Bayraq chiqirish murasimi ösmürlerde öchmes eslimilerni qaldurdi

Yawropadiki sherqi türkistanliq ösmürler dala pa'aliyitide orunlashturulghan, sherqiy türkistanning ay yultuzluq kök bayriqini chiqirish murasimidin körünüsh. 2015-Yili may, shiwétsiye.

Ötken hepte shiwétsiyede ötküzülgen yawropadiki sherqi türkistanliq ösmürler dala pa'aliyitide orunlashturulghan, sherqiy türkistanning ay yultuzluq kök bayriqini chiqirish murasimi yash ösmürlerde öchmes eslimilerni qaldurdi.

Muhajiret hayatida ösüp yétiliwatqan yash ösmürlerge wetenperwerlik terbiyisini bérish, wetinining jughrapiyesi, medeniyitini chüshinish muhim bolghandek, öz wetinining bayriqini tonush we uni qedirleshningmu muhimliqini chüshinip yetken, ösmürler dala pa'aliyitini orunlashturghuchi teshkilatlar bu murasimni ötküzüshni inchike pilanlap, ölchemlik dölet bayriqini ekeldürüp, bu qétimqi yash ösmürlerge bayraq chiqirish murasimi arqiliq ochuq ders ötken boldi.

Bayraq chiqirish murasimidin yash ösmürlerla emes, belki yighin'gha qatnashqan barliq yighin ehli hayajanlan'ghanliqini ipade qilishti.

Pa'aliyetke qatnashqan yash ösmürler bayraq chiqirish murasimidiki hésyatini bayan qildi. Ular pa'aliyetning tunji küni bayraq chiqirish murasimi qilin'ghanliqidin intayin söyün'genlikini, özlirining intayin hayajanlan'ghanliqini bildürüshti.

Ziyaritimizni qobul qilghan shiwétsiyede yashawatqan ziyaliy bextigül xanim özining tesiratini bayan qilip ötti.

Shiwétsiyedin pa'aliyetke qatnashqan bir ösmür qiz özining bayraq chiqarghandin kéyinki tesiratini ipadilep “Bizning nishanimiz belgilendi, bayraqni weten asminida lepilditish bizning nishanimiz boldi” dédi. Yene bir qiz bolsa, “Kélerki qétimliq pa'aliyette bizning dölet shé'irimizni oqup, dölet bayriqi chiqarsaq” dégen köngül izharini ipadilidi.