Lagérdin chiqqan 9 neper sabiq tutqun hammalliqtin tapqan pulining yérimini lagérgha tapshurghan

Muxbirimiz shöhret hoshur
2020-08-26
Élxet
Pikir
Share
Print
Uyghur ata balining xelq meydanigha tiklen'gen, qurban tulumning maw zédong bilen körüshken heykili aldida olturghan körünüshi. 2015-Yili 16-aprél, xoten.
Uyghur ata balining xelq meydanigha tiklen'gen, qurban tulumning maw zédong bilen körüshken heykili aldida olturghan körünüshi. 2015-Yili 16-aprél, xoten.
AFP

Lagérni püttürüp chiqip hammalliq qiliwatqan tejribilik shopur erkin hashim heqqide ilgirilep élip barghan éniqlashlirimiz dawamida, paxteklidiki erkin hashim qatarliq lagérdin chiqqan 9 neper sabiq tutqunining lagér xadimlirining nazariti astida bir yük shirkitide hammalliq qiliwatqanliqi we bulargha normal ishchilardin yérim hesse töwen ma'ash bérilgendin bashqa, ma'ashining az kem yérimini lagérgha tapshuriwatqanliqi ashkarilandi.

Ötken aydiki éniqlishimizda mekit nahiysede lagérdin chiqqanlarning mexsus bir a'ililikler lagérigha orunlashturulghanliqi we ularning shu lagérda a'ilisi bilen bille yashashtin bashqa erkinliki yoqluqi؛ bolupmu ularning esli mehellsidiki uruq-tughqan we dost buraderliri bilen ruxsetsiz körüshelmeydighanliqi melum bolghanidi. Bu heptidiki éniqlishimiz dawamida qeshqer paxteklide lagérdin chiqqan bir türküm tutqunlarning yene lagér xadimlirining nazariti astida ishlewatqanliqi we ish heqqining yérimige yéqinini lagérgha tapshuriwatqanliqi ashkarilandi. Paxteklidiki alaqidar xadimlarning bayanliridin melum bolushiche, paxtekli yézisining bir kentidiki lagiridin chiqqan erkin hashim qatarliq 9 neper sabiq tutqun, lagér xadimliri teripidin qeshqer shehiridiki bir yük toshush shirkitige ishqa orunlashturulghan. Bular bu jayda künige 10 sa'ettin 7 künche ishlep 2200 yüen heq alghan؛ bu pulning 900 yüenini lagérgha tapshurghan.

Bayan qilinishiche, bu yük shirkiti qeshqerning qizil dégen jayigha yéqin bolup, biz weziyettin xewerdar kishi teminligen alaqe uchurliri boyiche, erkin hashim qatarliq 9 sabiq lagér tutquni ishlewatqan yük shirkitige téléfon qilduq. Öz qol astida 57 neper hammal barliqini tilgha alghan mezkur shirket amanliq xadimi bu shirkettiki ishchilarning normalda 4-5 ming yüen arisida heq alidighanliqini ashkarilidi. Emma bu xadim, lagérdin ekilin'gen erkin hashim qatarliqlargha néme üchün töwen heq bérilidighanliqi heqqide melumat bérelmidi. Bu xadim öz qol astidiki 57 hammaldin qanchisining lagérdin chiqqanlar ikenliki heqqidiki so'alimizgha jawab bermidi. Emma u erkin hashim qatarliq 9 sabiq lagér tutqunining bu ish ornidimu xitay tili öginish we bayraq chiqirish qatarliq siyasiy pa'aliyetlerge qatnishiwatqanliqini yoshurmidi.

Ilgiriki éniqlashlirimizda, lagér xadimlirining bir türküm tutqunlarni heptilik yaki ayliq ishqa orunlashturup, ularning ish heqqini lagérning kirimi qiliwatqanliqi, lagér tutqunlirining bolsa, bu ishlesh pursitidin paydilinip tashqi dunyani, jümlidin bir qisim uruq-tughqanlirini körüwélish pursitige érishiwatqanliqini melum qilghan. Emma ularning shu bir künlük ish mudditi toshqandin kéyin yene lagérgha ekétiliwatqanliqi melum bolghan. Erkin hashim we kamérdashlirining perqliq teripi, ularning her küni kechte öz a'ilisige qaytishi we a'ilisi bilen birlikte ötüshi iken.

Weziyettin xewerdar kishi, lagér bashqurghuchilirining lagér tutqunlirini ishqa orunlashturushta qiyinchiliqqa uchrawatqanliqi, yeni ish orunlirining sabiq tutqunlarni ishqa élishni xalimaywatqanliqi, lagér bashqurghuchilirining peqet töwen ish heqqige kélishish arqiliq, tutqunlarni ishqa séliwatqanliqini melum qilghanidi. Weziyettin xewerdar bu kishi tutqunlarning bu töwen ish heqqige özi xalap emes peqet da'irilerning orunlashturushi, yeni jazasini ijra qilish üchün qobul körgenlikini bayan qilghanidi. Emma mezkur shirketning amanliq xadimi lagér bashqurghuchiliri bilen shirket arisida bu kishilerni ishqa orunlashturush we ish heqqi bérishte qandaq kélishim barliqini tilgha almidi.

Igilen'gen uchurlardin lagér tutqunlirining bezilirining lagérda qurulghan zawutlarda, bezilirining lagér sirtidiki zawut yaki mulazimet orunlirida ishlewatqanliqi, ularning beziliri pütünley heqisiz ishlise, bezilirining erzan bahada ishlitiliwatqanliqi melum. Emma bundaq perqliq ishlitilishide, tutqunlarning atalmish jinayet derijisining ölchem qiliniwatqanliqi we yaki yerlik da'irilerning öz keypi boyiche ish tutuwatqanliqi melum emes.

Ilgiri ashkarilan'ghan xitay hökümitige a'it qurulush toxtamliridin, yéngisar qatarliq jaylarda lagér qurulushi chiqimining yerlik hökümetlerge artilghanliqi melum bolghanidi. Muhajirettiki Uyghur közetküchiler lagér qurulghandin buyan zor sanda Uyghur soda-sana'etchilerning tutulghanliqi we ularning mal-mülkining musadire qilin'ghanliqigha asasen xitay da'irilirining lagér chiqimini Uyghur xelqining özige tölitiwatqanliqini ilgiri sürüshkenidi.

Toluq bet