitéti arigha chüshüp uninggha bésim ishlitidu. Jungkun shirkiti bilen atushtiki her derijilik munasiwetlik orunlarning quruq wede bérishi bilen axiri abduréhim qari aka yérini ötünüp bérish qeghizige mejburiy qol qoyushqa mejbur bolidu. Wehalenki, ular yashinip qalghan bu bowaygha türlük bésimlar bilen qol qoyduruwélipla ilgiriki wediliridin yéniwalidu.

Toxtamdiki abduréhim qari akining bir balisini muqim shtat bilen xizmetke orunlashturush we binadin ikki yürüsh öy bérish qatarliq wedilerning héchqaysisi emeliyleshmeydu. Peqetla 120 ming som tölem puli bilen uning qoru-jayini tartiwalidu. Bu naheqchilikke chidimighan abduréhim qari aka atush sheherlik, qizilsu oblastliq hemde aptonom rayonluq her derijilik sotlargha erz sunidu. Sot uning erzini qobul qilip, jungkun shirkitining qilmishini qanunsizliq dep élan qilidu. Abduréhim aka 2006-yili derhal qoru-jayini qaytidin qoligha élip yene birqanche yürüsh öy we kochigha qaritip ikki éghiz dukan salidu. Wehalenki, atushning yerlik hökümet da'iriliri xitayning öy-mülük shirketliri bilen birliship uning qoru-jayini éliwélish üchün uninggha dawamliq bésim ishlitidu.

2013-Yiligha kelgende atush sheherlik yerlik da'iriler nechche yüzligen saqchilarni ishqa sélip abduréhim qari aka we uning qoshniliridin birqanche Uyghur a'ilisining qoru-jaylirini mashina bilen türtüp tüzliwétidu. Qarshiliq qilghanlarni tutup qamap qoyidu. Yashinip qalghan abduréhim qari akini urup-dumbalap halidin yetküzüwétidu…

Undaqta, abduréhim qari akining hazirqi ehwali zadi qandaq? u qandaq yashawatidu? bu heqte uning qizi bilen ötküzgen söhbitimizni anglanglar, kéyinki programmilirimizda bu heqte yene dawamliq anglitish bérimiz.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet