Балилар әдәбияти язғучиси мәмәтҗан аблиз бөриярниң тутқунда икәнлики дәлилләнди

Мухбиримиз шөһрәт һошур
2018-11-19
Елхәт
Пикир
Share
Принт
Балилар әдәбияти язғучиси мәмәтҗан аблиз бөрияр әпәнди.
Балилар әдәбияти язғучиси мәмәтҗан аблиз бөрияр әпәнди.
Oqurmen teminligen

Мухбиримизниң қәшқәр уйғур нәшриятидики тутқунлар һәққидә елип барған ениқлашлири давамида мәзкур нәшриятниң оқуп тәкшүрүш ишханисиниң мудири, балилар әдәбияти язғучиси мәмәтҗан аблиз бөриярниңму тутқунда икәнлики дәлилләнди. Вәзийәттин хәвәрдар кишиләрдин бири униң «бөрияр» дегән тәхәллуси сәвәблик тутулғанлиқини илгири сүрсә, йәнә бири мәмәтҗан аблиз бөрияр оқуп тәкшүргән 100 дин артуқ китабта «мәсилә» чиққанлиқи сәвәблик тутулғанлиқини илгири сүрмәктә.

Қәшқәр уйғур нәшриятидин 14 кишиниң тутқунда икәнлики һәққидә радийомизға кәлгән инкаста мәзкур нәшриятниң оқуп тәкшүрүш бөлүминиң мудири мәмәтҗан аблиз бөриярниңму тутқунда икәнлики йезилған.

Материялларда тонуштурулушичә, мәмәтҗан аблиз бөрияр 1958‏-йили үстүн атушта туғулған. 1983‏-Йили шинҗаң университетини пүттүрүп, 1986‏-йилиниң йил ахириға қәдәр шинҗаң маарип институтида оқутқучилиқ қилған. 1987‏-Йили биринчи айдин бу йил тутқун қилинғанға қәдәр қәшқәр уйғур нәшриятида тәһрир вә мудир болуп хизмәт қилған.

Биз мәмәтҗан аблиз бөриярниң әһвалини ениқлаш үчүн қәшқәр уйғур нәшриятиниң ишхана мудири гав лиға телефон қилдуқ. У мәмәтҗан аблизниң ишқа келиватқан яки кәлмәйватқанлиқи һәққидики соалимизға җаваб берәлмиди.

Радийомизға кәлгән инкаста мәмәтҗан аблиз бөриярниң бу йил өктәбирниң дәсләпки һәптиси тутқун қилинғанлиқи йезилған. Қәшқәр уйғур нәшриятиниң қоғдаш хадими мәмәтҗан аблиз бөриярниң тутқун қилинғанлиқидин хәвири барлиқини, әмма делосиниң тәпсилатидин хәвәрсизликини ейтти. Қәшқәр уйғур нәшрияти тәвә болған болған доңху(шәрқий көл) сақчиханисиниң хадимиму мәмәтҗан аблизниң тутқун қилинғанлиқини инкар қилмиди.

Йәнә радийомизға кәлгән инкаста мәмәтҗан аблиз тәкшүрүп имза қойған 100 дин артуқ китабтин «мәсилә» чиққанлиқи, шуңа униң делосиниң сотқа тапшурулғанлиқи йезилған. Қәшқәр вәзийитидин хәвәрдар кишиләрдин бири униң «бөрияр» дегән тәхәллусиниңму даириләрдә «бөлгүнчилик» гумани қозғиғанлиқини илгири сүрди.

Қәшқәрдики алақидар хадимлардин бири мәмәтҗан аблизниң бу йилниң бешида пенсийәгә илтимас сунғанлиқи, әмма қәшқәр уйғур нәшриятидин байқалған «мәсилилик китаблар» арисида униңму җавабкарлиқи бар китаблар болғанлиқи үчүн пенсийә илтимасиниң рәт қилинип үстидин тәкшүрүш елип берилғанлиқи вә бир айниң алдида тутуп кетилгәнликини дәлиллиди.

Материялларда тонуштурулушичә, мәмәтҗан аблиз бөрияр уйғур өсмүрлириниң әнәниви оюнлирини қезиш вә рәтләш билән изчил шуғуллинип кәлгән болуп, «уйғур өсмүрлириниң әнәниви оюнлири» намлиқ 4 томлуқ китаби нәшр қилинған. У йәнә «уйғур балилар еғиз әдәбияти қамуси», «уйғур балилар қошақлири вә тепишмақлири» қатарлиқ китабларни түзүп нәшр қилдурған. Униң йәнә «сирлиқ ахшам» намлиқ бир нәсрләр топлимиму нәшр қилинған. Вәзийәттин хәвәрдар кишиләр даириләрниң тутқун қилинған язғучи вә тәһрирләрниң қайси китабидин «мәсилә» чиққанлиқини җәмийәткә ашкарилимайватқанлиқини илгири сүрди.

Ениқлашлиримиздин мәмәтҗан аблиз бөриярниң тутқун қилинғанлиқи дәлилләнгән болсиму, әмма униң нөвәттә йиғивелиш лагерида яки қамақханида )тутуп туруш орнида( икәнлики техи җәзмләшмиди. Мәмәтҗан аблиз бөриярниң тутулушиға у тәһрирлигән вә тәстиқлиған китаблардин башқа йәнә у өзи язған китабларниңму сәвәб болған яки болмиғанлиқи техи айдиң әмәс.

Пикирләр (0)
Share
Толуқ бәт