Ana til künide “Uyghur ana til muhakime yighini” chaqirildi

Ixtiyariy muxbirimiz erkin tarim
2015.02.23
muyesser-abdulexet-305.jpg “5-Nöwetlik Uyghur ana til muhakime yighini” Uyghur doktor aspiranti muyesser abdulexet xanim “Yoquluwatqan tillar we Uyghur tili” témisida sözlimekte. 2015-Yili 22-féwral, türkiye.
RFA/Erkin Tarim

22-Féwral yekshenbe chüshtin kéyin “5-Nöwetlik Uyghur ana til muhakime yighini” chaqirildi. Istanbulda pa'aliyet élip bériwatqan xelq'ara Uyghur akadémikler jem'iyiti yeni Uyghur akadémiyisi teripidin uyushturulghan yighin'gha türkiyediki bezi Uyghur ilmiy tetqiqatchiliri, doktorluq we magistirliq oquwatqanlar bolup 70 etrapida kishi qatnashti.

Yighinning küntertipige bina'en yighinning échilish nutqini Uyghur akadémiyisining mudiri ablet turan ependi qildi. Arqidin u, doktor erkin sidiqning yighin'gha ewetken tebrik xétini oqudi. Arqidin Uyghur doktor aspiranti muyesser abdulexet xanim “Yoquluwatqan tillar we Uyghur tili” témisida, quddus hapiz ependi “Uyghur yéziqi” toghrisida, béykent uniwérsitéti oqutquchisi meghpiret kamal yunusoghlu xanim bolsa “Uyghur tilining tarixiy tereqqiyat basquchliri” témisida doklat bérip ötti. Arqidin Uyghur balilardin muhemmet beshtoghraq “Ana til” dégen shé'irni déklamatsiye qilghandin kéyin, mexmutjan litip “Ana til” dégen naxshini dutar bilen orunlap berdi.

Biz yighin toghrisida melumat élish üchün Uyghur akadémiyisi mudiri doktor ablet turan ependi bilen söhbet élip barduq.

U, Uyghur tili yoq bolush aldida turmighan bolsimu, Uyghur tilining qollinish da'irisining barghanséri tariyip kétiwatqanliqini, bundaq bir peytte Uyghur akadémiyisining her yili dégüdek bu xil ilmiy muhakime yighinini chaqirish arqiliq, Uyghurlarning Uyghur tiligha bolghan sezgürlükini ashurushqa tirishiwatqanliqini, buning melum derijide tesiri boluwatqanliqini éytti.

Yighinda ilmiy doklat bergen tilchi quddus hapiz bilenmu söhbet élip barduq. U, ana tilni qoghdap qélishning ehmiyiti toghrisida melumat berdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.