Лондон билән бирюсселда хитайға қарши чоң намайиш өткүзүлди

Ихтиярий мухбиримиз әркин тарим
2020-10-02
Share

Әнглийәниң лондон шәһиридики хитай әлчиханиси билән белгийә пайтәхти бирюсселдики хитай әлчиханиси алдида чоң намайиш өткүзүлди.

Дуня уйғур қурултийиниң чақириқи билән 1-өктәбир күни дуняниң һәрқайси җайлиридики уйғурлар көпләп олтурақлашқан шәһәрләрдә хитай хәлқ җумһурийити қурулғанлиқиниң 71 йиллиқи, шундақла уйғур елиниң коммунист хитай тәрипидин ишғал қилинғанлиқиниң 71 йиллиқи мунасивити билән хитайға қарши кәң-көләмлик намайишлар өткүзүлгән. Җүмлидин әнглийәниң лондон шәһиридики хитай әлчиханиси билән белгийә пайтәхти бирюсселдики хитай әлчиханиси алдидиму намайиш өткүзүлди. Иккила намайишқа уйғурлардин сирт бирқисим тибәтләр вә моңғуллар шуниңдәк хоңкоңлуқлар вә тәйвәнликләрму иштирак қилған.

Лондондики намайиш саәт үчтин йәттигичә өткүзүлгән болуп, намайишқа лондондики уйғурлардин башқа йәнә либерал партийәсиниң вәкили вә кишилик һоқуқ органлириниң вәкиллири, шундақла бирқисим тибәтликләр, хоңкоңлуқлар, тәйвәнликләр вә җәнубий моңғулийәликләрму қатнашқан.

Намайишта д у қ ниң лондондики ишханисиниң мәсули рәһимә мәхмут ханим уйғурларға вакалитән нутуқ сөзләп, хитайниң шәрқий түркистан хәлқи үстидин елип бериватқан «ирқий қирғинчилиқ» сияситини қаттиқ әйиблигән. Намайишчилар қоллирида «тибәтләргә әркинлик, хоңкоңлуқларға әркинлик, хитай уйғурларға елип бериватқан ирқий қирғинчилиқини тохтатсун, кишилик һоқуқ тәшкилатлири көзүңни ач» дегән лозункиларни көтүргән һалда хитай әлчиханиси алдида 4 саәт намайиш қилған. Рәһимә мәхмут ханим нәқ мәйдандин зияритимизни қобул қилип намайиш тоғрисида мәлумат бәрди.

Әнглийә уйғур җәмийити башқуруш һәйити әзаси керәм заһир әпәнди лондонда икки йәрдә хитайға қарши намайиш өткүзүлгәнликини, әлчихана алдидики намайишқа 400 әтрапида киши иштирак қилғанлиқини баян қилди.

10-Айниң 1-күни уйғур, тибәт вә моңғуллардин болуп 700 әтрапида киши белгийә пайтәхти бирюсселдики хитай әлчиханисиниң алдиға җәм болуп хитайниң 71 йилдин буян елип бериватқан бесим сияситигә наразилиқ билдүрди.

Бу қетимлиқ зор намайиш бирюссел вақти чүштин кейин саәт 3 тә «шәрқий түркистан истиқлал марши» билән башланған болуп, намайишқа бирюссел вә униң әтрапидики уйғурлар, тибәтләр, моңғуллар, хоңкоңлуқлар, тәйвәнликләр вә демократ хитайларму иштирак қилған. Белгийә уйғур җәмийити рәиси абдуллам рано әпәнди зияритимизни қобул қилип, намайишниң наһайити яхши өткәнликини баян қилди.

У, намайишқа уйғурларниң бурунқиға қариғанда техиму актиплиқ билән қатнашқанлиқини баян қилди.

Биз мәзкур намайишқа иштирак қилған уйғурлар биләнму телефон сөһбити елип бардуқ. Улар һәммә бирдәк хитайниң шәрқий түркистанни бесивалғанлиқиниң 71 йиллиқи мунасивити билән өткүзүлгән намайишта хитайни қаттиқ әйибләйдиғанлиқини, хитайни шәрқий түркистандин чиқип кетишкә чақирғанлиқини тәкитләшти.

Белгийәниң пайтәхти бирюсселдики явропа парламенти бинасиниң алдида 2018-йили 4-айниң 27-күниму д у қ 5000 киши иштирак қилған намайиш уюштурғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.