Bélgiyediki Uyghurlar ana tilni qoghdashqa atlandi

Ixtiyariy muxbirimiz abduweli ayup
2018.02.22
Dunya-uyghur-ayallar-birliki-belgiye-6.jpg Dunya Uyghur ayallar birlikining pa'aliyitide ösmürler nomur körsetmekte. 2016-Yili 15-may, bélgiye.
Photo: RFA

2018-Yili 18-féwral küni bélgiyening antwérp shehiride Uyghurlar bir yerge jem bolup üch kündin kéyin kélidighan dunya ana til künini xatirilidi.

Pa'aliyette mezkur sheher we yiraq yéqindin kelgen Uyghur balilar ussul oynap naxsha éytti, shé'ir, nesir, mesel, chöcheklerni oqudi we balilar dramisi orunlidi. Pa'aliyette chonglarmu nomurlarni orunlap balilargha ülge boldi. Xatirilesh pa'aliyitini “Ana til guruppisi” dep atalghan bélgiyediki yash ata-anilar teshkilligen bolup ular 2018-yilliq xizmet pilanigha asasen mezkur pa'aliyetni wujudqa chiqarghan.

Mezkur pa'aliyetni teshkilleshke küch chiqarghan, balilargha pidakarliq bilen ana til ögitishni 2017-yili yazdin bashlap dersxanida we torda dawam qilip kéliwatqan bélgiyediki aktiplardin dilnur alim xanim ehwal tonushturdi.

Ana til künini xatirilesh pilani bélgiyediki “Ata-anilarning ayliq söhbiti” dep atilidighan yighilishida bixlan'ghan bolup, “Ana til guruppisidin” éli perwazchi ependi bu pa'aliyetni ötküzüsh sewebi heqqide toxtaldi.

Pa'aliyette riyasetchilikni balilar üstige alghan bolup, ularning rawan Uyghur tilida dostlirini nomur orunlashqa chaqirishliri we chonglarni sözge, sehnige teklip qilishliri chawaklar bilen alqishlandi.

Bu pa'aliyettiki aktip ishtirakchi qizchaq nergize azad shatliq minutliridiki tuyghulirini biz bilen munu sözler arqiliq ortaqlashti.

Bu bélgiyediki tunji qétimliq ana til pa'aliyiti bolup nomur orunlighan balilarla mukapatqa ériship qalmay pa'aliyetni teshkilligen pidakarlarmu ata anilar teyyarlighan hediyeler bilen tartuqlandi.

Ana til pidakarliridin ekber tursun ependi pa'aliyetning jeryani heqqide toxtaldi.

Ana til pa'aliyiti antwérp shehiridiki türklerning teshkilat zalida uyushturulghan. Bu orunni uqushqan we pa'aliyetni teshkilleshke küch chiqarghan qazaqistan Uyghurliridin gülnisa tayipowa xanim uchrighan qiyinchiliqlar heqqide uchur berdi.

Ana til pa'aliyitide nomurlarni teshkilleshte qismen qiyinchiliqlar yüz bergen bolup asasliqi balilarning muqim yighilish orni bolmasliq, ata anilarning pozitsiyesi estayidil bolmasliq, teyyarliq waqti yéterlik bolmasliq qatarliqlar iken.

Halbuki pa'aliyettiki utuq ata-anilarni hayajan'gha sélip pozitsiyeside özgirish peyda qilghan. Bu heqte balilarning ana til yétekchisi dilnur alim xanim xushalliqlirini bayan qildi.

Bélgiyediki Uyghur balilarning ana tilni pishshiq igilishi üchün bundin kéyin qandaq pilanlarning barliqi heqqide sorighinimizda dilnur xanim bularning tepsilatini biz bilen ortaqlashti.

Bélgiyede yashawatqan Uyghurlarning sani 500 din ashidighanliqi mölcherlenmekte. Bu Uyghurlarning köpreki qazaqistan qatarliq ottura asiya döletliridin kelgenler bolup, ulardin risalet aripowa xanim 2017-yilning bashlirida türkiyedin kiril yéziqida neshr qilin'ghan ana til dersliki ewetküzüp balilarni terbiyeleshke tirishqan bolsimu, muweppeq bolalmighan. Shu yili yazda bélgiyening antwérp shehiride ana til guruppisini qurup chiqqan Uyghurlar yene bir qétim bash qoshup tetillik ana til kursi achqan, emma dawam qilalmay qalghan. Igilinishiche, bélgiye Uyghurliri bundin kéyin muqim bir ana til mektipi qurup chiqishqa teyyarliq qilmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.