Uyghur ana til tetqiqati muhakime yighini istambulda chaqirilmaqchi

Muxbirimiz erkin tarim
2017-02-12
Élxet
Pikir
Share
Print
Uyghur ana til tetqiqati muhakime yighinining élan süriti
Uyghur ana til tetqiqati muhakime yighinining élan süriti
RFA/Erkin Tarim


Uyghur akadémiyisining uyushturushi bilen 2-ayning 19-küni istambulda 7-nöwetlik Uyghur ana til tetqiqati, magistir we doktorluq unwanliri üchün oquwatqan oqughuchilar ilmiy muhakime yighini ötküzülmekchi.

Yighin'gha türkiyediki bezi Uyghur tetqiqatchilar we türkiyening herqaysi uniwérsitétlirida magistirliq hem doktorluq üchün oquwatqan oqughuchilar ishtirak qilmaqchi. 2-Ayning 19-küni, yeni yekshenbe küni etigen sa'et 09:30 da bashlinidighan yighinda, Uyghur akadémiyisining re'isi abdulxemit qaraxan ependi échilish nutiqi sözligendin kéyin, hazir enqerede turiwatqan Uyghur ana til pa'aliyetchisi abduweli ayup ependi, istanbul uniwérsitéti hazirqi zaman türkiy tilliri we edebiyati fakultéti oqutquchisi doktor rahile qeshqerli xanimlar Uyghur tili we Uyghur tili tetqiqati toghrisida doklat bermekchi. Chüshtin kéyin türkiyening herqaysi uniwérsitétlirida magistirliq we doktorluq oquwatqan Uyghur oqughuchilar Uyghurlarning tili, edebiyati, tarixi we Uyghur jem'iyiti, xelq'ara munasiwetler toghrisida élip barghan yéngi tetqiqatlirini yighin ehliliri bilen ortaqlashmaqchi.

Istanbul fatih sultan memet wexpi uniwérsitétining istanbul zeytinburni mewlewixanisidiki zalda ötküzülidighan ilmiy muhakime yighini toghrisida melumat igilesh üchün mezkur yighinni uyushturghuchi Uyghur akadémiyesining re'isi abdulxemit qaraxan ependi, Uyghur ana til pa'aliyetchisi abduweli ayup ependi we edirne tirakya uniwérsitétida tarix kespide doktorluq oquwatqan dawut jamal ependiler bilen téléfon söhbiti élip barduq.

Abdulxemit ependi 7-nöwetliki ötküzülidighan yighin toghrisida qisqiche melumat berdi.

Abduweli ayup ependi yighinda bermekchi bolghan doklati toghrisida qisqiche melumat berdi.

Dawut jamal ependi yighinda qedimki Uyghur tarixi toghrisida doklat béridighanliqini bayan qildi.

Abduweli ayup ependi ana til toghrisida chaqiridighan bu yighinning köp paydiliq bolidighanliqini tekitlidi.

Dawut jamal ependi herqaysi kesiplerde magistirliq we doktorluq oquwatqan oqughuchilarning bir yerge jem bolup, öz tetqiqatlirini ortaqlishishining zor ehmiyetke ige ikenlikini bayan qildi.

Abdulxemit qaraxan ependi Uyghur akadémiyesi her yili chaqiriwatqan bu yighinning ünümlük boluwatqanliqini ilgiri sürdi.

Uyghur ana til tetqiqati we magistirliq we doktorluq unwanliri üchün oquwatqan oqughuchilar ilmiy muhakime yighini 2010-yilidin béri her yili ötküzülüp kélinmekte. Yighinda asasliqi Uyghur tili toghrisida élip bérilghan tetqiqatlar we Uyghurlarning ana til sezgürlikini qandaq yuqiri kötürüsh mesilisi otturigha qoyulmaqta.

Toluq bet