Yilqichida ötken yili bir xitay xojayin öltürülgen

Qaghiliqning yilqichi yézisida yüz bergen 20 - awghust qanliq basturush weqesini éniqlashlirimiz dawamida mezkur yéza we uning bilen chégridash yézilarda bultur we bu yil ichide chong - kichik bolup az dégende 4 qétim weqe yüz bergenliki ashkarilandi.

Bulardin biri yilqichining 14 - kentide yüz bergen bir xitay xojayinning ikki neper Uyghur pida'iy teripidin öltürülüsh weqesidur. Yilqichi we etrapida yüz bergen bu bir qatar weqeler qaghiliq xelqining xitay hakimiyitige qarshi qolidin kélishiche we toxtawsiz küresh qiliwatqanliqini, emma xitay hökümitining rayondiki tinchsiz weziyetni dunyadin yoshurush üchün bu tür weqelerni qattiq we yeng ichide bir terep qiliwatqanliqini yene bir qétim ispatlidi. Töwende yilqichining 14 - kentide yüz bergen bir xitay xojayinning öltürülüsh weqesi heqqide melumat anglaysiler:

Yilqichi yéziliq islam jem'iyitining mudiri, “Beshte yaxshi imam” maxmutxan qarimining muxbirimizgha ötken heptidiki weqe heqqide melumat bérish jeryanida pash qilishiche, yilqichining 14 - kentidimu ötken yili2 - ayda bir weqe yüz bergen.

Bu weqede 14 - kenttiki binamliqni höddige alghan bir xitay xojayin 14 - kenttiki ikki neper Uyghur pida'iy teripidin öltürülgen.

Melum bolushiche öltürülgen xitay xojayinning yene bir shériki aqsuda yer höddige alghan bolup, u yilqichidiki shérikige téléfon qilip, jawabqa érishelmigendin kéyin yilqichigha yétip kélip shérikining ölgenlikini bayqighan we ehwalni saqchigha melum qilghan. Saqchilar délo turghuzup éniqlash jeryanida xitay xojayinni öltürgen ikki neper pida'iy qolgha élin'ghan we bu yil ikkinchi ayda sotlinip jazalan'ghan.

Maxmutxan qarimining bildürüshiche, bu weqeni xitay da'iriliri eyni chaghda diniy zatlargha, partiye ezalirigha we dölet ishchi - xizmetchilirige ashkarilighan emma, axbarattin yoshurun tutqan.

Yene uning bildürüshiche, 14 - kenttiki bu ikki pida'iy üstidin échilghan sotqa yéziliq hökümetning mu'awin bashliqi alim hamidin qatnashqan we sotning ehwalini diniy zatlargha shu yetküzgen.

So'al: shu weqege ishtirak qilghan balilarning isimlirini bilemsiz?

Jawab: shu chaghlarda biltim, hazir ésimdin chiqip qaldi. Yéza bashliqi alim hamidinning bu ishtin tepsiliy xewiri bar.

So'al: weqe yüz bergen jay, bu qétim weqe yüz bergen jaygha yéqinmu?

Jawab: yéqin, bu qétimqisi 13 - kent, yeni töwen sériq'ata kenti, u xojayin öltürülgen yer 14 - kent.

So'al: xitay xojayin qandaq yerde öltürülüptu, ish ornidimu öyidimu?

Jawab: öyide.

So'al: kéchisimu kündüzimu?

Jawab: kéchisi.

So'al: etrapida qolum - qoshniliri yoqmikin?

Jawab: yoq. U bir mehelle emes, chöllük. Hökümet uni bek qollighan hem bek muhapizet qilghan؛ yene qandaq bolghan bu weqe kélip chiqiptu. Aqsudiki loben téléfon qilsa téléfonni élinmighandin kéyin ölgenliki melum boptu.

Hörmetlik radi'o anglighuchilar, programmimizning kirish sözide tilgha élin'ghan 4 qétimliq weqe, bultur we bu yil qaghiliq bazar ichide yüz bergen 28 - féwral bext yoli weqesi, 1 - öktebir herbiy gazarmigha motsiklitliq hujum qilish weqesi we ahaliler komitéti xadimlirini pichaqlap öltürüsh weqesi qatarliq qanliq weqelerning sirtida bolup, bularni qatqanda, qaghiliqta bultur we bu yil ichide az dégende 7 qétim weqe yüz bergen.