Pichandiki bir mehellidin we qeshqerdiki toqquztash ahaliler komitétidin 3 tin kishining lagérda ölgenliki ashkarilandi

Muxbirimizning qeshqer we pichan'gha qarita élip barghan téléfon ziyaretliri dawamida, pichanning lükchün bazar muqam kentidiki 1-mehellidinla abduréhim abliz qatarliq 3 kishining؛ qeshqer shehirining merhaba kocha bashqarmisidiki toqquztash ahaliler komitétidinla yunus qari qatarliq 3 kishining lagérda ölgenliki ashkarilandi.  

Uyghur rayonidiki lagérlarning sirliri heqqide yéqindin buyan közetküchilerning eng diqqitini tartiwatqan nuqta, bu lagérda ölüwatqanlarning omumi sani we uning qandaq bir terep qiliniwatqanliqidur. Xitay da'iriliri küchlük axbarat cheklimisidin bashqa yene, jesetni a'ilisige bermeslik, bergen teqdirde méyitni a'ile ezalirigha körsetmeslik we nezir ötküzüshke qoymasliq we yaki nezirige kélidighan kishilerning sanini cheklesh qatarliq yollar bilen lagérda ölgenlerning sanini pütün küchi bilen jem'iyettin we axbarattin yoshurmaqta. Shunga biz téléfon ziyaretlirimiz dawamida her derijilik xadimlardin bu sir üstidimu melumatlar soriduq.

22-Öktebir küni pichan lemjindiki ghalipjan exmetning lagérda ölgenlik uchurini éniqlishimiz dawamida, pichanning lükchün bazar muqam kentidiki bir mehellidinla 3 kishining lagérda ölgenliki ashkarilandi. Téxnikiliq tosalghu sewebidin bu mehelle bashliqi bilen söhbitimiz üzülüp qalghandin kéyin, bazarliq siyasiy kéngeshning alaqidar xadimidin, muqam kent 1 ‏-mehellidiki lagérda ölgen kishining kimlikini soriduq. Bu xadimmu, bu melumatlarning dölet mexpiyetlikige yatidighanliqini eskertip so'alimizgha jawab bérishni ret qildi. Muqam kent sékrétari lagérda üch kishining a'ile-tawabi'atigha partiyege ishinish heqqide idiyewi xizmet ishligenlikini tilgha aldi, emma bu üch kishining kimlikliri heqqide melumat bermidi. Téléfonimizni qobul qilghan bir saqchi xadimi bu üch kishining birining 80 yashqa yéqinlashqan tömür pasar dégen kishi ikenliki, qalghan ikkisining bolsa 40 we 50 yashlardiki abduréhim abliz we enwer ziyawudun ikenlikini bayan qildi.

Birqanche ayning aldida ijtima'iy taratqularda tarqalghan, qeshqerdiki lagérda jan üzgen aytursun élining ölümi heqqidiki bir awaz xatiriside aytursunning anisi, qizi aytursun ölgen ayda, özliri tewe bolghan merhaba kocha bashqarmisining toqquztash ahaliler komitétidinla, qizi bilen qatqanda 3 kishining lagérdin jesitini chiqqanliqini ashkarilighan. U qalghan ikki kishidin birining 40 yashlar chamisidiki yunus qari ikenlikini tilgha alghan؛ yene birining ismini esliyelmigen, emma 25 yashlar chamisidiki téxi toy qilmighan bir yash ikenlikini bayan qilghan.

Beydu uchur ambiridiki matériyallardin melum bolushiche, yuqiriqi bir mehellidin 3 kishi lagérda ölgen lükchün bazirida 60 tin artuq mehelle, 32ming etrapida nopus mewjuttur.