Истанбулда 7-нөвәтлик уйғур ана тил вә магистир, доктор оқуғучилар илмий муһакимә йиғини ечилди

Ихтиярий мухбиримиз арслан
2017.02.20
abdulhemit-qaraxan-abduweli-ayup.jpg Уйғур академиси рәиси абдулһәмит қарахан уйғур ана тил тәшәббусчиси абдувәли аюпқа хатирә буюм соға қилди. 2017-Йили 19-феврал, түркийә.
RFA/Arslan

19-Феврал дуня ана тили күни мунасивити билән истанбулдики уйғур академисиниң уюштуруши билән 7-нөвәтлик уйғур ана тил вә магистир, доктор оқуғучилар илмий муһакимә йиғини ечилди. Йиғинға истанбулда яшаватқан уйғур зиялийлар вә оқуғучилар болуп көп санда киши қатнашти.

Йиғинда алди билән истиқлал марши оқулғандин кейин, уйғур академиси рәиси абдулһәмит қарахан ечилиш нутқи сөзләп, йиғин әһлиниң ана тил байримини тәбриклиди вә уйғур ана тилиниң әһмийити тоғрисида тохталди.

Кейин уйғур ана тил тәшәббусчиси абдувәли аюп, “уйғур аилә маарипида ана тилниң роли” дегән темида сөз қилип, аилиләрдә пәрзәнтләргә уйғур тилини өгитишниң муһимлиқи тоғрисида әмәлий мисалларни көрситип сөзләп өтти.

Йиғинға нәччә онлиған уйғур пәрзәнтлири вә аялларму кәлгән болуп, уйғур өсмүрләр һәр хил темиларда әдәбият, сәнәт номурлири көрсәтти. Өсмүрләр, шеир декламатсийә вә нахша оқуп йиғин әһлиниң қизғин алқишиға еришти.

Йиғинда йәнә, уйғурлар вә ана тил һәққидә мукапатлиқ соал сораш паалийити елип берилди. Соалларға җаваб бәргән өсмүрләргә һәр хил оюнчуқ мукапат берилди.

Кейин уйғур академийисиниң рәиси абдулһәмит қарахан сәһнигә чиқип, уйғур академийисиниң 2015-2016-йиллиқ хизмәт, паалийәтлири тоғрисида доклат бәрди.

Чүшлүк тамақтин кейин, йиғинниң 2-бөлүми башланди. 2-Бөлүмидә истанбулда оқуватқан уйғур магистир вә доктор оқуғучилардин бир қисим тәтқиқатчилар, “түркийә вә чинниң иқтисади риқабәт күчи”, “чин-исраилийә мунасивити”, “тарихта чин ханиданлириниң уйғур дияриға әвәткән әлчилири немиләрни елип қайтти?” дегән темиларда тохталди.

Толуқ бир күн давам қилған бу йиғин қизғин кәйпият ичидә ахирлашти.

Бу һәқтики программимизниң тәпсилатини юқиридики авазлиқ улиништин аңлиғайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.