500 Din artuq kishi londondiki xitay elchixanisi aldida namayish ötküzgen

Ixtiyariy muxbirimiz erkin tarim
2020-01-20
Élxet
Pikir
Share
Print
"Bir dunya herikiti" teshkilatining uyushturushi bilen xitay elchixanisi aldida ötküzülgen namayishtin körünüsh. 2020-Yili 19-yanwar, london.
"Bir dunya herikiti" teshkilatining uyushturushi bilen xitay elchixanisi aldida ötküzülgen namayishtin körünüsh. 2020-Yili 19-yanwar, london.
RFA/Erkin Tarim

En'gliyediki toluq ottura mektep oqughuchiliri qurghan "Bir dunya herikiti" teshkilatining uyushturushi bilen 1-ayning 19-küni xitayning londonda turushluq elchixanisi aldida namayish ötküzülgen.

Uyghurlar, tibetlikler we xongkongluqlarni qollash munasiwiti bilen ötküzülgen bu namayishning meqsiti xitayning tibette, Uyghur diyarida we xongkongda élip bériwatqan wehshiyane basturush siyasitini pash qilishtin ibaret iken.

Namayishqa burun Uyghurlar üchün namayishqa qatniship baqmighan nurghun kishiler bolup, 500 etrapida kishi ishtirak qilghan. Ular qollirida ay-yultuzluq kök bayraq we lozunkilarni kötürgen halda "Uyghurlargha erkinlik, xitay jaza lagérlirini taqisun, xitaylar sherqiy türkistandin chiqip ketsun, xitay Uyghurlargha élip bériwatqan irqiy qirghinchiliqni toxtatsun!" dégendek sho'arlarni towlashqan.

Bu heqte téléfon ziyaritimizni qobul qilghan en'gliyediki Uyghur pa'aliyetchi, dunya Uyghur qurultiyining londonda turushluq wekili rehime mexmut xanim 1-ayning 19-küni londondiki xitay elchixanisi aldida ötküzülgen namayish toghrisida melumat berdi. U xitaygha qarshi namayishning meqsitini izahlap ötti.

Mezkur namayishqa londonda tonulghan 2 imam, bir xristi'an pop, köp sanda yehudiy pa'aliyetchiler, kishilik hoquq teshkilatlirining mes'ulliri qatnashqan we nutuq sözligen. Rehime mexmut xanim bu heqte melumat berdi.

Rehime mexmut xanim yene bu kishilerning birliship en'gliye bash ministirigha mektup yazghanliqini, namayishning muweppeqiyetlik ötkenlikini, kishilerge ümid bolghanliqini bayan qildi.

Melum bolushiche, londonda burundin tartip xitaygha naraziliq bildürüsh pa'aliyetliri, bolupmu namayishlar izchil halda ötküzülüp kélinmektiken. Ötken yilining otturiliridin tartip en'gliye parlaméntidimu bezi pa'aliyetler élip bérilishqa bashlighan. Bolupmu en'gliyening emgek partiyesi ötken yili 9-ayda "Uyghurlarni qollash herikiti" namida bir guruppa qurup, her ayning 5-küni xitaygha qarshi naraziliq namayishi ötküzüshni qararlashturghan idi. Bu namayishlargha eng köp bolghanda 200 etrapida kishi qatniship kelgen idi. En'gliye Uyghur jem'iyitining bashqurush hey'iti ezasi kérem zahir ependining éytishiche, bu qétimliq namayishqa 500 din köp kishi ishtirak qilghan. Bu en'giliyede Uyghurlarni qollash yüzisidin ötküzülgen eng chong namayishlardin biri hésablinidiken.

Dunya Uyghur qurultiyi mes'ullirining qatnishishi bilen 2019-yil 24-iyul küni en'gliye parlaméntida guwahliq bérish yighini uyushturulush bilen bir waqitta yene yighin xatimiside "Barliq partiye wekillirining awaz qoshushi" bilen "Uyghur dostluq guruppisi" qurulghan idi. Siyasiy közetküchiler aldimizdiki yillarda en'giliyede Uyghur dewasining téximu yuqiri kötürülidighanliqini ilgiri sürmekte.

Toluq bet