Weziyettin xewerdar kishi: "Terbiyileshte yashta chonglar ölüm girdabigha kelgendila qoyup bérilmekte"

Muxbirimiz shöhret hoshur
2019-07-12
Élxet
Pikir
Share
Print
Etrapi sim tor we qoralliq eskerler bilen qorshalghan "Terbiyelesh lagéri".
Etrapi sim tor we qoralliq eskerler bilen qorshalghan "Terbiyelesh lagéri".
Social Media

Yighiwélish lagérliri heqqide élip bériwatqan éniqlashlirimiz dawamida, ghuljining chapchal nahiyiside yéshi 80 din ashqan bir pénsiyige chiqqan oqutquchining lagérdin chiqip jan üzgenliki ashkarilandi. Yéqinqi bu xil pakitlar, lagérdiki yashta chonglarning peqet ölüm girdabigha kelgendila qoyuwétilip barghanliqi heqqidiki jem'iyet uchurlirining toghriliqini isharetlimekte. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Ikki yérim yildin buyan yighiwélish lagérlirida tutup buriliwatqan kishiler ichidin intayin az sandiki kishilerning qoyup bérilgenliki, emma bularning ornigha yene bashqilarning soliniwatqanliqi ashkarilan'ghan bolsimu, zadi qandaq kishilerning qoyup bériliwatqanliqi namelum idi. Jem'iyet xewerliride lagérdikiler ichide yashlardin atalmish mesilisi éghirlarning kücheytip terbiyilesh nami astida késiwétilip barghanliqi we xéli bir qismining xitay ölkiliridiki türmilerge yötkelgenliki otturigha qoyulsa, yashan'ghanlar ichide késili éghirliship ölüm girdabigha kelgenlerningla a'ilisige qayturulghanliqi ilgiri sürülgen. 

Yéqinda chapchal nahiyisige qarita élip barghan téléfon ziyaretlirimiz dawamida, weziyettin xewerdar kishilerdin biri chapchalning jaghistay yézisida pénsiyige chiqqan oqutquchi turghun japparning lagérdin chiqip bir aydin kéyin wapat bolghanliqini melum qildi. Turghun jappar olturushluq mehelle komitétida wezipe ötewatqan bir xadim, özining xizmet jeryanida turghan japparning ölümige qatnashqanliqini ashkarilidi. Weziyettin xewerdar kishi, 25 yil awwal pénsiyige chiqqan turghun japparning 10 yil awwal özini yoqlap kelgen oqughuchilirigha 1945 ‏-yilidiki sherqi türkistan milliy armiyisining qudriti we intizamchanliqi heqqide gep qilghanliqi üchün, kishilerge bölgünchilik idiyisini singdürüshke urunush gumani bilen tutulghanliqini melum qilghanidi. Alaqidar xadimlar turghun japparning ölümining nazaret astida uzighanliqi, ölüm murasimigha intayin az sanda kishi qatnashqanliqini ashkarilighan bolsimu, emma uning néme üchün tutulghanliqi we qoyup bérilgenliki heqqide melumat bérelmidi. 

Weziyettin xewerdar kishi turghun japparning lagérda éghir késel halitige chüshüp qalghan ehwalda a'ilisige qayturulghanliqini melum qilghanidi. Alaqidar xadim, turghun japparning késel sewebi bilen buningdin 3 ay awwal ölgenlikini tilgha aldi. Emma yene bir alaqidar xadim, turghun japparning ölümidin awwal ghuljidiki bir terbiyilesh merkizide bir mezgil tutup turulghanliqini ashkarilidi. 

Ötken yili qeshqer neshriyatidin tutqun qilin'ghan bir péshqedem kadirningmu késili éghirlashqanliqi seweblik öyige qayturulghanliqi, azraqla yaxshilan'ghanda yene lagérgha ekétilgenliki melum qilin'ghanidi. Ötken ayda ataqliq yazghuchi nurmemet toxtiningmu lagérda késili éghirliship öyige chiqqanda, bir aydin kéyin wapat bolghanliqi delillen'genidi.

Hörmetlik radi'o anglighuchilar, yuqirida lagérdiki yashan'ghanlarning salametliki éghirliship ölüm girdabigha barghan chaghdila qoyuwétilip barghanliqi heqqide anglitish berduq.

Toluq bet