Lagér shahiti gülzire: "Qazaqistan puqraliqini élishta xelq'ara taratqularning yardimi boldi"

Muxbirimiz méhriban
2020-03-12
Élxet
Pikir
Share
Print
Lagér shahiti gülzire awulqanqizining testiqlan'ghan qazaqistan puqraliqigha ötüsh iltimasi.
Lagér shahiti gülzire awulqanqizining testiqlan'ghan qazaqistan puqraliqigha ötüsh iltimasi.
Gülzire Awulqanqizi teminligen

Qazaqistandiki lagér shahiti gülzire awulqan qizining 11-mart küni radiyomizgha bildürüshiche, uning qazaqistan hökümitige sun'ghan puqraliq iltimasi qobul bolghan. Qazaqistan köchmenler idarisi gülzirening xitaydiki lagérlirigha munasiwetlik uchurlar heqqide xelq'ara taratqularning ziyaritini qobul qilmasliq we bashqa siyasiy pa'aliyetlerde bolmasliq sherti bilen uninggha puqraliq salahiyiti bergen.

Gülzire xanimning bildürüshiche, u buning bilen xitaygha qayturulush endishisidin qutulghan. Emma qazaqistandiki xitaygha mahil küchlerning uninggha bolghan tehditi yenila mewjut iken.

Qazaqistandiki lagér shahiti gülzire awulqan qizi 2017-yili 7-ayning 19-künidin 2018-yil 10-ayning 17-künigiche ghulja shehiridiki melum lagérda 15 ay yatqan. 2018-Yili 10-ayda lagérdin qoyup bérilgendin kéyin u yene ghulja shehiridiki melum lagér ichige qurulghan peley zawutida ikki ay mejburiy emgekke sélin'ghan. 2018-Yil 12-ayning axiri xitayning ghuljadiki lagéridin qoyup bérilip, 2019-yili kirgende qazaqistandiki a'ilisi bilen jem bolghan.

Gülzire awulqan qizi özining ghuljadiki lagérda béshidin köchürgen ehwallarni 2019-yili etiyazdin bashlap, ijtima'iy taratqularda, erkin asiya radiyosi we "Amérika awazi" qatarliq xelq'ara axbarat wasitiliride üzlüksiz anglitip kelgen.

Gülzire awulqan qizining bildürüshiche, uning qolida qazaqistanda turushluq menggülük olturumi bar bolghini üchün u 2018-yilining axiri lagérdin qoyup bérilgen hemde 2019-yilining béshida qazaqistandiki a'ilisi bilen jem bolalighan. U qazaqistan'gha kélip uzun ötmeyla, yeni 2019-yili 2-ayning 16-küni qazaqistan puqraliqigha ötüsh iltimasini tapshurghan.

Emma u uzun ötmeyla özining qazaqistan da'iriliri teripidin xitaygha qayturulidighanlar tizimlikide ismi barliqini bilgen. Buning bilen u özini qazaqistanda bixeter hés qilalmighan. Shu sewebtin u qazaqistandiki qazaq pa'aliyetchisi sérikjan bilesh'oghli qurghan "Ata yurt pida'iyliri" teshkilatining yardimi bilen 2019-yilining axiridin bashlap, munasiwetlik xelq'araliq kishilik hoquq organliridin yardem sorighan. U yene bu ehwallarni ijtima'iy alaqe munberlirige yollash, erkin asiya radiyosi qatarliq xelq'ara taratqularda xewer qilish yoli bilen dunya jama'etchilikidin yardem telep qilip kelgen.

Gülzire xanim 2020-yili 2-ayning 26-küni qazaqistan köchmenler idarisige qayta barghinida özining puqraliq iltimasining shertlik qobul qilin'ghanliqini bilgen.

Gülzire xanim özining qazaqistan puqraliqigha sun'ghan iltimasining qobul bolushida xelq'ara taratqularda öz ehwalini bildürgenliki hemde qazaqistandiki kishilik hoquq teshkilatlirining yardimining muhim rol oynighanliqini tekitlep ötti.

Gülzire awulqan qizi 2019-yili 26-dékabirda radiyomiz ziyaritini qobul qilip, özining xitaygha qayturulush xewpide qalghanliqini bildürgen we xelq'ara kishilik hoquq organliridin yardem sorighan idi.



Eyni chaghda radiyomiz gülzire awulqan qizigha oxshash qazaqistanning menggülük olturumini alghan kishilerning qazaqistan puqraliqigha ötüsh iltimasining ret qilinishigha qandaq ishlarning seweb bolidighanliqini bilish üchün washin'gitondiki qazaqistan elchixanisigha téléfon qilghan idi. Ziyaritimizni qobul qilghan elchixana xadimi so'alimizgha jawab bérip, gülzire awulqan qizining ehwalini qazaqistan köchmenler idarisidin sorishimizni éytqan idi.

Toluq bet