Сақчи хадими: йопурғида 10 миң билән 20 миң арисида киши «тәрбийиләш» мәркизидә

Мухбиримиз шөһрәт һошур
2017-11-21
Елхәт
Пикир
Share
Принт
Уйғур районидики тәрбийәләш мәркәзлириниң бири. 2016-Йили яз, шаяр.
Уйғур районидики тәрбийәләш мәркәзлириниң бири. 2016-Йили яз, шаяр.
Oqurmen teminligen

Аңлиғучилиримиздин бири радиомизға мәктуп йоллап, йопурғиниң сийәк йезисида 1500 чә кишиниң тәрбийиләш мәркизигә солувелинғанлиқи вә тутқунларниң өзлириниң қачан қоюп берилидиғанлиқидин хәвәрсиз икәнликини ейтқан иди. Мухбиримизниң ениқлашлири давамида мәзкур учурниң тоғрилиқи дәлиллиниш билән бирликтә йәнә йопурға наһийиси бойичә 10 миң билән 20 миң арисида кишиниң нөвәттә тәрбийиләш мәркәзлиридә икәнлики ашкариланди.

Һөрмәтлик радио аңлиғучилар, мәзкур мәктупта, йопурғиниң сийәк йезисида тәрбийәләшкә әвәтилгәнләрниң һичбирсиниң техичә қоюп берилмигәнлики, уларниң өзи яки аилә-тавабиатлириға уларниң қачан қоюп берилидиғанлиқи һәққидә учурму берилмигәнлики йезилған. Телефонимизни қобул қилған сийәк йезилиқ бир сақчи хадими, өзиниң бу һәқтә мәлумат берәлмәйдиғанлиқини ейтти. Материялларда көрситилишичә, йопурға наһийиси 7 йеза, 4 базар, 4 деһқанчилиқ вә чарвичилиқ мәйданидин тәшкилләнгән, омуми нопуси 170 миң.

(Мәнбә: https://baike.baidu.com/item/%E8%89%B2%E4%B9%9F%E5%85%8B%E4%B9%A1)

Телефонимизни қобул қилған йәкшәнбәбазар, айават, йопурға вә терим сақчихана хадимлириму бу һәқтә мәлумат беришни рәт қилди. Радиомизға кәлгән мәктупта, йопурғидики тәрбийиләш мәркизиниң наминиң 2 қетим өзгәртилгәнлики, әң йеқинда қоюлған намниң «пуқралар мәктипи» икәнлики йезилған. Сийәк йезилиқ сақчиханиниң йәнә бир хадими, мәктупта дейилгән юқириқи учурларниң тоғрилиқини дәлиллиди. Бу сақчи хадиминиң ашкарилишичә, йопурғида тәрбийиләш мәркизи 4 орунда тәсис қилинған. Йәнә материялларда көрситилишичә, йопурғиниң сийәк йезиси, 14 кәнттин тәшкилләнгән, нопуси 18060.

(Мәнбә: https://zh.wikipedia.org/wiki/%E8%89%B2%E4%B9%9F%E5%85%8B%E4%B9%A1)

Радиомизға кәлгән мәктупта, 18 миң нопуслуқ сийәк йезисидин 1500 чә кишиниң пуқралар мәктипи намидики солақта икәнлики йезилған. Мәзкур сақчи хадими бу учурниң тоғрилиқини дәлилләш билән бирликтә, өз пәризигә асасән, йопурғида 10 миң билән 20 миң арисида кишиниң нөвәттә тәрбийиләш мәркизидә икәнликини баян қилди. 

Һөрмәтлик радио аңлиғучилар илгирики ениқлашлиримизда, йеңисар наһийисиниң 13 миң нопуслуқ топлуқ йезисидин 2миңдин артуқ кишиниң солақта икәнлики, тоққузақниң 36 миң нопуслуқ булақсу йезисида 3314 кишиниң қамақ вә түрмидә икәнлики ашкариланған иди.

Пикирләр (0)
Share
Толуқ бәт