Türkiyege tughqan yoqlap barghanliqi üchün tutulghan qaharjan qawul aqsudiki lagérda jan üzgen

Muxbirimiz shöhret hoshur
2019-06-24
Élxet
Pikir
Share
Print
10 Nechche yillar ilgiri türkiyege tughqan yoqlap barghanliqi üchün bultur 7-ayda tutqun qilinip, 11‏-ayning axiri lagérda jan üzgen qaharjan qawul ependi a'ilisi bilen.
10 Nechche yillar ilgiri türkiyege tughqan yoqlap barghanliqi üchün bultur 7-ayda tutqun qilinip, 11‏-ayning axiri lagérda jan üzgen qaharjan qawul ependi a'ilisi bilen.
RFA/Shöhret Hoshur

Washin'gitondiki Uyghur kishilik hoquq we démokratiye fondining tor bétide xewer qilinishiche, 10 nechche yillar ilgiri türkiyege tughqan yoqlap barghan qaharjan qawul bultur 7-ayda aqsuda tutqun qilinip, 11‏-ayning axiri lagérda jan üzgen. Muxbirimizning aqsugha qarita élip barghan téléfon ziyaretliri dawamida mezkur uchurning toghriliqi delillendi. Melum bolushiche, ötken yili 41 yashqa kirgen, ikki balining dadisi bolghan qaharjan qawul deslepte téléfonidin "Mesile" chiqip tutqun qilin'ghan. Soraq jeryanida uning türkiyege tughqan yoqlap barghanliqi ashkarilinip qéyin-qistaqqa élin'ghan.

Uyghur kishilik hoquq we démokratiye fondining mezkur xewiride bayan qilinishiche, fondi jem'iyetning xadimliri dunya Uyghur qurultiyining sabiq re'isi rabiye qadir xanimning a'ile-tawabi'atining ehwalini éniqlash dawamida, jümlidin chong oghli qahar abduréhimning ehwalini sürüshte qilish dawamida aqsu sheher ichidiki yene bir qahar isimlik kishi, yeni qaharjan qawulning lagérda ölgenliki ashkarilan'ghan. Biz bu uchurdin xewer tapqandin kéyin aqsudiki alaqidar siyasiy-qanun organlirigha téléfon qilduq. Köpinche xadimlar bu weqe heqqide éghiz échishtin özlirini qachurdi. Xadimlardin beziliri özlirining bu weqedin xewersizlikini éytsa, yene beziliri ehwaldin aqsugha bérip melumat élishimizni tewsiye qildi.

Uyghur kishilik hoquq we démokratiye fondining tor bétidiki mezkur xewerde bayan qilinishiche, 41 yashliq qaharjan qawulning esli kespi shopur bolup, u bultur 7 ‏-ayning ottura we axirliri tutqun qilinip, 11‏-ayning ottura we axirliri, yeni téxi lagérdin qoyup bérilmey turupla hayatidin ayrilghan. Aqsudiki alaqidar xadimlar qaharjan qawul heqqide gep qilishtin özlirini qachursimu, lékin héchqaysisi uning lagérda ölgenlikini inkar qilmidi. Yene uning normal yashawatqanliqi heqqide éghiz achalmidi.

Saqchilardin biri "Terbiyelesh" te jan üzgen qaharjan qawulning qaysi tewelikning ahalisi ikenlikini sorighinimizda uning kangjü ahaliler komitétigha tewe ikenlikini éytti. Éniqlashlirimiz dawamida weziyettin xewerdar ahalilerdin biri qaharjan qawulning aqsu sheher ichidiki wujonglu, yeni 5‏-ottura mektep yoli üstige jaylashqan kangli ahaliler komitétigha tewe ikenlikini bayan qildi. Igerchi yéziliq saqchixana xadimi bolsa "Terbiyelesh" te tügep ketken qaharjan qawulning nopus tewelikining bazarliq saqchixanigha qaraydighanliqini bildürdi. Bazarliq saqchixanidiki bir xadim qaharjan qawulning siyasiygha chétilip qalghanliqi üchün tutulghanliqini ilgiri sürdi. Emma uning siyasiygha qandaq chétilghanliqi heqqide melumat bérelmidi. Xadimlardin biri qaharjanning yene dölet amanliq saqchiliri teripidin tutulghanliqini bayan qildi.

Uyghur kishilik hoquq we démokratiye fondining xewiride qaharjan qawulning buningdin 10 nechche yillar ilgiri türkiyede yashawatqan anisi we achisini ziyaret qilip körüshüp kelgenliki we ötken yili mushu seweblik aqsuda tutulghanliqi yézilghan. Téléfonimizni qobul qilghan we özining aqsudiki kangli ahaliler komitétigha aptonom rayonidin xizmetke chüshkenlikini bayan qilghan bir xadim qaharjan qawulning téléfonidin "Mesile" chiqip, yeni nuqtiliq bir a'ilige téléfon qilip qoyghanliqi üchün tutulghanliqini ashkarilidi.

Aqsudiki bir dölet amanliq saqchisi özining eslide lagérda jan üzgen qaharjan qawul bilen ottura mektepte sawaqdash ikenlikini bildürse, yene bir xadim qaharjan qawulning ötken yili 7 ‏-ayda téléfon seweblik tutulghanliqi, soraq jeryanida türkiyege tughqan yoqlap bérishtek atalmish "Jinayiti" ning pash bolghanliqini bayan qildi. Axirida téléfonimizni qobul qilghan bazarliq saqchi xadimimu qaharjan qawulning türkiyege tughqan yoqlap barghanliqi üchün tutulghanliqini delillidi.

Uyghur kishilik hoquq we démokratiye fondining weziyettin xewerdar kishilerdin igilishiche, qaharjan qawul lagérda qéyin-qistaq seweblik hoshidin ketkendin kéyin doxturxanigha apirilghan we doxturxanida qutquzush ünüm bermey hayatidin ayrilghan. Alaqidar xadimlar qaharjan qawulning qiyin-qistaqqa uchrighan yaki uchrimighanliqi heqqide éniq gep qilmidi, emma uning lagérdin doxturxanigha jiddiy qutquzushqa apirilghanliqini delillidi.

Toluq bet