Eskisheher osman gazi uniwérsitétida “Zulum astidiki sherqiy türkistan” témisida léksiye pa'aliyiti ötküzülgen

Ixtiyariy muxbirimiz azigh
2022-01-06
Share
Eskisheher osman gazi uniwérsitétida “Zulum astidiki sherqiy türkistan” témisida léksiye pa'aliyiti ötküzülgen Türkiyening eskisheher osman gazi uniwérsitéti ilahiyet fakultétining yighin zalida “Zulum astidiki sherqiy türkistan” témisida ötküzülgen léksiye pa'aliyitide kishilik hoquq pa'aliyetchisi medine nazimi xanim léksiye sözlimekte. 2022-Yili 6-yanwar, türkiye.
RFA/Azigh

6-Yanwar küni türkiyening eskisheher osman gazi uniwérsitéti ilahiyet fakultétining yighin zalida “Zulum astidiki sherqiy türkistan” témisida léksiye pa'aliyiti uyushturulghan. Mezkur pa'aliyetni eskisheher osman gazi uniwérsitéti ilahiyet fakultéti we kishilik hoquq we höriyet kulubi birliship orunlashturghan bolup, léksiyege fakultét mudiri, oqutush bölümining munasiwetlik xadimliri, oqutquchilar we oqughuchilar bolup 100din köp kishi qatnashqan.

Pa'aliyetke “Lagér tutqunliri munbiri” ning mes'ulliridin kishilik hoquq pa'aliyetchisi medine nazimi xanim teklip qilin'ghan bolup, medine xanim yéghin'gha qatnashqan oqutquchi-oqughuchilargha Uyghur élining nöwettiki weziyiti toghrisida tepsiliy melumat bergen.

Medine xanim xitay hökümiti teripidin ziyankeshlikke uchrighan singlisi mewlüde nazimining hékayisi arqiliq “Sherqiy türkistandiki irqiy qirghinchiliq we jaza lagérliri toghrisi” da pa'aliyetke qatnashquchilargha melumat bergen. Uningdin bashqa yene wetendiki a'ile ezaliri bilen alaqilishelmeywatqan muhajirettiki Uyghurlarning ehwali toghrisidimu toxtalghan. Léksiye dawamida medine xanim oqutquchi we oqughuchilarning Uyghur mesilisi bilen munasiwetlik so'allirigha jawab bergen.

Türkiyening eskisheher osman gazi uniwérsitéti ilahiyet fakultétining yighin zalida “Zulum astidiki sherqiy türkistan” témisida ötküzülgen léksiye pa'aliyitide kishilik hoquq pa'aliyetchisi medine nazimi xanim léksiye sözlimekte. 2022-Yili 6-yanwar, türkiye.

Biz mezkur pa'aliyetni orunlashturghuchilardin pa'aliyet heqqide melumat igileshke tirishtuq, biraq ziyaret telipimiz ret qilindi.

Uyghur kishilik hoquq pa'aliyetchisi medine nazimi xanim ziyaritimizni qobul qilip, özining mezkur yighinda Uyghurlar uchrawatqan irqi qirghinchiliq toghrisida oqutquchi-oqughuchilargha melumat bergenlikini, oqughuchilarning Uyghur mesilisige bolghan qizghinliqidin intayin tesirlen'genlikini éytti.

Medine xanim yene mezkur yighinda xitay xelqining Uyghur irqi qirghinchiliqigha bolghan pozitsiyesi we türkiyening Uyghur siyasiti toghrisida her xil mulahizilerning otturigha qoyulghanliqini éytti.

Xitay hökümiti türkiyediki nopuzini kücheytishke urunuwatqan bügünkidek weziyette akadémiyelik organlarda Uyghur mesilisining ilmiy uslubta anglitilishi mutexessisler teripidin intayin muhim dep qaralmaqta. Mezkur pa'aliyetke qatnashqan türkiyediki kishilik hoquq pa'aliyetchisi we sha'ir amine sedep xanim ziyaritimizni qobul qilip pa'aliyet heqqide toxtaldi. U yene ilmiy qurulushlar teripidin Uyghur mesilisining küntertipke élip kélinishining Uyghur mesilisi bilen munasiwetlik jama'et pikri hasil qilishta intayin muhim ikenlikini tekitlidi.

Xelq'ara jem'iyetning Uyghur mesilisige bolghan diqqiti künséri küchiyiwatqan bügünkidek weziyette türkiye we dunyaning bashqa jayliridiki ilmiy organlarning Uyghur mesilisini tetqiq qilish we melumat igilesh qizghinliqimu küchiyip barmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet