Оқутқучи арсланниң лагерда өлгәнлики «тик-ток» бетидә ашкариланди вә даириләр тәрипидин дәлилләнди

Мухбиримиз шөһрәт һошур
2019-08-23
Елхәт
Пикир
Share
Принт
Лагерда җан үзгән ғулҗа шәһәр дөңмәһәллилик яш оқутқучи арсланниң рәпиқиси муйәссәр билән биргә чүшкән сүрити.
Лагерда җан үзгән ғулҗа шәһәр дөңмәһәллилик яш оқутқучи арсланниң рәпиқиси муйәссәр билән биргә чүшкән сүрити.
Social Media

Лагерда җан үзгән ғулҗа шәһәр дөңмәһәллилик яш оқутқучи арсланниң рәпиқиси муйәссәр ханим «доуйин» тор бетидә пайлашқан видейо.

Мушу айниң 14-күни хитайчә «доуйин» (тик-ток) тор бетидики бир видийолуқ учур вә инкаслардин ғулҗа шәһәр дөңмәһәллилик яш оқутқучи арсланниң икки күн аввал вапат болғанлиқи вә лагерда җан үзгәнлик еһтималлиқи ашкариланди. Мухбиримизниң ғулҗа шәһиридики алақидар орунларға қарита елип барған телефон зиярәтлири давамида, арсланниң ғулҗа шәһәр 5‏-башланғуч мәктәп оқутқучиси икәнлики вә өлүмидин бурун лагерда икәнлики айдиңлашти. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Мушу айниң 14-күни иҗтимаий ахбарат васитилиридин хитайниң «доуйин» тор бетидә муйәссәр исимлик бир аял өзиниң йолдиши билән биргә чүшкән бир түркүм хатирә сүрәтлирини тордашлири билән ортақлашқан. Тордашлири бу рәсимләрдә ипадиләнгән гүзәл вә романтик аилә һаятини тәбрикләш билән бирликтә, бу рәсимләргә кириштүрүлгән муңлуқ музика вә муйәссәрниң ғәмкин қияпитигә қарита муйәссәрдин соал сориған. Муйәссәр бу соалларға җавабән; «у бәкла узақ йәрдә, мәңгү көргини болмайдиған» дәп җаваб язған. Тордашлардин йәнә бири: «мән сизниң йолдишиңизни тонуймән, униңға немә болди?» дәп сориған. Муйәссәр бу соалға: «у вапат болди» дәп очуқ җаваб бәргән. Әмма у: «немә сәвәбтин?» дегән соалға җаваб қайтурмиған. Инкасчилардин бири арсланниң өзиниң башланғуч мәктәптики хитай тили оқутқучиси икәнликини язса; йәнә бир инкасчи арсланниң ғулҗа шәһәр дөңмәһәлләлик икәнликини билдүргән. Биз бу йип учлириға асасән, әң аввал ғулҗа шәһәр дөңмәһәллә коча башқармисиға телефон қилдуқ вә дөңмәһәллидики башланғуч мәктәпниң намини сүрүштә қилдуқ. Дөңмәһәллә коча башқарма хадими дөңмәһәллидә 5‏- вә 20-башланғучтин ибарәт икки башланғуч мәктәп вә бир оттура мәктәп барлиқини билдүрди. «Доуйин» тор бетидики йәнә башқа инкасларда арсланниң кишилик пәзилитигә ихчам мәдһийәләр оқулған вә униңға қисқа тәзийәләр билдүрүлгән. Әмма арсланниң өлүм сәвәби һәққидә һечким инчикиләп соал сориялмиған. Биз бу соал-җавабтики еһтиятчанлиқ вә нөвәттики уйғур вәзийитигә асасән, арсланниң лагерда өлгәнлик еһтималлиқини пәрәз қилдуқ вә гуманға асасән, мәзкур хадимдин лагерда түгәп кәткән арслан исимлик оқутқучиниң әсли қайси мәктәпниң оқутқучиси икәнликини соридуқ; у өзиниң йеңи хизмәтчи икәнликини сәвәб көрситип, бу һәқтә мәлумати йоқлуқини ейтти. «Доуйин» торидики сүрәт вә көрүнүштин арсланниң 30 яшлар чамисида икәнлики вә бир пәрзәнтниң атиси икәнлики мәлум. Әмма униң ениқ хизмәт орни мәлум әмәс. Телефонимизни қобул қилған ғулҗа шәһәрлик маарип идариси хадимиму дөңмәһәллидики икки башланғуч мәктәптин қайсисида уйғурлар барлиқини сориғинимизда, у дәсләптә соаллиримизға җаваб бериштин мумкин қәдәр өзлирини тартти. Дөңмәһәллидә икки башланғуч мәктәп барлиқини вә буниң бири 5 ‏-башланғуч мәктәп икәнликини тәкрарлиған бир хадим тәрбийиләштә вапат болған арсланниң қайси мәктәптә икәнликини сориғинимизда, әһвалдин хәвәрсизликини әнсиз бир кәйпиятта баян қилди. 

Телефонимизни қобул қилған маарип идарисиниң йәнә бир хадими, 5-башланғуч мәктәптә уйғурлар билән хитайларниң биллә оқуйдиғанлиқини билдүрүш билән бирликтә, тәрбийиләштә түгәп кәткән оқутқучи арсланниң бурун қайси мәктәптә ишлигәнликини сориғинимизда: «5-башланғуч мәктәптә» дәп җаваб бәрди. Биз бу хадимдин арсланниң лагерниң ичидә яки лагердин чиқип өлгәнликини сориғинимизда, у бу учурни 5‏-башланғуч мәктәпкә берип мәктәп рәһбәрлиридин ениқлишимизни тәвсийә қилди. Биз униңдин арсланниң дәпнә ишлириға қайси орунниң мәсул болғанлиқини сориғинимизда, у: «әлвәттә, дөңмәһәллә сақчиханиси» дәп җаваб бәрди. Дөңмәһәллә сақчихана хадими, тәрбийиләштә түгәп кәткән арсланниң ениқ вапат болған күни вә сәвәбини сориғинимизда, у бу учурларни ашкарилашқа болмайдиғанлиқини ейтти. 

Һөрмәтлик радио аңлиғучилар, «доуйин» торидики мәзкур учурда арсланниң шу күндин икки күн бурун йәни 12-авғуст күни вапат болғанлиқи тилға елинған.

Пикирләр (0)
Share
Толуқ бәт