Istanbuldiki Uyghur yeslilerde oqush dawam qiliwatidu

2015 - Yili 3 - ayning 5 - küni biz “Sherqiy türkistan ma'arip we hemkarliq jem'iyiti” ning sefaköy we zeytinburnu rayonliridiki Uyghur yesli we “Qur'an” kursilirini ziyaret qilduq. Bu mekteplerde 4 - yashtin 6 - yashqiche bolghan oghul - qiz Uyghur perzentliridin 180 din artuq ösmür terbiyilenmekte iken.

Biz aldi bilen zeytinburnudiki Uyghur yeslini ziyaret qilduq. Uyghur yeslining mudiri xurshide xanim ziyaritimizni qobul qildi we yeslidiki balilarning oqush ehwali we bu yeslide ötülüwatqan terbiye xaraktérlik ders toghrisida sözlep berdi.

Bu yeslide hazir 100 din artuq perzentler ders oquwatqan bolup, bularning köpinchisi Uyghur perzentliridin terkib tapqan bolsimu bir qisimliri, özbék, qazaq we türk perzentlirini teshkil qilidiken.

Bu yeslide qur'an oqush, kichik sürilerni we qisqa du'alarni yadlash, diniy terbiye, edep - exlaq, örüp - adet we resim sizish türiliri boyiche ders ötilidiken.

Biz bu yeslidiki bir qisim balilar bilen söhbet élip barduq, perzentlerning beziliri bizge shé'ir oqup berdi, beziliri chong bolghanda doxtur bolidighanliqini, beziliri saqchi bolidighanliqini, bezliri bolsa oqutquchi bolidighanliqini ipadilidi.

Biz yene sefaköydiki Uyghur yeslini ziyaret qilduq. Sefakoydiki yeslide bizni yeslining mudiri rena xanim kütüwaldi we ziyaritimizni qobul qildi.

Rena xanimning bildürüshiche, bu yeslide 85 neper ösmür ders oquwatqan bolup bulardin 45 nepiri Uyghur perzentliri qalghanliri türk we özbék perzentliri iken.

Rena xanimning bildürüshiche yene, bu yeslide Uyghur tili, oqush, yézish we sözlishish, “Qur'an” oqush we kichik sürilerni we du'alarni yadlash, edep - exlaq terbiye dersi qatarliq türler boyiche ders oqutulidiken. Uningdin bashqa yene resim sizish, oyun oynash yéqin etraplarni seyle - sayahet qildurush qatarliq pa'aliyetler élip bérilidiken.

Biz bu yeslidiki bir qisim Uyghur perzentliri bilen söhbet élip barduq. Özini sümeyye dep tonushturghan bir qiz Uyghurche shé'ir déklamatsiye qilip berdi.

Uyghur yeslining mudiri rena xanim bu yeslining 2007 - yili échilghanliqini shuningdin buyan hazirghiche 1000 din artuq ösmürni terbiyilep qatargha qoshqanliqini, bu yeslide oqughan perzentlerning mekteplerde elachi bolup oqughanliqini bildürdi.