Түркийәгә туғқан йоқлап барғанлиқи үчүн тутулған қаһарҗан қавул ақсудики лагерда җан үзгән

Мухбиримиз шөһрәт һошур
2019-06-24
Елхәт
Пикир
Share
Принт
10 Нәччә йиллар илгири түркийәгә туғқан йоқлап барғанлиқи үчүн бултур 7-айда тутқун қилинип, 11‏-айниң ахири лагерда җан үзгән қаһарҗан қавул әпәнди аилиси билән.
10 Нәччә йиллар илгири түркийәгә туғқан йоқлап барғанлиқи үчүн бултур 7-айда тутқун қилинип, 11‏-айниң ахири лагерда җан үзгән қаһарҗан қавул әпәнди аилиси билән.
RFA/Shöhret Hoshur

Вашингитондики уйғур кишилик һоқуқ вә демократийә фондиниң тор бетидә хәвәр қилинишичә, 10 нәччә йиллар илгири түркийәгә туғқан йоқлап барған қаһарҗан қавул бултур 7-айда ақсуда тутқун қилинип, 11‏-айниң ахири лагерда җан үзгән. Мухбиримизниң ақсуға қарита елип барған телефон зиярәтлири давамида мәзкур учурниң тоғрилиқи дәлилләнди. Мәлум болушичә, өткән йили 41 яшқа киргән, икки балиниң дадиси болған қаһарҗан қавул дәсләптә телефонидин «мәсилә» чиқип тутқун қилинған. Сорақ җәрянида униң түркийәгә туғқан йоқлап барғанлиқи ашкарилинип қейин-қистаққа елинған.

Уйғур кишилик һоқуқ вә демократийә фондиниң мәзкур хәвиридә баян қилинишичә, фонди җәмийәтниң хадимлири дуня уйғур қурултийиниң сабиқ рәиси рабийә қадир ханимниң аилә-тавабиатиниң әһвалини ениқлаш давамида, җүмлидин чоң оғли қаһар абдуреһимниң әһвалини сүрүштә қилиш давамида ақсу шәһәр ичидики йәнә бир қаһар исимлик киши, йәни қаһарҗан қавулниң лагерда өлгәнлики ашкариланған. Биз бу учурдин хәвәр тапқандин кейин ақсудики алақидар сиясий-қанун органлириға телефон қилдуқ. Көпинчә хадимлар бу вәқә һәққидә еғиз ечиштин өзлирини қачурди. Хадимлардин бәзилири өзлириниң бу вәқәдин хәвәрсизликини ейтса, йәнә бәзилири әһвалдин ақсуға берип мәлумат елишимизни тәвсийә қилди.

Уйғур кишилик һоқуқ вә демократийә фондиниң тор бетидики мәзкур хәвәрдә баян қилинишичә, 41 яшлиқ қаһарҗан қавулниң әсли кәспи шопур болуп, у бултур 7 ‏-айниң оттура вә ахирлири тутқун қилинип, 11‏-айниң оттура вә ахирлири, йәни техи лагердин қоюп берилмәй турупла һаятидин айрилған. Ақсудики алақидар хадимлар қаһарҗан қавул һәққидә гәп қилиштин өзлирини қачурсиму, лекин һечқайсиси униң лагерда өлгәнликини инкар қилмиди. Йәнә униң нормал яшаватқанлиқи һәққидә еғиз ачалмиди.

Сақчилардин бири «тәрбийәләш» тә җан үзгән қаһарҗан қавулниң қайси тәвәликниң аһалиси икәнликини сориғинимизда униң каңҗү аһалиләр комитетиға тәвә икәнликини ейтти. Ениқлашлиримиз давамида вәзийәттин хәвәрдар аһалиләрдин бири қаһарҗан қавулниң ақсу шәһәр ичидики вуҗоңлу, йәни 5‏-оттура мәктәп йоли үстигә җайлашқан каңли аһалиләр комитетиға тәвә икәнликини баян қилди. Игәрчи йезилиқ сақчихана хадими болса «тәрбийәләш» тә түгәп кәткән қаһарҗан қавулниң нопус тәвәликиниң базарлиқ сақчиханиға қарайдиғанлиқини билдүрди. Базарлиқ сақчиханидики бир хадим қаһарҗан қавулниң сиясийға четилип қалғанлиқи үчүн тутулғанлиқини илгири сүрди. Әмма униң сиясийға қандақ четилғанлиқи һәққидә мәлумат берәлмиди. Хадимлардин бири қаһарҗанниң йәнә дөләт аманлиқ сақчилири тәрипидин тутулғанлиқини баян қилди.

Уйғур кишилик һоқуқ вә демократийә фондиниң хәвиридә қаһарҗан қавулниң буниңдин 10 нәччә йиллар илгири түркийәдә яшаватқан аниси вә ачисини зиярәт қилип көрүшүп кәлгәнлики вә өткән йили мушу сәвәблик ақсуда тутулғанлиқи йезилған. Телефонимизни қобул қилған вә өзиниң ақсудики каңли аһалиләр комитетиға аптоном районидин хизмәткә чүшкәнликини баян қилған бир хадим қаһарҗан қавулниң телефонидин «мәсилә» чиқип, йәни нуқтилиқ бир аилигә телефон қилип қойғанлиқи үчүн тутулғанлиқини ашкарилиди.

Ақсудики бир дөләт аманлиқ сақчиси өзиниң әслидә лагерда җан үзгән қаһарҗан қавул билән оттура мәктәптә савақдаш икәнликини билдүрсә, йәнә бир хадим қаһарҗан қавулниң өткән йили 7 ‏-айда телефон сәвәблик тутулғанлиқи, сорақ җәрянида түркийәгә туғқан йоқлап бериштәк аталмиш «җинайити» ниң паш болғанлиқини баян қилди. Ахирида телефонимизни қобул қилған базарлиқ сақчи хадимиму қаһарҗан қавулниң түркийәгә туғқан йоқлап барғанлиқи үчүн тутулғанлиқини дәлиллиди.

Уйғур кишилик һоқуқ вә демократийә фондиниң вәзийәттин хәвәрдар кишиләрдин игилишичә, қаһарҗан қавул лагерда қейин-қистақ сәвәблик һошидин кәткәндин кейин дохтурханиға апирилған вә дохтурханида қутқузуш үнүм бәрмәй һаятидин айрилған. Алақидар хадимлар қаһарҗан қавулниң қийин-қистаққа учриған яки учримиғанлиқи һәққидә ениқ гәп қилмиди, әмма униң лагердин дохтурханиға җиддий қутқузушқа апирилғанлиқини дәлиллиди.

Пикирләр (0)
Share
Толуқ бәт