Parnikchi eli rehimning bayanliri Uyghur déhqanlirining yersiz qéliwatqanliqini ashkara qilmaqta

Muxbirimiz qutlan
2015-04-22
Share
xoten-dehqan.jpg Uyghur déhqanlar yéngi köchet tikiwatqan körünüsh. 2012-Yili 28-may, xoten.
AFP

Uyghur parnikchi eli rehimning köktat parnikliri xitay yéza sékrétari teripidin tartiwélin'ghandin kéyin, uning qismetliri Uyghur déhqanliri duch kéliwatqan eng chong xewp - yerdin ayrilish hadisisini ashkara qilmaqta.

Eli rehimning bayanliri qeshqer yéngisheher nahiye yéngi'ériq yézisining herqaysi kentliride körülüwatqan mundaq birqanche ehwaldin bésharet bermekte:

Yéza sékrétarliri xitay köchmenlirining Uyghur éligha yerlishishtiki asasiy qatlam tayanchi bolup qalghan

Uyghur parnikchi eli rehimning bildürüshiche, 2011-yili yü famililik xitay kadir qeshqer yéngisheher nahiyesining yéngi'ériq yézisigha sékrétar bolup, üch ay ötmeyla eli rehim we bashqa 911 a'ile Uyghur déhqanning köktat parniklirini tartiwalidu.

U eli rehimning köktat parnikini deslepte özining bir yurtluq adimi bolghan bir xitay ayalgha ötküzüp béridu. Bu ayal parnikta gül östürüp béqip uzun ötmeyla öz yurtigha qéchip kétidu. Yéza sékrétari yü bu parniklarni ikkinchi qétim yene bir a'ile xitay köchmen'ge béridu. Uzun ötmey umu qéchip kétidu. Üchinchi qétim bu parniklar bir jüp er-ayal xitaygha bérilidu. Yéziliq hökümet pul chiqirip ulargha quduq qézip béridu hemde parniklar üchün toluqlima yardem puli béridu. Xitay köchmenlirige qaritilghan bu xil étibar siyasetlerdin héchbir yerlik Uyghur déhqan behrimen bolalmaydu.

Yéziliq hökümettiki Uyghur rehberler qorchaqqa aylandurulghan

Éli rehimning bayanliridin melum bolushiche, xitay sékrétar yü yéngi'ériq yézisining Uyghur yéza bashliqi we Uyghur mu'awin sékrétarining köz aldida eli rehimning parniklirini tartiwalghan.

Uyghur kadirlarning héchqaysisi uninggha bir éghiz gep qilalmighan. Éli rehim yéziliq partkomning Uyghur mu'awin sékrétargha yillarche derd éytqan. U: "Héch bolmighanda 9 parnikimdin birini bolsimu qayturup berse, men razi idim!" déginide Uyghur mu'awin sékrétar mundaq dégen: "Men yü shujining keypiyati yaxshi chaghda uninggha dep baqay". Halbuki, aridin birqanche yillar ötken bolsimu, lékin yéziliq partkomning Uyghur mu'awin sékrétari yézining xitay sékrétargha bu gepni déyishke jür'et qilalmighan.

Eli rehim meyli yéza bashliqi bolsun yaki yéziliq partkom we yéziliq hökümetning mu'awin bashliqliri bolsun, Uyghur rehberlerning héchqaysisi xitay sékrétar yüning testiqisiz ish qilalmaydighanliqini bildürdi.

Yéza-kentlerdiki mol-hosulluq yerler xitay köchmenlirining qoligha ötüshke bashlighan

Parnikchi eli rehimning bayanliri yéngi'ériq yézisi tewesidiki tupriqi munbet, süyi elwek, mol-hosuli yuqiri térilghu yerlerning asta-asta xitay köchmenlirining qoligha ötüp kétiwatqanliqidin bésharet berdi.

U özi bilen qoshulup 12 a'ililik Uyghur déhqan jan béqiwatqan köktat parniklirining yéza sékrétarining birla buyruqi bilen bir a'ile xitay köchmen'ge ötküzüp bérilgenlikini bildürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet