Пичандики бир мәһәллидин вә қәшқәрдики тоққузташ аһалиләр комитетидин 3 тин кишиниң лагерда өлгәнлики ашкариланди

Мухбиримиз шөһрәт һошур
2019-10-24
Елхәт
Пикир
Share
Принт
Сим тикән билән оралған «тәрбийәләш мәркизи» ниң көзитиш мунари. 2018-Йили 4-сентәбир, даванчиң.
Сим тикән билән оралған «тәрбийәләш мәркизи» ниң көзитиш мунари. 2018-Йили 4-сентәбир, даванчиң.
REUTERS

Мухбиримизниң қәшқәр вә пичанға қарита елип барған телефон зиярәтлири давамида, пичанниң лүкчүн базар муқам кәнтидики 1-мәһәллидинла абдуреһим аблиз қатарлиқ 3 кишиниң; қәшқәр шәһириниң мәрһаба коча башқармисидики тоққузташ аһалиләр комитетидинла юнус қари қатарлиқ 3 кишиниң лагерда өлгәнлики ашкариланди.  

Уйғур районидики лагерларниң сирлири һәққидә йеқиндин буян көзәткүчиләрниң әң диққитини тартиватқан нуқта, бу лагерда өлүватқанларниң омуми сани вә униң қандақ бир тәрәп қилиниватқанлиқидур. Хитай даирилири күчлүк ахбарат чәклимисидин башқа йәнә, җәсәтни аилисигә бәрмәслик, бәргән тәқдирдә мейитни аилә әзалириға көрсәтмәслик вә нәзир өткүзүшкә қоймаслиқ вә яки нәзиригә келидиған кишиләрниң санини чәкләш қатарлиқ йоллар билән лагерда өлгәнләрниң санини пүтүн күчи билән җәмийәттин вә ахбараттин йошурмақта. Шуңа биз телефон зиярәтлиримиз давамида һәр дәриҗилик хадимлардин бу сир үстидиму мәлуматлар соридуқ.

22-Өктәбир күни пичан ләмҗиндики ғалипҗан әхмәтниң лагерда өлгәнлик учурини ениқлишимиз давамида, пичанниң лүкчүн базар муқам кәнтидики бир мәһәллидинла 3 кишиниң лагерда өлгәнлики ашкариланди. Техникилиқ тосалғу сәвәбидин бу мәһәллә башлиқи билән сөһбитимиз үзүлүп қалғандин кейин, базарлиқ сиясий кеңәшниң алақидар хадимидин, муқам кәнт 1 ‏-мәһәллидики лагерда өлгән кишиниң кимликини соридуқ. Бу хадимму, бу мәлуматларниң дөләт мәхпийәтликигә ятидиғанлиқини әскәртип соалимизға җаваб беришни рәт қилди. Муқам кәнт секретари лагерда үч кишиниң аилә-тавабиатиға партийәгә ишиниш һәққидә идийәви хизмәт ишлигәнликини тилға алди, әмма бу үч кишиниң кимликлири һәққидә мәлумат бәрмиди. Телефонимизни қобул қилған бир сақчи хадими бу үч кишиниң бириниң 80 яшқа йеқинлашқан төмүр пасар дегән киши икәнлики, қалған иккисиниң болса 40 вә 50 яшлардики абдуреһим аблиз вә әнвәр зиявудун икәнликини баян қилди.

Бирқанчә айниң алдида иҗтимаий таратқуларда тарқалған, қәшқәрдики лагерда җан үзгән айтурсун елиниң өлүми һәққидики бир аваз хатирисидә айтурсунниң аниси, қизи айтурсун өлгән айда, өзлири тәвә болған мәрһаба коча башқармисиниң тоққузташ аһалиләр комитетидинла, қизи билән қатқанда 3 кишиниң лагердин җәситини чиққанлиқини ашкарилиған. У қалған икки кишидин бириниң 40 яшлар чамисидики юнус қари икәнликини тилға алған; йәнә бириниң исмини әслийәлмигән, әмма 25 яшлар чамисидики техи той қилмиған бир яш икәнликини баян қилған.

Бәйду учур амбиридики материяллардин мәлум болушичә, юқириқи бир мәһәллидин 3 киши лагерда өлгән лүкчүн базирида 60 тин артуқ мәһәллә, 32миң әтрапида нопус мәвҗуттур.

Пикирләр (0)
Share
Толуқ бәт