Luganodiki “Xitaygha nezer” pa'aliyitide gumanliq “Ziyaretchi” xitaylar parakendichilik keypiyati peyda qilghan

Bérndin ixtiyariy muxbirimiz hebibulla izchi teyyarlidi
2024.02.23
xitaygha-keskin-nezer-1.jpg (Soldin) d u q xelq'ara munasiwetler komitéti re'isi zumret'ay erkin, sélina morrél, rizwan'ay ilham lugano shehiride ötküzülgen “Xitaygha keskin nezer” témisidiki bir heptilik birleshme pa'aliyette. 2024-Yili 23-féwral, shiwétsariye.
RFA/Hebibulla Izchi

Shiwétsariyening lugano shehiride ötküzülüwatqan “Lugano kishilik hoquq wexpisi” sahibxaniliq qilghan, chong tiptiki “Xitaygha keskin nezer” témisidiki bir heptilik birleshme pa'aliyet jeryanida özlirini sayahetchi körsetken xitaylar kélip, parakendichilik keypiyati yaratqan. 18-Féwral bashlan'ghan bu bir heptilik pa'aliyet jeryanida, lugano sheher merkizidiki “Asilo siyahni kültür merkizi” ning chong zalgha xitayning jaza lagérlirining sizma resimliri we lagér tutqunliri resimliri tizilghan bolup, filim öyide chet'ellik muxbirlar, mutexessisler we binakarlarning chüshendürüshidiki jaza lagéri sin filimliri toxtimay quyulghandin bashqa lagér shahiti qelbinur sidiq, gülbahar xatiwaji qatarliqlarning guwahliq widiyoliri we lagér tutqunlirining resimlik widiyosi chong ékranda qoyulup turghanidi. 23-Féwral bu pa'aliyetke sahibxaniliq qilghuchi “Lugano kishilik hoquq wexpisi” din wiktoriye xanimning bildürüshiche, bu bir hepte jeryanida bezibir gumanliq xitaylar neq meydan'gha kélip resim tartqan we sin'gha alghan. Shundaqla wiktoriye xanimdin bezi so'allarni sorap, parakendichilik sélishqa urun'ghan. Wiktoriye xanim ziyaritimizni qobul qilip, bu heqtiki tepsilatlarni biz bilen ortaqliship mundaq dédi:

 “Bu pa'aliyet bashlan'ghan deslepki kündin bashlap, bu yerlik emes xitaylarmu kirip körüshke bashlighanidi. Kéyinki künlerde oxshash xitaylar bir nechche qétim keldi. Bulardin biri mendin so'allarni sorashqa bashlidi. Bu pa'aliyetni némige teshkillidingla? kimler we qanchilik kishi qatnashti? dégendek so'allarni soridi. Charshenbe küni yene keldi we bu yerdiki ademlerni resim tartishqa we sin'gha élishqa bashlidi. Biz, bu waqitta bularning normal ademler emeslikini hés qilduq. ”

Lugano shehiride ötküzülgen “Xitaygha keskin nezer” témisidiki bir heptilik birleshme pa'aliyette lagér shahiti qelbinur sidiq xanim sin arqiliq doklat bermekte. 2024-Yili 23-féwral, shiwétsariye.
Lugano shehiride ötküzülgen “Xitaygha keskin nezer” témisidiki bir heptilik birleshme pa'aliyette lagér shahiti qelbinur sidiq xanim sin arqiliq doklat bermekte. 2024-Yili 23-féwral, shiwétsariye.
RFA/Hebibulla Izchi

 Wiktoriye xanim yene :siz ularni “Xitayning jasus gumandarliri dep qaramsiz?” dégen so'alimizgha shundaq jawab berdi: “Lugano sayahet shehiri, emma bu pesil asasen sayahetchi kelmeydighan pesil, bu ademler özini sayahetchi dégini bilen, yuqiri sewiyediki in'glizche, italyanchisidin bularning normal ademlikige kim ishinidu? yene birige bularning sorighan so'ali bu yerdiki körgen nersiler heqqide emes belki ular buni teshkilligüchi teshkilat we shexslerning uchurini soridi, shundaqla oghriliqche sin'gha élishti we resim tartishti. Emma bu pa'aliyet bashlinishtin burunla bundaq nazaret qilishlar bashlan'ghanidi”.

Lugano shehiride ötküzülgen “Xitaygha keskin nezer” témisidiki bir heptilik birleshme pa'aliyitige qatnashquchi bir xanim lagér shahiti gülbahar xatiwaji xanimning imzasini almaqta. 2024-Yili 23-féwral, shiwétsariye.
Lugano shehiride ötküzülgen “Xitaygha keskin nezer” témisidiki bir heptilik birleshme pa'aliyitige qatnashquchi bir xanim lagér shahiti gülbahar xatiwaji xanimning imzasini almaqta. 2024-Yili 23-féwral, shiwétsariye.
RFA/Hebibulla Izchi

Bu heqte merkizi shiwéytsariyening zyurix shehiridiki, “Shiwéytsariye tibet dostluq jem'iyiti” ning xadimi we shiwéytsariyede chiqidighan “Tibetke nezer” pesillik zhurnilining bash muherriri bettina xanimmu ziyaritimizni qobul, wiktoriye xanimning éytqanlirini toluqlap shundaq deydu.

 “Bu bir heptilik pa'aliyitimiz nahayiti yaxshi ötti, biz üchünmu, shundaqla Uyghur pa'aliyetchiler we teshkilatlar üchünmu nahayiti yaxshi bir pa'aliyet boldi. Pa'aliyet jeryanida nurghun kishiler kirip neq meydanni ékskursiye qildi we so'allar sorashti. Hemmidin bekrek bizni xushal qilghini, filim salonigha her küni mektepler oqughuchilirini sinip boyiche ekélip körsetti. Emma bu jeryanda bezi ademni rahetsiz qilidighan ishlarmu yüz bergen boldi. Mesilen charshenbe, seyshenbe, düshenbe künliri xitayning ademliri kélip neq meydanda resim tartidighan, widiyogha alidighan ishlar yüz berdi. Wiktoriyedin we bashqilardin so'allarni sorap uchur élishqa tirishti. ”

Lugano shehiride ötküzülgen “Xitaygha keskin nezer” témisidiki bir heptilik birleshme pa'aliyitide lugano kishilik hoquq weqpidin wéktoriye xanim ziyaritimizni qobul qildi. 2024-Yili 23-féwral, shiwétsariye.
Lugano shehiride ötküzülgen “Xitaygha keskin nezer” témisidiki bir heptilik birleshme pa'aliyitide lugano kishilik hoquq weqpidin wéktoriye xanim ziyaritimizni qobul qildi. 2024-Yili 23-féwral, shiwétsariye.
RFA/Hebibulla Izchi

Bu bir heptilik pa'aliyetning bügünki, yeni 23-féwraldiki pirogrammisigha, filimdiki shahitlarni körgüchiler bilen uchrashturush meqsitide firansiyediki lagér shahiti gülbahar xatiwaji xanimmu teklip qilinip yétip kelgenidi. Filim öyide ékranda uning sergüzeshtlirini körgen kishiler arqa-arqidin gülbahar xanim bilen xatire süretke chüshüshti we kitabigha imza qoyghuzushti.

Xeter astidiki milletlerni qoghdash teshkilatidin sélina morrél xanim(ongda) qurultay wekilliri we shiwétsariye Uyghur jem'iyiti re'isi rizwan'ay bilen. 2024-Yili 23-féwral, shiwétsariye.
Xeter astidiki milletlerni qoghdash teshkilatidin sélina morrél xanim(ongda) qurultay wekilliri we shiwétsariye Uyghur jem'iyiti re'isi rizwan'ay bilen. 2024-Yili 23-féwral, shiwétsariye.
RFA/Hebibulla Izchi
Bu munasiwet bilen gülbahar xanim ziyaritimizni qobul qilip: “Bügün bu yerge, sherqiy türkistandiki zulum we xitayning irqiy qirghinchiliq jinayitini anglatqili keldim” deydu

“Lugano kishilik hoquq wexpisi” sahibxaniliq qilghan, dunya Uyghur qurultiyi, shiwéytsariye Uyghur jem'iyiti, xeter astidiki milletlerni qoghdash teshkilati, tibet teshkilatliri birliship ötküzüwatqan, shiwéytsariye radiyo-téléwiziyesi hemkarlashqan “Xitaygha keskin nezer” namidiki bu pa'aliyetning ötküzülüwatqanliqigha bir hepte bolghan bolsimu yenila “Asilo siyahni medeniyet merkizi” ékskursiye qilghuchilar bilen liq tolghan bolup, bu pa'aliyet yekshenbe künigiche dawam qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.