‎Qazaqistan yettisu Uyghur muzika mektipi oqughuchiliri tunji konsértini ötküzdi

Muxbirimiz gülchéhre
2016-11-15
Share
yettisu-uyghur-muzika-mektipi-1.JPG Qazaqistanning almata rayonigha jaylashqan bayséyit yézisida échilghan "Yettisu Uyghur muzika mektipi" ning oqutquchi we oqughuchiliri.
Photo: RFA

Qazaqistanning almata rayonigha jaylashqan bayséyit yézisida échilghan "Yettisu Uyghur muzika mektipi" ning oqutquchi we oqughuchiliri, ikki ay jiddiy we etrapliq teyyarliq qilip, ata, ana we ustazlirigha tunji qétimliq konsértini 11 noyabir küni körsetti we bu arqiliq mektepning resmiy échilish murasimi bayséyit yézisida muweppeqiyetlik bolup ötti. Qazaqistandiki Uyghurlargha xas tunji muzika mektipi bolghan yettisu Uyghur muzika mektipi, bash shtabi en'gliyediki agaxan muzika fondining yardimi bilen qurulghan bolup, mektepning qurulush we alaqe ishlirida asasliq rol oynighan, londonda pa'aliyet élip bériwatqan medeniyet tetqiqatchisi, london Uyghur ansambilining qurghuchisi eziz eysa ependimu mektepning échilish murasimigha alahide teklip bilen qatnashqan. Ziyaritimizni qobul qilghan eziz eysa ependi konsért we murasimning özini we bayséyttiki ustazlar, ata, anilar we balilarni oxshashla hayajan'gha salghanliqini, qisqighighe ikki ay waqit ichide yettisu mektipidiki ustaz we oqughuchilarning zor tirishchanliq körsetkenlikini, ularning qizghinliqi we qolgha keltürgen netijiliridin tolimu ümidlen'genlikini bildürdi.

Dutar, tembür, rawab, daplar bilen orunlan'ghan bu mungluq Uyghur klassik naxsha, muzikilirini, muqamlirini muzika mektipide terbiye körüwatqinigha emdila ikki ay bolghan 6 yashtin 11 yashqiche bolghan Uyghur balilirining orunlawatqanliqigha ishinemsiz? bu qaynaq konsértni teyyarlighan bayséyt mehellisidiki yettisu Uyghur muzika mektipining oqutquchiliri, ular 11-noyabirdiki, mektipining échilish murasimini özlirining konsérti arqiliq kütüwalghan. Mezkur konsértqa qatnishish üchün mexsus londondin yétip kelgen, mektepning qurulushigha asas qilghan we asasliq xizmetlerni qilghan, konsérttiki eng asasliq tamashibin eziz eysa ependimu, balilarning ikki aydiki ilgirilishidin heyran qalghan. U bolupmu özining Uyghur naxsha, muzika sen'itige ishtiyaq baghlighan balilarda shekillen'gen bir xil rohluq keypiyattin bekrek xosh bolghanliqini bildürdi.

Konsért meydanida eziz eysa ependining yardimi bilen, biz yene téléfon arqiliq mektepning asasliq oqutquchi, ustazliri bilenmu tonushtuq.

Eziz ependi yene oyun körsetken oqughuchilar bilen qizghin söhbetleshti.

Biz yene téléfon arqiliq almatadiki Uyghurlar yurti bayséyt xelqini söyündürgen we ulargha zor ümidlerni bergen, yettisu Uyghur muzika mektipi mudiriyitining, mektepning netijilirini xulasilesh we kelgüsi pilanliri heqqidiki mexsus söhbet yighinighimu ishtirak qilduq.

Mektepning asasliq muzika oqutquchisi, yétekchisi, péshqedem ustaz eziz turdiyéf ependi, mektepning tunji konsértidin, ustaz bolush süpiti bilen notilardin özining eng hayajanda ikenlikini we ustazlar hemde balilarning bu ikki ay jeryanidiki tirishchanliqi we tunji konsérttiki ipadisidin bekmu memnun bolghanliqini éytti. U, "Balilirimiz mukemmel bir sehne esirini namayan qildi" dédi. U axirida özining Uyghur muzika medeniyitining warisliridin we mektepning kelgüsidin zor ümidlerge tolghanliqini xushalliq bilen ipade qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet